LEVIYA 5 - KHYINGEI PU'TLOU Bible (BSI)

Tloulam Toubainei Mralnung'tlim Makatnei Lammit

¹ “Kounakpi thimi hukounak khatni klal lhou touwurbi, heiyei ngamrou thimi hukhatya muthungme nimanung muthungmakme toubi tlou mayungpi thimi hoipina'nungei ungbangla'nungri, ani pichar bomra chimni yunthutpima'nungri, klal heiyei mralri ani urrou da.

² Nimanung, thimi hukounak khatni tharmuei lhoura marmok ui-waa nimanung ram'waa, nimanung ukni tulcha chiwi khatdei sraltang an, metu an palkur leiyanungri, heirou heiwaya aimshani borhme toubi ningmukhou makanungkhi, a heiri borhwura, heirou heiyei mral leiyura.

³ Nimanung, thimi hukounak khatni palril yamak thimi khatya palkur leiyanungri, a heiri marmokkur thimikhat hoiyura, heiwaya ani ningmukhou makanungkhi, ani heiwaya hungningmukur tlainirouri a heiri kmangh thimi khat hoiyura.

⁴ Nimanung, thimi hukounak khatni koukhatkhi khalthimakni aiyei murni lhangaimak lhou nimanung lhangai lhouya tounanungei pangei yunbi tlou kantomla'nungri, pangei kantomkur tlou heiwaya ani ningmukhouma'nungkhi, ani heiwaya hungningmukur tlainirouri, a heiri mral klei thimikhat hoiyura.

⁵ Heineri heinaksi lhoubom khatrou a heini mral leikur thimikhat hoiyura'nungri, aiyei lalkur heiwaya ani shunthutdurbi ukning hungrou da.

⁶ Heitoubi aiyei touwurkhou borh heinung'tlim ani Umpunung makatput khoini, yaorul hangrei yaopui khatle yaoshun khat nimanung tlang khatkhi heilhakrou da. Heisitoubi Suipipuni aiyei rungkhlangra mral kuknanungei makatpirou da.

⁷ “Heiya kounakpi ani yaokhat urthutchangma'nungri, aiyei touwurkhou mral heinung'tlim Umpunung makatnungei ram'mathru khintam nimanung cheem'mathru khintam, khani borhnung'tlim, heirou khatni pumni hongbini makatnungei'tlim urthutlaksu.

⁸ Heitoubi ani mathrurap heiya Suipipunung heipirou da, heitoubi ani lamkrini mathru khatri borhnung'tlim makatrou, heitoubi Suipi puni heiwaya ngak khreideekpirou, heiya lailaini thatkarkhaimakni khourou.

⁹ Heitoubi ani borhnung'tlim makatkur mathruei hee thari khrahpal dourei mnakra khrephaangpirou, heirou maleithung hee nammani khrahpallei holira manchirsundarou.

¹⁰ Heitoubi ani Puwatlhou lammit hilthungni, khintam tlung mathru heichaya pumni hongbini makadthurou. Heisitoubi Suipipuni aiyei touwurkhou mral heinung'tlim aiyei rungkhlangra makatbi borh kuknanungei Puwatlhou toupirou, heitoubi aiyei mralya kukpi phayerrou.

¹¹ “Heiya ani ram'mathru khintamcha nimanung cheem'mathru khintamchakhi urthut manima'nungri, aiyei borh touwurkhou heinung'tlim makatnungei ani tsaikun lhangai Ephah khatrei krungkok chiptam thuknarei khat heimakatlaksu; heitoubi ani tsaikunra shirek shunglhakmakni, heirou frankincense mroh kunkhi lhakmakni makatrou da; ngamri tsaikun heiri borhnung tlimyei makatput khat.

¹² Heirou ani tsaikun heiri Suipipunung heilhakpirou da; heirouri Suipipuni tsaikun heiri ningthutna'nungei siruk khoini hutbor'khat chaaplouheibini, heitoubi khrahpal doura meira hongbi Umpunungei makatrou da, ngamri heiwari borhnung'tlim makatput khat.

¹³ Heisitoubine thimi heiwaei borh touwurkhouya kukpinanungei Suipipuni makatnei Puwatlhou toupirou da; heiyanungri aya kukpirou. Heitoubi tsaikun makatnarei maleithungkur siruk namma heiri Suipipuei hoirou.”

¹⁴ Heirouri Umpune Moses'nung shunbi atoubi kyun:

¹⁵ “Kounakpi thimi hukounak khatni muheimakni Umpuei khyingei lhoubomra toushuiwurbi toukarhakur leiyanungri, heirouri ani aiyei mralnung'tlim Umpuei bomra yaorul hangrei msei naimak yaopacha khat loubine, Pucheemrei youkna hilthungni, kulshanyei shekelkou chaangh malknani urthutbi makatrou da; ngamri heiri borhnung tlimyei makatput khat khoi.

¹⁶ Heirou ani Khyingei bomra lalwurkhounei heiwaya mallenglhaknei makatbini Puwatlhoukhi tourou da; heitoubi makatput heiyei siruk phanga thuknarei siruk khat lhakbangbini Suipipu heinungei ani malanpirou da; heirou Suipipuni aiyei heimakat yaoshun heichale kalhonni Puwatlhou toupibi aiyei mral kukpi hoiyerrou.

¹⁷ “Heirou kounakpi thimi hukounak khatni Umpune toumaklo toubine chay piwurkhou lhoubom khatya karhani borh touwurla'nungri, heiwaya ani ningmukhoumanungkhi, a heiri mral leiyura, heirou aiyei mral heiyei tanti heiri ai'mshani phachanarou.

¹⁸ Heiyanungri ani yaorul hangrei msei'mak yaopacha khat Suipipunung heilhakpirou da; yaoshun heiyei manri borhnung'tlim makatnei lingra nani loudanpirou da; heitoubi Suipipuni aiyei toushuiwurkhou klal heinung'tlim kukpinanungei makatbini Puwatlhou toupirou da, heiyanungri aya borh kukpirou.

¹⁹ Awari borhnung tlimei makatkur putkhat, ngamri a heiri Umpuei maibongra mral leikur thimi khat hoiyura.”