LEVIYA 4 - KHYINGEI PU'TLOU Bible (BSI)

Borh Kuknanungei Makatnei Puwatlhou

¹ Heirouri Umpune Moses'nung shunbi atoubi kyun;

² “Israellei thimi rapnungei shunbini atoubi yunpilak, Kounakpi thimi hukounak khatni, Umpune toumaklo toubine chay piwurnarei shuiwurbi chaylam khat toubaikur leiyanungri, kyun heinakni toulaksu:

³ Kounakpi shirek teipikur Suipipu khatni borh lhou touwurbi thimi rapya karha'kyer leiyanungri, Umpuei maibongra ani aiyei klal touwurkhou heinung'tlim msei naimak halshun pa khat heilhakbi borh kuknanungei'tlim makatlaksu.

⁴ Ane halshun pa heichari Khulbung Kartilna Pucheem shumtrumra Umpuei maibongra heilhaklaksu; heitoubi halshun lura aiyei hut khoubini heitoubi Umpuei maibongra halshun heichaya hatlaksu.

⁵ Heitoubi shirek teipikur Suipipuni halshun heiyei hee thacha loubine, heitoubi hee heiri Khulbung Kartilna Pucheemra heilhaklaksu.

⁶ Heirou Suipipuni aiyei hutmayung heiri heera thunlupbi, heitoubi Pucheemyei mangkhalla yarkhalna phiyengra Umpuei maibongra hee heiri enibuirek khrephaanglaksu.

⁷ Heitoubi Suipipuni hee thacha heiri Kartilna Pucheem rilla klei mrohkun hongna khrahpal dourei halchee raprakhi Umpuei maibongra teiphaangpirou; heitoubi heiyei maleikur halshun hee namma heiri Pucheem shumtrum pongra klei makatput hongna khrahpal holira karhilni shungsundarou.

⁸ Heirou ani borh kuknanungei makatkur halshun heiyei anyaorap heiri namma louthutlaksu; khrilrang yumphopna yaodangrap heirou khrilrangrei kyao anyaorap nammakhi louthutlaksu.

⁹ Heitoubi makal khintamkhi, heirou heirapya lhomphopna uklhopbei yaodang rapkhi, heirou mathinle, heiwaya lhomphopna yaodangrap nammakhi makal raple kalhonni pulni lokpa aatloulaksu.

¹⁰ (Malung pilyernanungei makatkur halshunrei anyaorap namma aatloubine makatkur heinakrimni), Suipipuni anyaorap namyerwa heiya hongbini makatna khrahpal doura meini hongbini makatlaksu.

¹¹ Heiya halshun heiyei an'un, heirou heiyei mitee nammale, aiyei lukhi kalhonni, heirou heiyei ho raple, khrilrangkhi heirou heiyei deekhi kyaoni,

¹² touri, halshun heiyei sharung namma pumni louheibini, heirou rungbomyei palshung pura Khyingei makatna bira heithutbini, heitoubi meika'ud shungthutna bira, heeng lukpopbi meini namma hongurou da.

¹³ “Asinungri Israellei cheemkhur nammani kounakpi suiwurbi borh lhou touwurlanungri, heirou lhou heiri Umpuei chaylamya karhani toukur hoiyanungri, lhou heiri kulyomni mumakbikhi, yarap heiri klallei lhoutou thimirap hoirou da.

¹⁴ Heitoubi yai touwurkhou klallei lhou heiri kulyomni yenmuwurlanungri, kulyomni heinung'tlim borhya limnanungei halshun pa khat makatlaksu, heitoubi Khulbung Kartilna Pucheemyei maibongra heiurlhaklaksu.

¹⁵ Heitoubi cheemkhurrei Yama upa rapni Umpuei maibongra hallu doura yai hutrap khoulaksu; heitoubi halshun heiri Umpuei maibongra hatlaksu.

¹⁶ Heirouri shirek teipikur Suipipuni hal'hee thacha loubine, heitoubi Khulbung Kartilna Pucheemra heilhaklaksu.

¹⁷ Heitoubi Suipipuni hee heiwara aiyei hutmayung thunlupbini, heitoubi mangkhal yarkhalna maibongra Umpuei bomra enibuirek khrephanglaksu.

¹⁸ Heirou ani hee thari Pucheem rilla khrahpal doura klei halchee doura Umpuei maibongra teiphanglaksu; heitoubi maleikur heerap namma heiri Pucheem shumtrum pongra klei khrahpallei holira karhilni shungphanglaksu.

¹⁹ Heirou heiyei anyaorap namma heiso ani aatloubi khrahpal doura meini hongurbi makatlaksu.

²⁰ Heisitoubi ani borh kuknanungei makatkur halshunrei loubine makatkur heinakrimni, makatput halshun heirouweikhi ani heisi toulaksu. Heitoubi Suipipuni yaya borh kukpinei Puwatlhouya toupirou, heisitoubibini yaya borh kukpikur hoiyerrou.

²¹ Heirouri ani halshun heiri rungbomyei palshung pura urthutloubine, heitoubi lamkriyei halshun meira hongkurnakni, heiwakhi meira hongbini makatrou da; ngamri awari kulyomyei borh limnanungei meira hongbi makatkur putkhat.

²² “Heirou kounakpi lhou'urpu khatni, Umpu aiyei Dunpuni toumaklo toubine chay pikur lhoubom khatya suiwurbi borh touwurlanungri, a heiri mral leikur thimi khat hoiyura.

²³ Kounakpi aiyei touwurkhou klal heiri aimshanungei kandangni muyerkur heiyanungri, ani aiyei touwurkhou klal heiyei runghutnung'tlim khoini tlangshun pa msei naimak khat ani heilhakbini makatrou da.

²⁴ Heitoubi ani tlangshun heiyei lura aiyei hut khoubini, heitoubi meira pumni hongbi makatna bira, Umpuei maibongra hatrou da; ngamri heiri borh kuknanungei makatkur putkhat.

²⁵ Heitoubi Suipipuni borh limna makatput tlang heiyei hee thacha loubine, heitoubi hongbi makatna khrahpal doura klei halchee rapra aiyei hutmayungni teiphangrou, heitoubi heiyei maleikur heerap namma heiri hongbi makatna khrahpallei holira karhilni shungphangrou da.

²⁶ Heitoubi ani makatput heiyei anyaorap namma aatlouheibini, malung pilyerna makatput hongbi makatkur heinakrimni khrahpal doura meini hongurbi makatrou da. Heisitoubi Suipipuni aiyei borhya kuknanungei limpirou, heirou aiyei borhya kukpirou.

²⁷ “Heirou kounakpi kulyom hangrei hukounak thimicham khatni shuiwurbi, Umpuei toumaklo toubi chay piwurkhou lhoubom khatya toubaiwurbi klal dawanungri;

²⁸ heirou aiyei touwurkhou borh heiwaya aimshani hungningmukur hoiyanungri, heirouri ani aiyei borh touwurkhou heinung'tlim msei naimak tlangshun puicha khat ani heilhakbi makatrou da.

²⁹ Heirou ani borhnung'tlim makatput tlang lura aiyei hut khoubini, heitoubi tlang heiri pumni hongbini makatna khrahpal pongra hatrou da.

³⁰ Heitoubi Suipipuni tlang heeya thacha aihutne loubine, heitoubi meira hongbini makatna khrahpal dourei halchee rapra teiphangrou da; heitoubi heiyei maleikur heerap namma heiri khrahpal holira karhilni shungfnalrou da.

³¹ Heirouri ani malung pilyerna makatputrei aatloukur heinakrimni, tlang heiyei anyaorap namma aatloubi, heitoubi Suipipuni anyaorap heiri meira hongbini, Umpunungei khrim muinamkyer khrumnaput khoini makatrou da. Heisitoubi Suipipuni aya borh kukpi phayerrou, heitoubi aya borh limpikur kya.

³² “Heiya kounakpi ani aiyei borhnung'tlim yaoshun khat heilhakrou dawanungri, ani msei naimak yaoshun puicha khat heilhakbi makatrou da.

³³ Heitoubi borhnung'tlim makatput tlang lura aiyei hut khoubini, heirou pumni hongbi makatna bira borhnung'tlim heimakatkur tlangshun heichaya hatrou da.

³⁴ Heirou Suipipuni aiyei hut heini borhnung'tlim makatkur tlang heiyei heeya thacha loubine, heitoubi pumni hongbini makatna khrahpal dourei klei halcheera teiphangrou da; heitoubi heiyei maleikur heerap namma heiri khrahpal holira karhilni shungfnalrou da.

³⁵ Heitoubi ani tlang heiyei anyaorap namma, malung pilyernanungei makatkur yaorei anyaorap aatloukur heinaksini aatlouheibi, heirou Suipipuni heirapya khrahpal doura meini hongbini Umpunungei makatrou da. Heisitoubi Suipipuni borh kuknanung'tlim Puwatlhou khoini makatbi ai'aiyei touwurkhou borhya kukpi phayerrou da.