LEVIYA 26 - KHYINGEI PU'TLOU Bible (BSI)

Dunpuei Shunya Ninglhaknei Mhei Khoini Phorpha

¹ “Nane thrailha rapya sheemthutnung yamakrou, heirou thrailha rapya dunkhoubi, heirou thrai-shutlaikhi bunbini khrumnungkhi yamakrou; heirou nairammei rilla thlungni nimanung heengni thrailha, thimilha khakbi bunbini khrumnungkhi yamakrou. Kouweiyo toulanungri Keiri naiyei Dunpu, Umpu.

² Nane Keiyei Sabbath rapya ngaakbine, heitoubi Keiyei khyingei Pucheemya rikrai-khrumnarou da. Ngamri Keiri Umpu.”

³ “Kounakpi nani Keiyei ayil rapya hilthungni chawanungri, heirou Keiyei chaylam rapya kngaakne lhou toulanungri;

⁴ Keine nanungei kummei nung kroya kheen chani royerpirou; heirouri nairam heirouwei trunwai lhangai-marthumni heirouwa, heitoubi heengtrung-rotrung rapkhi leraoni hei heirouwa.

⁵ Heirou naiyei trun lukyei kheen heiri darkha heitrun khumyei trum pharou, heirou darkha heitrun khumnei watlhou heiri trunwaiyei lung wa'tlanei kheen trum hungpharou; heirouri nani kroni chamairou, heitoubi nairamra nani shuikngam yaomakni paalchangrouwa.

⁶ Heirou Keine nairamra kyingei chaan yenpirou, heiyanungri thimi hukhatnikhi naya chiyerkur toukhi naimakni nani malungdamni ipmathrillou; heitoubi Keine nai ram'rouwei thuithikur ramyaa rapyakhi louthutdurpirou, heitoubi hunikhi nairamra raal damakrou.

⁷ Heiya nani naiyei yeekna thimi rapya hulchawurbi, heirou yayari maibongra raalshon'ne hiyerchirou.

⁸ Heirou naiyei thimi napung-phangani yeekna napung macha'khatyakhi hulloukhei manirou; heirou naiyei thimi napung macha'khatni yeekna lishing chipyakhi hulloukur manirou. Heirouri naiyei yeekna thimi rapri maibongra raalshon'ne hiyerchirou.

⁹ Heisitoubi Keine naya rikrai khrumkna mutpirou, heitoubi naya pung-shanyerrou; heirou thimi mshingkhi chungduiyerrou, heitoubi nanungei Keine Mardingrilnei tlouya khoupirou.

¹⁰ Kheen tlani marpeilhakurkhou cha khmanya chamaibini, rannei trunwailung rapya luklhaknanungei nani chakei rapya mathaiheirou.

¹¹ Heiyakhi duinara Keine naihangra Keiyei Pucheem khatkhi phunbangpirou, heitoubi Keiyei Lhawaini naya lakkhoumakni leiphobpirou.

¹² Heirou Keine naihangra leipirou, heitoubi naiyei Dunpu khoini leirou, heirou nari Keiyei thimirap hoirouwa.

¹³ Keiri naya Egypt ram'rouwei ruithutpikur naiyei Dunpu, Umpume; heineri nari hanui kallengni yaiyei shokrap khoini leinungei nimakkura; ngamri naiyei nai hoina bomrei put-khritya Keine louthutdurpila, heitoubi naithukni palnanungei Keine naya mathumbangpiwurla.”

Shunya Ningmaknei Tanti Klah Mrim-knang Hungthukrou

¹⁴ “Heiya kounakpi nani Keiyei shunya ninglhakmakni, heirou Keiyei chaylam rapya chanthung'makanungri;

¹⁵ heirou kounakpi nani Keiyei ayillei lammit rapya tlou hoipimakni, heirou Keiyei chaylam rapya khingurkhoubi, heirapya hilthungni lhou toumakni, Keiyei ayil rapya toubailanungri;

¹⁶ Heiyanungri Keinekhi nanungei anakrimni lhou toupithurou: Keine naidoura loumuthungmakni chi'knaei klah'knang thukyerbi, kmang-deekbaikhi thukyerrou; heirou kanchun knakhi thukyerbi naiyei mitlungkhi deoyerrou; heitoubi naiyei rongchan ramphani khi-kna thukrou. Nane trunwai watlabikhi koukhatkhi karshukmakrou; ngamri heirapya naiyei yeekna thimi rapni lukchalourou.”

¹⁷ “Heirouri Keiyei mairungni nai maibongra karhani mayungeinung, nayari naiyei yeekna thimi rapbei maibongra tumni hatdurchirou; heitoubi naya machin thimi rapni naidoura pukhoini palheirou; heirou nayari hunikhi hulmakanungkhi, naitamne chitekbi loutrukchaeirou.”

Purvi-Purcham Hungthukrou

¹⁸ “Heirou kounakpi heiroukhi Keiyei shunya ninglhakthu'manungri, Keine naiyei borhlhou toukurya duini enibuirek naya tanti piheirou.

¹⁹ Heirou Keine naiyei tangchana bom khoi mantrang heiwaya toudeekpirou; heirou nani nungthounaksi chouni malungambi klei heiwakhi thirnaksi holyerrou, heirou thleikhi kulshan naksini holyerrou.

²⁰ Heirouri naiyei mantrangkhi koukhatkhi karshukmakarou; kouweiyo toulanungri, nairam heiri koutrunwai khatkhi hei heimarou, heirou heengtrung-heitrung rapkhi hei heimarou.”

Thuithikur Ramyaa

²¹ “Heirou kounakpi nani Keiya karhani lhou toukartlikbi, Keiyei shunya ninglhak'manungri, Keine naidoura thrai kna'lamni chansher dayerbini, naiyei touwurkhou borh lhou hilthungni siruk'eni duini klah dayerrou.

²² Heirou Keine naihangra thuithikur ramyaa rapkhi yenmalhetlhakbi, heirou yaa rapni naiyei chanao rapya muloueirou, heirou naiyei dunbi klei ui-waa rapyakhi yani ramailoubi konmangyerrou; heitoubi nayari thimi mshingkhi kanthrityerrou; heisitoubine naiyei lhou touna lam kantangrou karshukyermakrou.”

Pharthraini Chansher Dakur

²³ “Heirou kounakpi nani heirapnikhi keinungei mai hollhakmakni Keiya karhani lam karlhikni chawanungri;

²⁴ Keinekhi naya karhani lam kartlikni charou; heitoubi naiyei touwurkhou borhyakhi siruk'eni duini naidoura tanti pirou.

²⁵ Heirou Keine naidoura raal dayerrou, heitoubi Keiyei mardingpikur heiwaya toubaikur thimi rapya khlang lhakbi tanti pirou; heirou nani naiyei khukarthil rilla pulni kartilyei kheenrou, Keine naihangra pharthraiyei chansher yenmalhetrou; heitoubi nayari naiyei yeekna thimi rapbei hutra pilhakrou.

²⁶ Heirou Keine naiyei trunwai lung rapya heisibil kanthrityerrei kheenrouri, napuiya napung chipni meibom khatra changbi chak-an thungmarshikbini, heitoubi yani nanungei mumtol changh khatra holmarkhebi nanungei pishairou, heiya naniri ukthoni shaiphamakrou.”

Butam Thuk

²⁷ “Heirou nani heiramphakhi Keiyei shunya ninglhakmakni, Keiya karhani chabi leithuwanungri;

²⁸ Keinekhi naya karhani meithukni malungkhani lhoutourou; heirou Keine, Keihakni, naiyei borhlhou touwurkhouya siruk'eni duini naya tanti pibini klah dayerheirou.

²⁹ Heirouri nani naiyei yukpukkur chanapawa, chanapuiya rapbei shamiteeya rampha nani kambi maiheirouhui.

³⁰ Heirou Keine naiyei lukbom thraibom rapya toumangeirou, heirou naiyei thrailha rapyakhi Keine umchaallhakrou; heirou naimshaei khilhung rapya nani khrumbi klei thrailha rapbei deek'khrommurna doura khingmarpeibini lakurkhourou, heitoubi Kei lhawaini naya khingurkhourou.

³¹ Heirou Keine naiyei khukarthil rapya koukhi karshukmakni khrom'mangyerrou, heitoubi naiyei khyingei thraibom rapkhi deek'khromyerbi mangyerrouwa; heirou naiyei khrim muiknam mroh kunya iknei khrimkhi Keine lourubpimakarou.”

Raalni Hulchekloukur

³² “Heirou Keine naiyei paalna ram heiwaya tumni mangyerrouwa; heitoubi ram heirouwei paalbi klei thimi rapri kngakni thimrou.

³³ Heirou Keine nayari limdei rapbei hangra hulcheklhakrou, heitoubi naihilla raal heidathungrou; heirouri nairam heiwaya lakkurkhoubi thimi hukhatnikhi yuldamakni horrouwa; heirou naiyei khukarthil rapkhi hangwalni deek'khrombi mangchirouwa.”

³⁴ “Heirouri nairam heiwani hunikhi yuldamakni khingurkhoubi horkhouliyenri aiyei Sabbath kyingni mathrilthungrou; heitoubi nari naiyei yeekna thimi rapbei ramra paalrouwa, nani heisi leiliyenri ram heiri aiyei Sabbath langthouni mathrilpharou.

³⁵ Ram heini yuldamakni horbi lakkhouliyenri, ani mathrilpharou; ngamri nani yuldaphopbi leiliyenri ram heiwani aiyei Sabbathri tekkhi mathril phakhoumakur.

³⁶ Heirou naihangrei himaleithung thimi rapya yaiyei yeekna thimi rapbei ramra leiyeinung yai ukning mandiyerwurbi, martheeni heengna sha'ngaakyei kalnungkhi yaya hulchakurame toubi chitekbini, raalsona maibongra loutrukcha naksini trukchayerrou; heirou thimi hunikhi heihulmakbikhi yaitam loukanelheirou.

³⁷ Heirou thimi hukhatnikhi heihulmakbikhi, raal bomrei loutruk naksini truknarou, khatle khat tapan'rilbini kanelbaangrilleirou; heirou nari naya yeekna thimi rapbei maibongra loumayungchangnei mantrangkhi yaomakarou.

³⁸ Heirou nari limdei rapbei hangra mangchirouwa; heitoubi naiyei yeekna thimi rapbei ramni nayari madulrouwa.

³⁹ Heirou naihangrei hi'maleithung thimi rapyari naiyei yeekna thimi rapbei ramra leiyeinung yaiyei borhlhoura chulbi tlumchirouwa; heirou yaiyei nutar-patar rapbei borh lhoura yari chulmaangchirouwa.”

Hulchekbikhi Abraham'nung Mardingpikhou Heiri Chutmakni Leirou

⁴⁰ “Kounakpi yani yaiyei borhkhi heirou yaiyei nutar-patar rapbei borhkhi shunthutbini ukning hunglanungri, heirou yani Keiya karhani lhou touwurkhou, heirou Keirouwei karlhikni chawurkhounarei ukning hunglanungri;

⁴¹ heirou Keinekhi yairouwei karhani lhou touwurkhoubi, heirou yaya yaiyei yeekna thimi rapbei ramra ruilhakwurkhou heiwaya, yai ukningrei murdanmak heirouwei ukning khyingni hungthutbini, yaiyei borh tounei tanti heiwaya yani yalhaklanungri;

⁴² heiyanungri Keinekhi Jacob'nung mardingpikhou tlouya, heirou Isaac'nung mardingpikhou tlouya, heirou Abraham'nung mardingpikhou tlouya ningthutpirou, heirou Keine ram heiwakhi ningthutpirou.

⁴³ Heirou yai ram heiwanikhi yani khingurkhoubi paalmaknei ngamrou, aiyei Sabbathya mathril pharouwa; heirou yani yaiyei borh lhou touwurkhounei heinung'tlim tanti pharou; ngamri yani Keiyei chaylam rapya yanimakni horkur, heitoubi yai ukningra Keiyei ayil rapya tlou hoipimakur.

⁴⁴ Heisiya hoiyanungkhi, namyerwa heinungei'tlim, yani yaiyei yeekna thimi rapbei ramra leiyeinung Keine yayari khingurkhoubi lakkhoumakrou; hei nimanungri Keine yakou mardingrilkur tlouya baiyanungri yari tlumni mangurou. Kouweiyo toulanungri, Keiri yaiyei Dunpu, Umpu.

⁴⁵ Heiya Keine yai ngamrou, yaiyei nutar-patar raple mardingrilkhou tlouya ningthutpirou; ngamri Keine yayari yaiyei yeekna thimi rapbei mit'thrilna maibongrei Egypt ram'rouwei ruithutloubine heitoubi yaiyei Dunpu hoipilei; Keiri Umpume.”

⁴⁶ Arapri Umpune Ale Israellei chanao rapbei tlakra mardingrilbi sheemkur heirou Sinai Lhungdoura Moses'yei hutra silnakur Aiyei Chaylamrap, heirou Aiyei youkna ayillei lammit.