LEVIYA 25 - KHYINGEI PU'TLOU Bible (BSI)

¹ Heirouri Sinaiyei Lhungdoura Umpune Moses'nung asitoubi kyun:

² “Israellei thimi rapya shunbini atoubi yunpilak: ‘Keine nanungei piroukyou ramra wachangei kheenrou, ram heirouwei nani Umpunungei mathrilnei tlaini Sabbath marngeirou.

³ Heirou nani kum'thrukbil naiyei louyaora trunwai wa'tlabini, heitoubi kum'thrukbil naiyei darkha yekul rapya trunmathaibi, trunwai hei rapya lukrou.

⁴ Heiya kum'eni tlunganungri, nani loumahrap heiwaya mathrilyerbi, Umpunungei Sabbath marngeirou. Heiyei kum rillari nani naiyei louyaora trunwaiyei lung tlanung yamakrou, heirou darkha yekul rapkhi trunmathainung yamakrou.

⁵ Heitoubi louyaorei aitam katpukbi klei trunwai lung rapkhi nani aatchanung yamakrou; heirou naiyei yekul trun'mthaimaknarei darkha hei rapyakhi nani khumlhaknung yamakrou. Heiyei kum heiwari ram heiyei mathrilna kum hoirou.

⁶ Heirou Mathrilnei kum heiyei rillei putthukrap touri heenghei-rohei, heengna-rohna, anna-louna namma heiri nai chanung-mainungei hoirou; neinungei, neiyei shok napawanungei, heirou shok-napuiya'nungei, heirou neekbi lhouchurkna thimi rapnungei, heirou nangkou paalmalkna miram-mithrillei thimi rapnungeikhi hoirou.

⁷ Heirou neiyei ui-waa rapnungei, heirou neiyei ramrei klei yoo-waa rapbeikhi, pukbi klei ramna-rona, heenghei-rohei namma heiri yai chamainungei hoiyerrou.’

Kum Somngaei Shangthil Kwa

⁸ “Heitoubi nangni kumserrei Sabbath heiri kum eni'eni mshing kansherlak, heitoubi kum'eni'eni heiri enibuirek mshing sherlak. Heisitoubi nangni kum eni'eni heiwaya enibuirek sherlanungri kum somlile-takobil tlung.

⁹ Heiyanungri nangni tlun'eni tlung tanglaei chipni tlung tlainirou yaopayei chee pengkul shakhungbini khulpao chillak. Heirou nangni Lhukthutpinei Kneitang markhulninung naiyei ram karyouni yaopaei chee shakhungbi khulpao chillou.

¹⁰ Heirou nani somnga tlung kum heiri Khyingni makatkur, heitoubi heikum heirouri nairamra klei thimirap nammanungei malhetthutpinei nungkngai khulpaoya paothutrou. Heikum heiri nanungei Jubilee'yei kum khat hoirou; heirou thimi kantangni aiai-mshaei lhoubomra kallenglhakrillou; heirou thimi kantangni ai'aiyei cheemkhur-rokhurrei cheemmai-bommaira kallenglhakrillou.

¹¹ Nane somnga tlung kum heiwaya naiyei Jubilee khoini Kneitang markhullou da; kum heirouri nani trunwai lungkhi watlanung yamakrou; heirou aitam katpukthutbi klei trunwai lung rapkhi nani luknung yamakrou; heirou nani trunmthaimak yekulrei darkha hei rapkhi lalhaknung yamakrou.

¹² Kouweiyo toulanungri, kum heiri Jubilee'yei kum, nani Khyingni marngeirou. Heirou naiyei lourei luklhakhou trunwai lung rapyatom nani chamairou.

¹³ “Heirou Jubilee'yei kum heirouri yorwurkhou putcheirap namma heiri ai'aiyei putchei pu rapnungei mallenglhakpirou. (Jubilee'yei kum heirouri nani ai'aiyei lhoubomra kallenglhakrillou.)

¹⁴ Heirou nani naiyei cheemlhun thimi rapnung koukou loubomya yorlanungri, nimanung yai hutrei koukou loubomya lorillanungri, nani khatle khat mandalrilbi minamrilmakrou.

¹⁵ Heirou Jubilee hillei kum mshing hilthungni neiyei cheemlhunrei ramya nangni lolanungri, Jubilee hillei kum mshing hilthungni ani trunwaiyei lung tirithibini neinungei yorpirou.

¹⁶ Heirou kounakpi kum mshing heini chunganungri, nangni ram heiyei man duini pikur yarou, heirou kounakpi kum mshingni chungmakanungri, neiyei ram man heikhi dani pirou. Kouweiyo toulanungri, loubom heiwani kum mshingei hilthungni thukroukyou trunwaiung heiyei mshing hilthungni loupuni neinungei yorlhakur.

¹⁷ Heineri nani khatle khat mandalbi minamrilnung yamakrou; heiya nani naiyei Dunpuya chi-rikrairou da; kouweiyo toulanungri, Keiri naiyei Dunpu, Umpu.

¹⁸ “Ngam heineri nani Keiyei chaylamyei lammit rapya baimakni chanthungbi lhou toulak, heitoubi Keiyei Ayilya kngaakni chalak; heiyanungri nani nairamra kyingni paalchangrou.

¹⁹ Heirouri ram heini trunwaiyei lung marthumni heirou, heitoubi nani ukthoni chamairouwa, heitoubi ramheirou kyingni paalrouwa.

²⁰ Heiya kounakpi nani, ‘Keine trunwai lhalhakmakni heirou koukhi luklhakmakanungri, kum'eni tlung heirouri kouya chamaiserouwo?’ toubine yunkhi kya.

²¹ Heiyanungri Keine naidoura Keiyei phorya marthumni rosundayerbi, kum'thruk tlung kumrouri nanungei kum'khyum phani chamainungei kroni trunwaiyei lung marthumni heiyerrou.

²² Heirou kumchot tlung kum heirouri nani trunwaiyei lung watlalhakrou, heiya hoiyanungkhi khman trunwaiyei lung rapya nani chamaiheirou, heirou kum'tako tlung kumrou trunwaiyei lung ranya luklhakyei kheen ramphani khmanya nani chamaibini leirou.

²³ Ram heiri nani cha'knani mallengrilmaknungei yorlhaknungeiri yamakrou; kouweiyo toulanungri, ram heiri Keiyei; ngamri nari ramtaangbi klei miram-mithrillei thimithil.

²⁴ Heirou naiyei ramme toubi phayerkur ram siruk namma heiri nani mallenglhaknei kya ayilkhi khourou da.”

Lalthum Mallengthutnei Lammit

²⁵ “Kounakpi neiteinao hukounak khatni kanringurbi tounaram maknei ngamrou, aiyei ram siruk khat yorkur thukkanungri, heiyanungri aiyei karnakril cheemkhur teinao khatni wathukbi aiyei teinaowei yorkur ram heiwaya lhukmallengthung kya.

²⁶ Heiya kounakpi thimi heiwani anung'tlim lhukthutpirou thimi hukhatkhi makkanungri, aitamne marshikbini maniyei kheenrou hunglhukthutnanung tourou da.

²⁷ Heitoubi aiyei ram yorlhakkurnei kum mshingya tekbini, ani ram yorlhakkur napawanungei man mtikchani mallenglhakbini, aiyei ram heiwaya ani hanui lhukmallengkur kya.

²⁸ Heiya kounakpi yorlhakkur napawa heini aiyei ram heiwaya hanui lhukthut manimakanungri, aiyei yorlhakkur ram heiri Jubilee'yei kum hungtlungbongyen ram'klo thimi heiyei hutra heisi heikhourou da; heiya Jubilee'yei kumrouri ram heiwari hallei rampuei hutra mallenglhakpithurou da.

²⁹ “Heirou kounakpi thimi hukounak khatni chiekpal kuikoolna khukarthil rillei klei aiyei leina cheem khat yorkur thukanungri, heirou ani cheem heiwaya yorkur tlaini'rouweini kumkhatdei rilla maninanungei lhukthutrou da; ngamri kumkhatdei rilla ani heiwaya lhukthutbom thuknei ayil klei.

³⁰ Heirou kounakpi napawa heiwani kumkhatdei rilla lhukthutthung'makanungri, chiekpal kuikoolna khukarthil rillei klei cheem heiri loloukur thimiyei chaan khatrekei hoiyura toubine lourou. Cheem heiri Jubilee'yei kumroukhi mallengthutmarou.

³¹ Heiya chiekpal kuikoolna yultlairei klei cheem rapri ram heiyei ramhangnakni lourou; heitoubi ram heirapri lhukthutril kya, heirou Jubilee kumrou leemni mallenglhakrillou da.

³² Heisiya hoiyanungkhi Levia rapbei khukarthil, heirou yai palna khukarthil heiyei cheemrap heiri, Levia rapni yai lhukthutkni kheenrou heisi lhukthutloukur kya.

³³ Ngam heineri koukouya hoiyasu, Levia rapbei hoikur heiri lhukthutkur kya; heisitoubi khukarthil rillei klei cheem heiri Jubilee'yei kumrouri lhukmallengrou da; kouweiyo toulanungri, Levia rapbei khukarthil rapbei rillei klei cheem-kei rapri Israel rapbei hangra yaiyei lalthumrap heirou putcheirap khoini klei.

³⁴ Heiya yaiyei khukarthillei khoi halsilna ramhang heiri yornungri yamakrou, ngamri khulbungei ram heiri touchutnungei yamak ramkhat khoini yanungei piwurkhoula.

Kanring-Kanwai Teinao Rapya Trungpi

³⁵ “Heirou kounakpi neiyei teinaowa khatni kanringurbi, naihangra tounaram makni ringchangmanungri, nangni aya miram-mithrillei thimi khatnakni kanrumpilak, heiyanungri ani naihangra palthungchangrou.

³⁶ Airouwei tuy khingdui kyaoni lounung yamakrou, heirou aya duini lananungei lhoukhi toupinung yamakrou; heiya neiyei Dunpuya chi-rikraini leirou da; heiyanungri neiyei teinaowa heini nangle pulchini leimalkna manirou.

³⁷ Nangni airouwei tuy khingduiyerbi thangyernungei pilhakmakrou da; heirou neiyei chakhi thoi kyaoni hollhaknungei anungei pukyermakrou da.

³⁸ ‘Keiri Canaan ramya nanungei pinanungei toubine, naya Egyptbei ram'rouwei ruithutloubine, heitoubi naiyei Dunpu khoini klei, naiyei Dunpu, Umpu.’

³⁹ “Heirou kounakpi nangkou leimalkna neiyei teinaowa khatni kanringurbi, heirou aitam aimshani neinungei yorlhakur hoiyanungkhi, nangni ayari shok khatnakni yrengnung yamakrou.

⁴⁰ Heiya a heiri tuy pibini kneek shok naksini, heirou ramtangbi klei thimi naksini, nangkou leimalnabi, Jubilee'yei kum hungphabongyen neinungei watlhou toubine leirou.

⁴¹ Heirouri ani neirouwei shalwurbini, ale kalhonni aiyei chanao raple, aiyei cheemkhur-bommaira kallengrou da. Heisitoubi ani aiyei nutar-patar rapbei ramra kallengthurou da.

⁴² Kouweiyo toulanungri, yari Keine Egypt ram'rouwei ruithutloukur, Keiyei shikthil. Heineri yayari shok khoini yorwurnung yamakrou.

⁴³ Nangni ayari thuithini marhotnung yamakrou; heiya nangni neiyei Dunpuya chi-rikraini charou da.

⁴⁴ Heirou nani naiyei shok napawa heirou shok-napuiya lorou dawanungri, nairam karhilni yuldabi klei lim rapbei thimi rapya nani shoknapawa heirou shoknapuiya rapya lorou da.

⁴⁵ Heiyakhi duinara, naihangra ramtangbini leimalkna thimi rapbei chanao rapya lokurkhi kya; heirou nairamra leibi puklhakkur yaiyei bommairei thimi rapyakhi lo kya; heirou yarap heiri naiyei lalthum khoini khourou da.

⁴⁶ Heitoubi chaanserrei khoini nani shok rapya naihillei yu-cha rapnungkhi yaiyei lalthum naksini loulhakyer kya; yari klui naimakni naiyei shokrap hoirouwa; heiya naiyei teinao, Israellei thimi rapyari, nani thuithini mareknanung yamakrou.

Kanring-Kanwai Teinao Rapya Lhukthutpi

⁴⁷ “Heirou kounakpi neipongra ramtangbi klei miram-mithrillei thimi khatni lalthum katdunwurbi, heirou akou palmalkna neiyei teinao khatni kanringurbi tounaram makkurbi, heirou aitam aimshani ramtangbi klei thimi heiwanung nimanung aiyei cheemkhur-bommaira shok khoini yorlhakkur thukkanungri;

⁴⁸ heirou aya yorlhakkurle tallengni aya hanui kallengni lhukthutthungri yarou. Aiyei cheemkhur teinao khatni aya lhukthutri yarou.

⁴⁹ Nimanung, aiyei Patulwaei, nimanung aiyei puitulwiyei chawani lhukthut kya; nimanung aiyei shullam bommairei teinao khatnikhi lhukthutri kya; nimanung aitam aimshani marshikbini, ani lhukthut maniyanungri heisi lhukthutri kya.

⁵⁰ Heiyanungri, ani aya loloukur thimi heiwale kalhonni yunrilbini, aya yorlhakkurna kum'rouwei tekyoubini Jubilee'yei kumphani kum mshing sherrou. Heitoubi aya lhukthutnei man heiri kum mshing hilthungni katpabini hoiyerrou. Heirou aya lhukthutnei man heiri tuy pibi kneek shok rapbei manle kum mshingri khatnakdikni hoirou.

⁵¹ Kounakpi lhukthutnanungei kum heiri chungwani maleithunganungri, aya yorlhakkurna man tuy heiwaya lhangkhat duini aya lhukthutnanungei khoini hanui mallenglhakhoukhi kya.

⁵² Heirou kounakpi kum heini Jubilee'yei kum hungtlungnanungei chungni watmanungri, heirou aya loloukur thimile kalhonni kum mshing kansherbi tekthiri kya. Heitoubi maleithung kum mshing hilthungni ani aya lhukthutnanungei manya hanui pilhakur kya.

⁵³ Ayari kum'kummei tuy pibini kneek shoknakni akou leimalnarou. Ane neiyei mithrilna maibongra ayari thuithini mareknayernung yamakrou.

⁵⁴ Heirou kounakpi kum heiyei rilla ayari lhukthutthung'manungri, ale aiyei chanao rapri Jubilee'yei kumrou lhukthutrou da.

⁵⁵ Kouweiyo toulanungri, Israellei chanao rapri Keiyei shikthil; yayari Keine Egyptbei ram'rouwei ruithutpikur Keiyei shikthil. Ngamri Keiri naiyei Dunpu, Umpu.”