LEVIYA 24 - KHYINGEI PU'TLOU Bible (BSI)

Pucheemrei Meishar'le Mumtolrap

¹ Heirouri Umpune Moses'nung asitoubi kyun:

² “Israellei thimi rapya chaytlouni shunpilak, touri yani meishar phura lhakbini karyom mitkhaimakni warnungei shumkur Olive shirek marthingya neinungei heipilhaklaksu.

³ Heitoubi Khulbung Kartilna Pucheem rillei Mardingrilna Theengkung yarkhalna pura, Aaron'ne Umpuei maibongra meishar rapya karyom mei shupopbi manshoklaksu. Awari hillei hungrou kyou naiyei yu-cha rapbei chaanserrei lakkhounungei yamak chaylamyei lammitrap khoini chanthungrou.

⁴ Heirou Aaron'ne meishar rapya sinayei meitharl doura thangknaini dunbaangbi, Umpuei maibongra karyom khoupirou.”

Turngdoura Tlathutnungei Mumtolrap

⁵ “Heitoubi nangni yam lhangai shukloubine, mumtol tum chiple-khni sheemrou; mumtol tumkhatrou yam ephah khatdei siruk'chipbei siruk'khni lhakbini sheemrou.

⁶ Heitoubi nangni mumtolrap heiri sina khyingei turng doura lingshaang khatrou tumthruk'thruk khoubini, lingshaang khni thukni Umpuei maibongra marpeikhourou.

⁷ Heitoubi nangni mumtol lingshaang khniyei doura, khying frankincense mroh kun khoubaanglak, heiyanungri mumtol heiri Umpunungei meira hongbini makatdeinung ningthutnanung siruk khoini leirou.

⁸ Heisitoubi Aaron'ne Sabbath tlainiserrou mumtol rapya Umpuei maibongra karyomni marpeibaangpirou; awari Israel rapbei rungkhlangra lakkhoumakni tounungei mardingpikur Puwatlhouwei lammit khat.

⁹ Heirou mumtolrap heiri Aaronle aiyei chanao rapbei siruk hoirou; yani heirapya khyingei bomra changbini chamairou; ngamri youkna lammit hilthungni, heirapri Umpunungei meira hongbini makatput rapbei yerrouwei khying siruk khoini anungei khaithutpikur putlamrap.”

Umpu ya Manthamaknei Tanti

¹⁰ Kheen heirou aiyei pawani Egyptrei thimi, heirou aiyei puiwini Israellei napuiya khatdei chanapawa khatni Israellei thimi rapbei hangra wathukbini heirou Israel napuiyaei cha'napawale Israel napawa khatle yultlaira ngaalkur.

¹¹ Heirouri Israellei napuiyaei cha'napawane Umpuei minya manthamakni yunbi manchokur. Heitounei ngamrou yani aya Moses'yei leinara heiruilhakkur. (A'puiyei minri Shelomith toubi ung, Dan cheemkhur'rei Dibri'yei cha'napuiya).

¹² Heitoubi yani ayari kulrilla chalphopburbi, heirou Umpuei kningri kou kleiyo toubine yanungei kandangni muyerbongyen khoupikur.

¹³ Heirouri Umpune Moses'nung yunbini asitoubi shunpikur:

¹⁴ “Mancho thimi heiyari yulthungei pura urthutlak, heitoubi aiyei manchokurya mayekthungkur thimirap nammani aiyei lura hut khoulaksu; heitoubi khulbungei thimirap nammani ayari thlungni nanghatlaksu.

¹⁵ Heitoubi nangni Israellei thimi rapnungei yunbini asitoubi shunpilak: ‘Huhuni aiyei Dunpuya manthamakni mancholanungri, aimshaei mralya aimshani urchanarou.’

¹⁶ Heirou thimi hukounak khatni Umpuei minya mantha'makanungri, ayari shuimakni hatrou da; khulbungei thimirap nammani ayari shuimakni thlungni nanghatrou. Ramtaangbi klei miram-mithrillei thimi hoiyasu, heirou ram heiyei thimiya hoiyasu, kounakpi ani Umpuei minya manthamakni yunlanungri, ayari hinei tanti pirou.”

Thimi Hatnei Tanti Heirou Ui-waa Touhatnei Rungkhlang

¹⁷ “Heitoubi thimi hukounak khatni thimi hatlanungri, ayakhi shuimakni hinei tanti pirou.

¹⁸ Heirou thimi hukounak khatni ui-waa khatya hatlanungri, miyei ui-waa hatnei ayakhi khatdei rungkhlang khoini ui-waa khat shingyerrou.

¹⁹ “Heirou thimi hukounak khatni aiyei cheemlhunyei thimi khatya msei knaini touhyemlanungri, aiyei touhyemkur heinakrimni, ayakhi msei knaini touhyemrou.

²⁰ Thru umdeekla'nungri, ayakhi thru umdeekrou; mitlung deoyerlanungri, ayakhi mitlung deoyerrou; heirou ha umdeeklanungri, ayakhi ha umdeekrou. Aiyei minungei toupikur heinakrimni anungeikhi heisibil khlang lhakrou.

²¹ Heisitoubine thimi hukounak khatni ui-waa hatlanungri, ui-waa khoini khlang shingyerkur kya; heiya thimi hukounak khatni thimi hatlanungri, ayari shuimakni hinei tanti pirou.

²² Ayillei lammit heiri ramtangbi klei miram-mithrillei thimi rapnungeikhi heirou nairammei thimi rapnungeikhi khatdik khoini charou; kouweiyo toulanungri, naiyei Dunpu Keiri Umpu.”

²³ Heisitoubi Moses'ne Israellei thimi rapnungei shunmatukur; heirouri yani Umpuya manchokur thimiya rungbom pura urthutloubine, heitoubi ayari thlungni nanghatkur. Heisitoubi thimi rapni Umpuei Moses'nungei chay piwurkhou hilthungni lhou toukur.