LEVIYA 23 - KHYINGEI PU'TLOU Bible (BSI)

Kneitang Markhulnei Lammit

¹ Heirou Umpune Moses'nung asitoubi kyun:

² “Israellei thimi rapnung asitoubi shunpilak: Nane khyingei Kneitangme toubine paothutbi markhulnungei Keiyei khalthutbi kartinpikur Kneitang rapri:

³ Tlaini thruknibil watlhou chur yarou, heiya enini tlung tlaini heiwari Sabbath, Khyingei markhulnei tlaini hoirou; heitoubi heiyei tlainirouri nani koulhou khatkhi churnung yamakrou: Tlaini heiwari naiyei paalna ram karyouni Umpuei Sabbath khat khoini markhullou da.”

Ralthutpinei Kneitang

⁴ “Umpune kartinpikur kumchaan hungtlunganung, nani Khyingei Kneitangme toubine paothutbi markhulnungei Kneitang rapri ariya:

⁵ Lamkri tanglaei chiple phalini tlung tlainiyei rawainung Umpuei Ralthutpinei Kneitang markhullou.”

Phri Sikmak Kneitang Markhul

⁶ “Heitoubi tangla heihakyei chiple phangani tlung tlaini heiri Umpu'nung phri sikmak mumtollei Kneitang markhulnei tlaini hoirou; heitoubi tlaini eninibil phri sikmak mumtol shairou.

⁷ Heirou lamkri tlainirou nani Khyingei Kneitang khat markhullou; tlaini heirouri nani koulhou khatkhi churnungei yamakrou.

⁸ Heiya nani tlaini eninibil Umpu'nungei khrumnaput meira hongbini makatrou. Enini tlung tlaini heiri khyingei Kneitang markhulnei tlaini hoirou da; heininungri nani koulhou khatkhi churnungei yamakrou.”

Trunwai Hutlha Hei Makatnei Knei

⁹ Heirou Umpune Moses'nung asitoubi kyun:

¹⁰ “Israellei thimi rapnung shunbi, yanungei asitoubi yunpilak: Keine nanungei piroukyou ramra nani wachangbi, heirou nani trunwai lukeinungri, trunwaiyei lung lamkriyei hutlha hei saphalrap heiri nani Suipipuei hutra heipilhaklak.

¹¹ Heirou Suipipuni trunwai saphal heiwaya Umpuei maibongra louthinglhakpirou; heiyanungri naiyei makatput heiwaya loulhakpirou. Suipipuni makatput heiwaya Sabbath nithangei tlainirou thinglhakpirou.

¹² Heirou nani trunwai hutlhahei saphalya thinglhakninung, kumkhat phakur mseimak yaoshun pa khat meira hongbini Umpunungei makatrou.

¹³ Heitoubi trunwai lungei yamkhi ephah khatrei siruk chipbei siruk khni, shirekle mankonbi, meira hongbini khrim muiknam makatput khoini Umpunungei makatrou; heirou mongnungei darkha yuikhi til khatdei siruk phalikhi kyaoni makatrou.

¹⁴ Heitoubi heiyei tlainirou nani Dunpunungei khrumna put rapya makatchibongyenri, mumtolkhi shainung yamakrou, trunwaiyei lung khminkhi heirou khringkhi chamainung yamakrou; awari nairamra paalbi klei naiyei yu-cha rapbei chaanserrou lakkhounung yamak chaylamrap.”

Charan Martamnei Kneitang

¹⁵ “Heirou nani Sabbath ni'thangei tlaini, trunwai hutlha rapya thinglhakbi makatnei tlaini hillou waiyoubi, ni'kansherbi Sabbath enini tlungyerrou.

¹⁶ Enini tlung Sabbath tlainiyei thang nikansherbi, somngani tlung tlainirou, Umpunungei nani rannei trunwaiyei lung makatputya makatrou.

¹⁷ Nane lamkri trunwai hutlha hei makatput khoini, nainaiyei leinabi cheem kantangei Ephah khatrei yam siruk chipbei siruk khni holthutbi, phri shiklhakbi sheemkur mumtol tumkhni Umpuei bomra makatrou.

¹⁸ Heitoubi nani mumtolle kalhonni, mseimak kumkhat phakur yaoshun pa enitamle, halshun pa khat heirou yaopa khintamle toubi makatrou da; anrap heiri trunwaiyei lung makatput raple, darkhayui makatput raple kalhonni meira hongbini khrim muiknam makatput khoini Umpunungei makatrou.

¹⁹ Heitoubi nani tlangshun pacha khatkhi borhnung'tlim makatput khoini, heirou kumkhat phakur yaoshun pacha khintamkhi malung pilyernanungei makat putrap khoini makatrou.

²⁰ Heirou Suipipuni heirapya trunwaiyei lung hutlharei mumtol raple kalhonni thinglhakbi makat putkhoini Umpuei maibongra makatrou. Makat putrap heiri Suipipu rapnungei Umpuei bomra khyingei makatput hoirou.

²¹ Tlaini heihakrou nani khulpaobini, khyingei Khulbung Kartil khat markhullou; heininungri nani koulhou khatkhi churnungei yamakrou; heiri naiyei ramra paalbi klei thimi chaanserrei lakkhounungei yamak lammit khat hoirou.

²² Heirou nani naiyei ramra trunwai lukyeinung, naiyei louyaorei trunwairap heiri loukum ri-karchunna ram phani aatlounung yamakrou; heirou trulkur chakao ramphakhi khumlounung yamakrou; heirapri nani kanring-kanwai rapnungei, heirou miram-mithrillei thimi rapnungei horkhoupirou; ngamri Keiri Dunpu, naiyei Umpu.”

Tangla Heideniyei Pengkul Khungnei Knei

²³ Heirou Umpune Moses'nung asitoubi kyun:

²⁴ “Israellei thimi rapnung asitoubi shunpilak: ‘Tlun'eni tlung tanglaei, lamkri tlainirou, nani mathrilnei tlaini Sabbath ngaaklak, tlaini heirouri ningthutnanungei Pengkul khungbini, khyingei Khulbung Kartil khat markhullak.’

²⁵ Heiyei tlainirouri nani koulhoukhi churnung yamakrou; heiya nani Umpu'nungei meira hongbini khrumnaput makatrou.”

Lhukthutpinei Kneitang Lhun

²⁶ Heirou Umpune Moses'nung asitoubi kyun:

²⁷ “Tlun'eni tlung tanglaei chipni tlung tlainiroukhi Lhukthutpinei Tlainiyei Kneitang lhunnei hoirou; heiri nanungei Khying Khulbung Kartil'ni khat markhullou; heininungri nani chara yilbini, heitoubi makatput khat Umpunungei meira hongbini makatrou.

²⁸ Heitoubi heiyei tlainirouri nani koulhou khatkhi churnung yamakrou; ngamri tlaini heiri Lhukthutpinei Tlaini khat; heininungri naya lhukthutpinei Puwatlhou khoini Umpu, naiyei Dunpuei bomra khrumnaput makatrou.

²⁹ Kouweiyo toulanungri, tlaini heirouri chara yilbini lanimak thimi heiyari aithimi rapbei hangrouwei hulthutdurou.

³⁰ Heirou thimi hukounak khatni heininung koukou watlhou churkur yaowanungri, heinaksi thimiyari aithimi rapbei hangrouwei Keine louthutdurbi mangyerrou.

³¹ Nane koulhou khatkhi churnung yamakrou; awari nairamra paalbi klei thimi chaanserrei khoini lakkhounungei yamak chaylam khat hoirou.

³² Tlaini heiri nanungei mathrilna Sabbath hoirou; heininungri nani chara yilbini klah dourou. Tangla heiyei takoni tlung tlainiyei rawainung waiyoubini thangei rawai'phani nani Sabbath Knei waiyourou.”

Pucheem Lhun'nei Kneitang

³³ Heirouri Umpune Moses'nung asitoubi kyun:

³⁴ “Israellei chanao rapnung shunbini asitoubi yunpilaklo: Tlun'eni tlung tanglaei chiple-phanga tlung tlainirou waiyoubini tlaini eninibil Umpunungei Pucheem Kneitang lhunrou.

³⁵ Heirou lamkriyei tlainirou Khyingei Khulbung Kartil khat markhullou; nani tlaini heirouri koulhou khatkhi churnung yamakrou.

³⁶ Tlaini eninibil nani Umpunungei meira khrumnaput hongbini makatrou. Heirou chotni tlung tlainirouri naiyei Khyingei Khulbung Kartilnei tlaini hoirou; heininungri nani meira hongbini Umpunungei khrumnaput makatrou. Tlaini heiri Khyingei Khulbung Kartil luilhaknei tlaini; heineri heininungri nani koulhou khatkhi churnung yamakrou.

³⁷ Kyun heirapri Umpuei kartinpikur Kneitangrap; kartinpikur trumrou nani khulpaobini Khyingei Khulbung Kartilnei Kneitangya lhunrou; heitoubi heiyei tlaini raprou nani Umpunungei meira pumni hongbini makatnungei trunwaiyei lung makatput, khrumnaput, heirou darkha yui makatput rapya tlainiserrei thangknaini makatrou.

³⁸ Makat putrap heiri nani Umpuei Sabbath tlainiyei makat putrap, naiyei hutthul putrap, naiyei tlou kantomya tlungyerna'nungei makat putrap, ukningra pi'kniyei pikur makatput rapbei doura heirapya nani makatrou.

³⁹ Heirou tlun'eni tlung tanglaei chiple-phangani tlung tlaini'roukhi, nani louyaorei trunwai lungya lukmarkummei kheenrou, nani tlaini eninibil Umpunungei Kneitang khat markhullou. Lamkriyei tlaini heiri Sabbath hoirou, heirou chotni tlung tlaini heiwakhi Sabbath hoirou.

⁴⁰ Heitoubi lamkri tlainirou nani lhangai heengtrungrei nburya deekloubi, kangwoi ban rapkhi khriploubi, heirou heeng'nbur lhangaiya deekloubi, heirou kungpallei heengpar rapya deekloubine, Umpu, naiyei Dunpuei maibongra nani tlaini eninibil houklumni knei lhunrou.

⁴¹ Heirou nani kumkhatdei rilla Umpunungei tlaini eninibil Knei lhunrou. Awari naiyei chaanserrei lakkhounungei yamak lammit khat hoirou. Nane tlun'eni tlung tanglaei rilla Knei lhunrou.

⁴² Heirou nani matru sabini tlaini eninibil heiyei rilla yarekrou. Israellei cheemkhur bommaira puklhakkur thimirap nammani matru rilla yarekbi leirou.

⁴³ Ngamri naiyei yu-charap nammani mulaksu touri Keine Israellei chanao rapya Egyptbei ramrei ruithutlouyei kheenrou, yani matrura yarekkhou. Ngamri Keiri naiyei Dunpu, Umpu.”

⁴⁴ Heisitoubi Moses'ne Israellei thimi rapnungei Umpuei Kneitang rapya paothutbini shunpikur.