LEVIYA 20 - KHYINGEI PU'TLOU Bible (BSI)Borhlhou Tounei Tanti 1 Heirouri Umpune Moses'nung asitoubi kyun: 2 “Hanuikhi nangni Israellei chanao rapnungei asitoubi shunpithulak: Israellei thimi hukounak khatni, nimanung Israellei ramra ramtangbi klei miram-mithrillei thimi hukounak khatni, aiyei chanao raprei napung'khatya Molech thrainungei makatlanungri, ayari hatrou da; heirou ram heiyei thimi rapni ayari thlungni nanghatrou da. 3 Heirou Keimsha'hakni heinaksi thimiya karhani mayungrou, heitoubi ayari aiyei thimi raprouwei louthutdurbi mangyerrou; ngamri ani aiyei chanao raprei napung khatya Molechnungei makatbini, Keiyei Khyingei Bomya borhyerwurla, heitoubi Keiyei Khyingei Minya rikrai phayerwurla. 4 Heirou kounakpi ram heiyei thimi rapni napawa heiwani aiyei chanao raprei khatya Molech'nungei makatyeinung, yaiyei mitni muthungrerikhi, aya hatmakni yulkhoulanungri, 5 Keine thimi heiyale, aiyei bommaiyei maibongra karhani mayungbini, aiyei thimi raprouwei louthutdurbi mangyerrou; heirou ale kalhonni Molech thrai khrumbi chorit naimakei lhouya toubi klei thimirap namyakhi Keine tlumni mangyerrou.” 6 “Heirou kounakpi thimi rapni thuitounara heirou meirui thinara chanthungbi, chorit naimakei lhouya toulanungri, heinaksi thimiyari Keine karhani mayungrou, heitoubi aiyei thimi raprouwei aya louthutdurbi mangyerrou. 7 Ngam heineri naitamne marthingthutbi, khying thimi khoini kanshangthutlak, ngamri Keiri naiyei Dunpu, Umpu. 8 Heitoubi nani Keiyei chaylam rapya kngaakni heirapya hil-chanthungbi lhou toulak: Ngamri Keiri naya kanshangthutyerbi marthingthutpikur Umpu. 9 Kounakpi thimi hukounak khatni aiyei paya nimanung aiyei puiya mancho thimiyari hatdurou; ngamri aiyei pui-paya manchonei mralri aidoura yongdarou.” 10 “Heirou kounakpi napawa khatni aiyei cheemlhunrei minu khatya chorit naimakni daimareklanungri, heinaksi chorit naimak napawale napuiya heiyari hinei tanti pirou da. 11 Heirou napawa khatni aiyei pawaei nule rkhum iptillanungri, aiyei pawaei rkhum touborhwurla; heiyanungri yakhunta'rekya hinei tanti pirou da, ngamri yai mshaei mral heiri yai doura yongdayerwurla. 12 Kounakpi napawa khatni aiyei mouwile rkhum iptillanungri, yakhuntarekya hinei tanti pirou da; kouweiyo toulanungri, yani rkhum touborhwurla; heineri yai mshaei mral heiri yai doura yongdarou. 13 Kounakpi napawa khatni, napuiya khatle rkhum phitho iptilnaksini, napawa khatle phitho iptillanungri, yakhuntarekpani machin'knaei chorit naimak lhou touwurla; heiyanungri yakhurekpaya hinei tanti pirou da; ngamri yai mshaei hee heiri yai doura yongdarou. 14 Heirou kounakpi napawa khatni nu khat loubi, heitoubi aiyei nuyei puiwiyakhi loulanungri, heiri karha'kna chorit naimaknei lhou; yakhunta rekya meira hongurou da; heiyanungri naihangra heinaksi chorit naimaknei lhouri makarou. 15 Heirou kounakpi napawa khatni ui-waale chorit naimakni tilrillanungri, ayari tanti pirou da; heitoubi nani ui-waa heikhi hatdurou da. 16 Heirou kounakpi napuiya khatni ui-waa khatdei maibongra tonphabi, chorit naimakni tilrillanungri, nani napuiya heiyale heirou ui-waa heiyakhi hatdurou da. Ngamri ya heiri hinei tanti phabomthuk, heirou yai mshaei hee heiri yai doura yongdarou.” 17 “Heirou kounakpi napawa khatni aiyei pawaei chanapuiya, aiyei charwiya, nimanung aiyei puiwiyei chanapuiya khatya loubi rkhum iptillanungri rikraiknaei chorit naimak lhou; heiyanungri yakhunta rekya yai thimi rapbei mit'thrilnarouwei louthutdurou da; ngamri ani aiyei charwiya rikraiknaei rkhum phithoya iptilwurla: Ane aimshaei mralya urrou da. 18 Heirou kounakpi napawa khatni, napuiya khatya aiyei tanglaei par chayei kheenrou rkhum iptilbi phitho tilrillanungri, napawa heini napuiya heiwiyei parchanei hee shunya mulhakkurla, heirou napuiya heinikhi aiyei borh chaya napawaya muyerwurla; heineri yakhunta rekpaya yai thimi raprouwei hulthutdurou da. 19 Heirou nangni neipuile pukmalkna teinaole rkhum tilrilnungei yamakrou; nimanung neipayei pukmalkna charwile rkhum tilrilnungei yamakrou; kouweiyo toulanungri, yarap heiri neiyei uwacha, heirou neiyei ninee. Yarapya rkhum iptillanungri heiyei mral heiri yai doura yongdarou. 20 Heirou kounakpi napawa khatni aiyei patullei nule rkhum tilrillanungri, napawa heiri aiyei patullei rkhumya touborhwurla; yaiyei borh mralri yaitam urcharou; heitoubi yari chanao tlamakni hirou da. 21 Heirou kounakpi napawa khatni aiyei teinaowei nuya loulanungri, heiwari machinknaei lhou; ngamri ani aiyei teinaowei rkhumya touborhwurla; yarap heiri chanao tlamakrou.” 22 Umpune shunlei: “Ngam heineri, Keiyei chaylam rapya heirou Keiyei Ayillei lammitrap nammaya baimakni ngakbi lhou toulak; heiyanungri Keine naya palnanungei yenruilhakur ram heirouwei naya hulthutdurmakrou. 23 Heirou Keine nai maibongrei hulthutloukur lim rapbei touwurkhou chorit naimak lhou rapya nani tounungei yamakrou; ngamri ya rapri heinaksi chorit naimakei lhourap nammaya toukhou; heitounei ngammei yayari Keine machinkna. 24 Heiya Keine nanungei shunpila: ‘Nane yai ramra paalrouwa, heitoubi naiyei palnanungei ram khoini, nushung-yuile khuining kanchirsundana ramya nanungei Keine silnarou; Keiri naya limdei raprouwei laini khalthutdurpi Umpu, naiyei Dunpu.’ 25 Ngam heineri, nani khying yaale borh yaa rapbei karlhikril, heirou borh yoo-waa'le khying yoo-waa rapbei karlhikrilya mulak, heitoubi Keine nairouwei borhme toubi khaithutkur ui-waa, yoo-yaa rapni, heirou thleira ukni tulcha chiwi rapni nai ukning borhyermak. 26 Heirou nani Keiyei bomra khying thimi hoirou da; kouweiyo toulanungri, Keiri Khying Umpu, heirou limdei raprouwei naya khaithutdurla; heineri nari Keiyei thimirap hoirou da.” 27 “Napawa khatya hoiyasu, nimanung napuiya khatya hoiyasu, lhangaimak meirui khingthi thimi hoiyanungri, ayari hinei tanti pirou da; yani heinaksi thimiyari thlungni nanghatrou da; ngamri yai mshaei mral heiri yai doura yongdarou.” |
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
Bible Society of India