LEVIYA 14 - KHYINGEI PU'TLOU Bible (BSI)

Hak'unrei Raichipaat Marthingthutnei Lammit

¹ Heirouri Umpune Moses'nung asitoubi kyun:

² “Raichipaat thimi khatya marthingthutninung chanungei lammit rapri asitoubine leilei: touri raichipat thimiya Suipipuei bira heiruilhakrou da.

³ Heitoubi Suipipuni yulthungei palshung pura wathukrou, heitoubi ani raichipaat thimi heiwaya yrothipirou; heirou kounakpi raichipaat thimi heiwani aiyei raichipat heiwani dammuranungri;

⁴ Suipipuni raichipat thimi heiwaya marthingthutnanungei chay pibi, khying waa khring khintamle, Cedar heengbanle, phai-mrao yengkhatkhi heirou hyssop nbur khatkhi marshiknungei shunpirou da.

⁵ Heirou Suipipuni yanungei chay pibi, waa khring khatya thleiphu khatdei rilla lhakbini, heitoubi kungra chanbi klei yuidoura hatnanungei shunmatupilak.

⁶ Heitoubi Suipipuni himak waa heile kalhonni Cedar heeng nburle, phai-mrao yengkhatle heirou hyssop nbur khatkhi shinmalhonbi, heitoubi kungra chanbi klei yuidoura hatkur waa heera waakhring heiwaya namluprou.

⁷ Heitoubi raichipat marthingthutrou kyou thimi heiwanungei enibuirek thingphangrou; heirouri Suipipuni aya marthingurame toubine paothutpirou; heitoubi waa'khring heichaya ramhangra khringni malhetdurou.

⁸ Heirouri raichipat marthingrou kyou thimi heiwani aiyei phirul shumthairou; heirou aiyei lurei shamkhi namma ngoumthaiwurou; heitoubi aimshakhi yuira hakchoumathairou; heiyanungri a heiri marthingrouwa; heiyei hillouri ani yultlai rilla hungchang yarou, heiya cheemwairari hungchangmakni pura tlaini eninibil leirou da.

⁹ Heiya enini tlung tlainirouri ani aiyei lurei shamkhi namma, murkhmulkhi namma, mkha kmulkhi namma heirou sharungrei hakhmul nammakhi ngoumathairou da. Heitoubi aiyei phirul rapkhi shumathaiwurbi, heirou yuira hakkhi choumathairou da; heiyanungri a heiri marthingrouwa.”

¹⁰ “Heitoubi tlaini chotnirouri ani mseimak yaoshun pa khintamcha loubine, heirou kum khatdei yaoshun mseimak puicha khatkhi loubine, heirou tsaikun lhangai Ephah khatdei krungkok khyumtam shukloubine shirek mankonbi, heirou shirek tungka khatkhi shorloubi marshikrou.

¹¹ Heirou Suipipuni raichipat marthingnungei thimi heiwale, putcheirap heile kalhonni Khulbung Kartilna Pucheemyei shumtrumra Umpuei maibongra lhathutrou.

¹² Heitoubi Suipipuni yaoshun pa raprei khat loubine, shirek tungka khat heile kalhonni, borhnung'tlim makatput khoini Umpuei maibongra thinglhakbi makatrou da.

¹³ Heitoubi Suipipuni yaoshun heichaya borhnung'tlim makatnungei anle, meira pumni hongnungei makatput hatna Khyingei bira hatrou. Kouweiyo toulanungri, mral kuknanungei makat putnaksini, borhnung'tlim makatput heikhi Suipipuei siruk hoirou, ngamri an heiri yerrouwei hyingdui makat putkhat.

¹⁴ Heirou Suipipuni mralnung'tlim makatput heiyei hee tha loubine, heitoubi raichipat marthingrou kyou thimiyei thyarei khnabil bungrale, aiyei thyarei hutpui bungrakhi, heirou aiyei thyarei hopui bungrakhi Suipipuni teiphaangpirou.

¹⁵ Heitoubi Suipipuni tungkarei shirek thacha aiyei hutmaira shungthutrou.

¹⁶ Heirou aiyei thyarei hutmayungni aiyei thyoirei hutmai dourei shungthutkhou shirekra thunlupbini, heitoubi aiyei hutmayungni shirek thacha Umpuei maibongra enibuirek thingphaangrou.

¹⁷ Heitoubi Suipipuni aiyei hutmairei maleithung shirek namma heiri raichipat marthingrou kyou thimiyei thyarei khnabil bungra beicha, heirou aiyei thyarei hutpui bungra beicha, heirou aiyei thyarei hopui bungrakhi beicha teiphaangpirou, heitoubi mral kuknanungei makatputyei dourakhi thacha teiphaangrou da.

¹⁸ Heitoubi Suipipuni aiyei hutmairei maleithung shirekrap heiri raichipat marthingrou kyou thimiyei lura namma teiphaangpirou. Heisitoubi Suipipuni thimi heiwaya Umpuei maibongra aya kukpinanungei Puwatlhouya toupirou.

¹⁹ Heithangrou Suipipuni borhnung'tlim malanputya makatbi, raichipat marthingrou kyou thimiya aiyei borh'rouwei kukpinanungei Puwatlhouya makatrou. Heihillouri ani meira pumni hongnungei makatput anya hatrou.

²⁰ Heitoubi Suipipuni meira pumni hongnungei makat putle trunwaiyei lung makatput raple khrahpal doura makatrou. Heisitoubi Suipipuni aya kukpinei Puwatlhou toupirou, heitoubi aya marthingyerpirou.”

²¹ “Heiya kounakpi ani makatput heinakbil chungni urthut manemakanungri, ani yaopacha khatle, mral kuknanung'tlim thinglhakbi makatnungei, heirou trunwaiyei lung makatput khoini tsaikun lhangai Ephah khatrouwei krungkok chiptam thuknarei krungkok khatle shirek mankonbini, heirou shirek tungka khatle toubi urthutrou da.

²² Heitoubi aiyei urthut manicha ram mathru khintamkhi, nimanung cheem'mathru khintamkhi urthutbi, khatchari borhnung'tlim makatput khoini, heirou khatchari meira pumni hongbi makatnungei put khoini makatrou da.

²³ Heitoubi tlaini chotnirou thimi heiwani aya marthingnanungei putchei rapya marshikthutrou, heitoubi Khulbung Kartilna Pucheemyei shumtrumra Suipipunung heilhakbini Umpuei maibongra makatrou.

²⁴ Heirouri Suipipuni mralnung'tlim makatput yaoshunya loubine, heirou shirek tungka heikhi loubine, heitoubi Suipipuni Umpuei maibongra yerrouwei dui makatput khoini thinglhakbi malanlhakrou.

²⁵ Heirouri Suipipuni mral kuknanungei makatput yaoshunya hatbini, heitoubi ani mral kuknei makat putrei hee tha loubine, heirou raichipat marthingrou kyou thimiyei thyarei khnabil bungrale, aiyei thyarei hutpui bungrakhi heirou aiyei thyarei hopui bungrakhi teiphangpirou da,

²⁶ Heitoubi Suipipuni aimshaei thyoirei hutmaira shirek thacha shungthutrou.

²⁷ Heitoubi Suipipuni aiyei thyoirei hutmairei klei shirek heiwaya aiyei thyarei hutmayungni thunloubine, enibuirek Umpuei maibongra thinglhakrou.

²⁸ Heitoubi Suipipuni aiyei hutmairei shirek heiwaya thacha loubi, mralnung'tlim makatput yaohee teiphangna bi rapra touri, raichipaat marthingrou kyou thimiyei thyarei khnabil bungrale, thyarei hutpui bungrakhi, heirou thyarei hopui bungrakhi beibeicha teiphaangpirou.

²⁹ Heitoubi Suipipuni aiyei hutmairei maleithungbi klei shirek namma heiri raichipat marthingrou kyou thimiyei lura ani teiphaangurou; heisitoubi aya Umpuei maibongra borh kukpinei Puwatlhou toupirou.

³⁰ Heisitoubine thimi heiyei manicha ram mathru khintam, nimanung cheem'mathru khintamcha urthutbini;

³¹ heitoubi thimi hukhatni urthutbi borhnung'tlim makatput khoini, heitoubi khatni meira pumni hongbi makat put khoini, trunwailung makat putle kalhonni makatrou da. Heisitoubi Suipipuni raichipat marthingrou kyou thimi heiwaya Umpuei maibongra Puwatlhou toupibini aiyei mralya kukyerrou.

³² Heisitoubi raichipat marthingna'nungei makatput lammit tlungni urthutchangmak thimi heinungeiri thakrei kyun lammitrap heiwani kya.”

³³ Heirou Umpune Moses'le Aaron'nung asitoubi kyun:

³⁴ “Keine nairam hoinungei piwurkhou Canaan ramra nani wachangei kheenrou, ram heitamrou louklei nani leiroukyou cheemrilla Keine raichi paatnei blang chuyerbi khourou.

³⁵ Heiyanungri cheem heirapya pu khoini waleikur thimi heiwani wathukbini, ‘Kei thinarari keileina cheemwaira raichi patnei blang chunaksi muleime,’ toubine Suipipu'nungei washunrou da.

³⁶ Heirouri Suipipuni cheem heiyei rilla wachangbini yrothibongnung, yaya cheemwai heirouwei putchei namma mansangthutnungei chay pirou da. Heiyanungri cheem heirouwei klei thimirap nammaya borhwurame toubi paothutmakrou. Heihillouri Suipipuni cheemwaira wachangbini yrothirou da.

³⁷ Heitoubi ani blangchu heiwaya yrothibi, kounakpi raichi patnei blangchu heiwani cheem heiyei raapthang doura mar'emsotni nimanung mraosotni hutlha dabi louleiyanungri, heirou raapthangra yuklhakbi leiyanungri;

³⁸ heirouri Suipipuni cheemwai heirouwei wathukurbi, heitoubi cheem heiri tlaini eninibil cheemkhar thungphopbini khourou da.

³⁹ Heitoubi Suipipuni enini tlung tlainirou hanui kallengbi wabi yrothithurou; heirou kounakpi cheem heiyei raapthangrei raichi blang heiri deirakhi heikaryoubini louleiyanungri;

⁴⁰ Suipipuni yaya chay pibini blangchubi klei raapthangei thlung heiri phongthutyerbi, heitoubi yani thlungrapya khukarthillei palshung pura borh khingthutna bira khingthutdurou.

⁴¹ Heirou ani shunbi cheemwairei raapthang thlei teibaangkur heiri namma khoksundayerrou, heitoubi raapthangrei khoksundakur thleikunrap namma heiri khukarthillei pura yani borh khingna bira shungthutdurou.

⁴² Heitoubi yani thlung deirapya loubine, heitoubi hallei thlung phongthutdurna bira hanui marchallhakrou, heitoubi thleibul ranya loubine cheem heiwaya raapthangra hanuikhi teibangthurou.”

⁴³ “Heirou cheem heirouwei raapthangei thlung putthutdurbi, thlei teibangkhi khoksundawurbi, hanui thlei teibangkur hilloukhi hanui raichi blang chuyouthuwa'nungri;

⁴⁴ heirou Suipipuni wabi yrothirou, heitoubi kounakpi raichi patnei blang heiri cheemwai bi deirakhi heikaryoubi louleiyanungri, blang heihakri thimi rakhi popkur kya raichiyei blang hoiyura. Heiwari hyingmak cheem khat hoiyura.

⁴⁵ Heiyanungri ani cheem heiwaya thresundawurbi, raapthangei thlungkhi, heengro rapkhi, heirou raapthangrei thlei teibang nammakhi khoksundawurbini, heitoubi heirapya khukarthillei palshung pura borh horna bira theithutbini khingurou da.

⁴⁶ Heiyakhi duinara thimi huhuni cheem heiwaya thungphopbi khouyeinung rilla wachangkur yaowanungri, heithimi heiri rawai phani borhwurnei mantreh ngeirou da.

⁴⁷ Heirou huhuni cheem heiyei rilla iplhakkur yaowanungri, ani aiyei phirul rapya shumthaiyurou da; heirou kounakpi huhuni cheem heiyei rilla chamaikur yaowanungri, ani aiyei phirul rapya shumathairou da.”

⁴⁸ “Heiya kounakpi Suipipuni cheem heiyei rilla wachangbi yrothinarou, cheem heiwaya raapthang ranni teibaangkur hillouri, raichi paatnei blang heikaryou'makanungri, cheem heiri hyingurame toubi Suipipuni paothutrou. Ngamri raichi blang heiri kanchaiyura.

⁴⁹ Heirouri cheem heiwaya marthing'thutnanungei ani waa khintamle. Cedar heengle, phai-mraokhi heirou hyssop heeng nburkhi loubine marshikrou da.

⁵⁰ Heitoubi ani waa khatcha heiri thleiphu rilla lhakbini, heitoubi chanbi klei yuikhying doura hatrou da.

⁵¹ Heirou ani Cedar heengle, hyssop heeng nburle, heirou phai-mraoya loubine, heitoubi waa khringle pulni shinmalhonbini, chanbi klei yuikhying doura hatkur waaei heera namluprou; heitoubi cheem heiyei rilla enibuirek thingphangrou da.

⁵² Heisitoubine cheem heiwaya ani waa heele, yuidingle, waa khringle, Cedar heengle, hyssop nburle heirou phai-mraole toubine marthingthutrou da.”

Raichi Blangchuya Marthingthutnei Lammit

⁵³ “Heirouri ani waa khring heichari khukarthillei palshung pura ramthingra malhetrou, heitoubi cheem heiwaya marthingthutnei Puwatlhou toubine, mral kukyerrou, heitoubi marthingthutrou.”

⁵⁴ “Awari koukou raichi patnei takpop, heirou lipthuknei mseiya raiyernanungei lammit'thil.

⁵⁵ Phirul-phishambra raichi popbanungkhi, nimanung cheemwaira raichi patnei blang chuwanungkhi.

⁵⁶ Nimanung hak'unra rchung heiporthutda'nungkhi, nimanung raapthangra yenkhoksundawa'nungkhi, nimanung patna mseira heingouwa'nungkhi;

⁵⁷ heirapya yrothibi marmokna borhme nimanung borhmakme toubi shunmatupina'nungei lammit hoirou. Heirapri raichi patnei mu'kna lammitrap.”