LEVIYA 11 - KHYINGEI PU'TLOU Bible (BSI)

Khying Anchum Heirou Marmokkur Anchum

¹ Umpune Moses'le Aaron'nung shunbi atoubi kyun:

² “Israellei chanao rapnungei atoubi yunpilak: Tlaipangpallei klei ui-waa nammaei hangra maikya ui-waa rapri:

³ Ho'mathin khintam karkhai ui-waa raple heirou ukchak malletthutbi shaikyun ui-waa touwei'mkheiri nani mai kya.

⁴ Heisiya hoiyanungkhi, ui-waa rapbei hangra ukchak malletbi shaiyunna'nungkhi, nimanung ho'mathin khintam karkhaima'nungri kmai yamak ui-waarap thakhi klei; heineri Utri mai yamakrou, ngamri Utri ukchak malletbi shaiyunbikhi, ho'mathinri karkhaimak, heineri heinaksi ui-waarap heiri nanungei Puwatlhou'ranungri hyingmak ui-waa khat.

⁵ Heirou simulrangkhi kmai yamakrou, ngamri yaa heiri ukchak malletbi shaiyunbikhi, ho'mathinri karkhaimak, heineri heinaksi yaa heiri nanungei hyingmak yaa khat.

⁶ Heirou theowachakhi, ukchak malletbi shaiyunlanungkhi, ho'mathinri karkhaimak, heineri nanungei heinaksi yaakhi hyingmak yaa khat.

⁷ Heirou hogkhi kmai yamakrou, ngamri aiyei ho'mathin karkhaiyanungkhi, ukchak malletthutbi shaiyunmak, heineri heiwakhi hyingmak ui-waa khat.

⁸ Heitoubi yaiyei anchum rapkhi nani mainungei yamakrou, heirou yai metu rapkhi naihutne palbi churnungei yamakrou, ngamri heirapri hyingmak anrap.

⁹ “Yuirei klei chiwi rapbei hangrei nani mai kyari: Kungrei klei heirou Samadrurei klei treh kyao, heirou lipthuk thangarap touwei'mkheiri nani mai kya.

¹⁰ Heiya kungrei nimanung Samadrurei rulkhoini klei thangaya hoiyanungkhi, nimanung ringbi klei chiwi rapbei hangrouwei hoiyanungkhi, treh yaomak heirou lip thukmak chiwi rapri nanungei machin'kna chiwi rapme.

¹¹ Yarap heiri nanungei machin'kna putrap, heineri nani yaiyei sharung rapya mainungei yamakrou; ngamri yaiyei metu khirap heiri nanungei machin'kna anthil.

¹² Yuirei klei treh yaomak heirou lip thukmak chiwirap namma heiri nanungei machin'kna putthil.

¹³ “Heirou ramwaa rapbei hangrakhi nanungei machin'kna waa rapkhi leilei; heinaksi machin'kna waa rapri nani mainungei yamakrou; waarap heiri malaang, laangteya heirou malaang-khmong;

¹⁴ malaang-mrao, heirou makhaolim deideikhi mainungei yamakrou.

¹⁵ Heitoubi aak heirou aaknaksi waalim deideikhi mainungei yamakrou.

¹⁶ Ostrich, tikini, makhao, yuidourei klei waarap, heirou makhaolim deideikhi;

¹⁷ heirou ansaleng, yui'waanu, heirou hallok.

¹⁸ Heirou yuirei klei waa limrap, yuirei waanu murkhyangrap, heirou laangteya;

¹⁹ heirou hoshaang yui'waarap, wainu heirou heiyei waalim deideikhi, heirou shangkhla-waa heirou baak limkhi mainungei yamakrou.

²⁰ “Heirou trainanungei sha klei heirou ho phalitam'rekni karwaicha chiwirap namma heikhi nanungei machin'kna chiwirap.

²¹ Heisiya hoiyanungkhi, trainanungei sha kyao, ho phalitamni karwaicha chiwi rapya hoiyanungkhi, thleira chunnanungei hochim kyao chiwirap heiri nani mai kya.

²² Naiyei maikya chiwirap heiri: Khaorul touwei'mkhei, khungwai, heirou khaothao rapri mai kya.

²³ Heiya arouwei mintlangmak traichana sha kyao heirou ho phalitam klei chiwirap deideiri nani mainungei yamakrou.

²⁴ “Heitoubi heinaksi chiwi rapbei hikur metuya huhuni churkur yaowanungri, heinaksi thimi heiri rawai'phani marmoknei mantreh ngeirou da.

²⁵ Thimi huhuni heinaksi metukhiya churbini khulloukur yaowanungri, a heiri aiyei phirul rapya shumathairou da; nimanungri a heiri rawai'phani marmoknei mantreh ngeirou da.

²⁶ Heirou chiwi heini ho'mathin lhanganungkhi, heiwa karkhaimakanungri, nimanung ukchak malletmakanungri, heinaksi ui-waarap heiri nanungei machin'kna ui-waarap; heineri huhuni heinakya palkur yaowanungri, a heiri marmokura.

²⁷ Heitoubi ramyaa rapbei hangra hutmai-homai phalitam'rekni nambini karwaicha chiwirap heiri nanungei borh yaa; heinaksi yaa rapbei khilhung metuya palkur thimi heiri rawai'phani marmoknei mantreh ngeirou da.

²⁸ Heirou huhuni heinaksi metu anya palkur thimi leiyanungri, ani aiyei phirul-phishamb rapya shumathairou da; heitoubi a heiri rawai'phani marmokkurnei mantreh ngeirou da, ngamri meturap heiri nanungei marmokna.

²⁹ “Thleira ukni tulcha chiwi rapbei hangra nanungei marmokna borh yaalim rapri: tir-rpuk, rpuk lim, heirou simkungei lim deideikhi mainung yamakrou.

³⁰ Heirou ritchee-thrunnuwa, yangrui, tangkong, shol, heirou lamto-rpuk.

³¹ Thleira ukni tulcha chiwirap nammarou kyunrap heiri nanungei marmokna yaa'limthil: Hei rapni hiyanung huhuni churlanungri, a heiri rawai'phani marmoknei mantreh ngeirou da.

³² Heirou koukou putchei khatdei doura heinaksi chiwi khi khat dabanglanungri, put heiri marmokkura, touri heengei sheemkur putya hoiyasu, nimanung phirulya hoiyasu, nimanung an'unra hoiyasu, nimanung phaikhring phira hoiyasu, nimanung koukou watlhoubom khatra yrengnungei sheemkur putchei hoiyanungkhi, heinaksi putcheirap heiri yuira tingbini khourou da; heitoubi rawai'phani marmokurnei mantreh ngeibini marthingthutrou da.

³³ Heitoubi kounakpi heinaksi khi khatni thleiyei phuwan khatdei doura dabanglanungri, thleiphu heiyei rilla klei put rapkhi namma marmokrou, heitoubi thleiphu heiri nangni khingchallurou da.

³⁴ Heirou heinaksi marmokkur thleiphurei yuiding heiwani koukou chamainungei putchei doura daphanglanungri, putchei heiri borhwura; heitoubi heinaksi phuwan raprei shunglhakkur mongnungei yuiding namma heikhi yuiborh hoiyura.

³⁵ Heitoubi heinaksi anborh lhakna phuwan rapni dunbaangbi thirrilkur putchei rapkhi namma borhwura; heinaksi marmokkur meiphuya hoiyanungkhi, nimanung yuikhangya hoiyanungkhi namma deekbaiyurou da; ngamri yarap heiri borhwura, heineri nanungei marmokna putchei khoini nani lourou da.

³⁶ Heisiyanungkhi, yuiso-yuiphum, nimanung yuitom khang tangnara palrilkur hoiyanungkhi marmokmakrou; heiya huhuni heinaksi ankhiya pallanungri a heiri marmokrou.

³⁷ Heirou kounakpi watuknungei samathaibi khoukur trunwai mti'lung doura heinaksi an'khini dabangbi thirlanungri, mti'lung heiri marmokmakrou.

³⁸ Heiya mti'lung heiri watuknungei yuira chukbini khoukur hillou, heinaksi an'khini dabangbi thirkur leiyanungri, mti'lung heiri nanungei marmokkura.

³⁹ “Heirou kounakpi naiyei maikya ui-waa khat hiyanungri, heinaksi ankhi metuya thimi hukounak khatni pallanungri, thimi heiri rawai'phani marmoknei mantreh ngeirou da.

⁴⁰ Thimi hukounak khatni heinaksi ankhi metuya mailanungri, aiyei phirul-phishamb rapya shumathairou da; heitoubi rawai'phani marmoknei mantreh ngeibini leirou da. Heitoubi heinaksi metuya hukounak thimi khatni palbi urkur leiyanungkhi, aiyei phirul rapya shumathaibi rawai'phani marmoknei mantreh ngeirou da.

⁴¹ “Heirou thleimaira rul khoini karwaicha chiwirap nammakhi nanungei machin'kna chiwithil. Heinaksi chiwi rapri mainungei yamakrou.

⁴² Heirou thleira ukni tulchabi karwaicha chiwirap heirou hut-ho phalitamrekni karwaicha chiwirap hoiyanungkhi, nimanung hutmyar-ho'myar chungwani klei chiwi rapkhi, nani mainungei yamakrou; ngamri heinaksi yaarap heiri machin'kna.

⁴³ Thleimaira rulkhoini karwaicha chiwi rapya maibi naimsha-naitamya marmokyermak; heirou heinaksi an rapni naya touborhyermak.

⁴⁴ Kouweiyo toulanungri, Keiri Umpu, naiyei Dunpu. Ngam heineri nani naitam-naimshani makatbi marthingthutlak; ngamri Keiri Khying. Heitoubi thleira rul khoini karwaicha chiwi rapya maibini naimshaya marmokyermak.”

⁴⁵ Kouweiyo toulanungri, Keiri naya Egypt ram'rouwei ruithutpikur Umpu, naiyei Dunpu hoibi klei Pu; ngam heine, nari Khying thimirap hoirou da; kouweiyo toulanungri Keiri Khying.

⁴⁶ Awari yaalim-waalim rapbei ngamra, heirou yuirilla ringbi klei chiwi rapbei, heirou thleimai doura rul khoini karwaichabi klei chiwi rapbei ngamrou chanungei lammitrap.

⁴⁷ Heirou yaalim-yoolim rapbei hangra borh-khying heirou chamai kya-yamak munanungei khaithutkur lammitrap.