LEVIYA 10 - KHYINGEI PU'TLOU Bible (BSI)

Nadab'le Abihu'ne Borhlhou Toukur

¹ Heirouri Aaron'yei chanapawa Nadab'le Abihu yakhuntani ai'aiyei meihal shukthutna kulpak rapya louheibini, heihillou kulpak rilla meihal'khring shukbangkur, heitoubi heiyei doura mroh kunkhi iklhakkur; heitoubi yani Umpuei maibongra heilhakbini, Umpune makatlaklo toubi yaya chay pikhoumak meiborhya yakhuntani makatkur.

² Heirouri Umpuei maibong'rouei mei fyouwurbini yakhuntaya kaangkur; heisitoubi Umpuei maibongra kaangtlumbini hikur.

³ Heisi tounarouri Moses'ne Aaron'nung shun: “Umpuei shunkhou tlouri kouwo toulanungri asitoulei: ‘Keiyei pongra wakarnak thimi rapbei hangra Keiri Khyingme toubine muyerrou, heirou thimirap nammaei maibongra Keiyei thang'alya alyerrou.’ ” Heisi tounarouri Aaron'ri kou'tloukhi yunmakni leikur.

⁴ Heirouri Moses'ne Aaron'yei patul Uzziel'yei chanaorap Mishael heirou Elzaphan yakhuntaya ungloubine, heitoubi yaya shunkur: “Ara wachangalo, heitoubi naiyei pateinaoei chanao rapya Khying Pucheemrouei khangthutloulaka, heitoubi yulthung pura urthutloulaka.”

⁵ Heisitoubi Moses'ne shunkur heinakrimni, yani wachangbi, yaimshaei linglikchul nabini yaiyei teinao rapbei khilhung rapya yulthungei pura khangthutloukur.

⁶ Heirouri Moses'ne Aaron heirou aiyei chanaorap Eleazar'le Ithamarya shun, “Naiyei lurei sam toutaburnungei yamakrou, heirou naiyei phirul-phishamb rapkhi threlchaalbi upnungeikhi yamakrou, nimanungri nakhi hirou, heirou Umpuei meithukkei malungkhakur heiri kulyomyei doura yongdarou. Heiya naiyei teinaorap, Israellei thimirap nammani Umpuei meini kaanghatyerkur thimi rapnung'tlim khi-kanrilni chaplaksu.

⁷ Heirou nani Khulbung Kartilna Pucheemyei shumtrum'rouei pochutmakni leiyalo, nimanungri na hirou, kouweiyo toulanungri, Umpuei teiphang'nungei shirek heiri naidoura khoupiwurla.” Heisitoubi Mosesyei shunkur chaytlou hilthungni yani lhoutoubi leikur.

⁸ Heirouri Umpune Aaron'nung shunbi atoubine kyun:

⁹ “Nangkhi heirou neiyei chanao rapkhi darkhayui mongnungei yamakrou, heirou phrisik tulkhi mongnungei yamakrou; nimanungri nakhi hirou; awari nai hillei hungrou'kyou yu-cha rapbei chaan ramphani chanungei Puwatlhou lammit.

¹⁰ Heisitoubi yani Khying heirou marmokna putrap heirou borh'le borhmak khintamei karlhikrilya muyerrou da.

¹¹ Heitoubi nani Israellei chanaorap nammanungei Umpune Moses'nung shunpiwurkhou chaylamrap nammaya marnopirou da.”

¹² Heirouri Moses'ne Aaron'le, aiyei himaleithung chanaorap Eleazar'le Ithamarya shunkur: “Umpunungei meira hongbi makatna putrei maleithungkur trunwaiyei lung rapya loubine, phri sikmakni khrahpal pongra nani chamailak, kouweiyo toulanungri, heiri yerrouwei khyingdui makatput khat.

¹³ Heirou nani heiwaya Khyingei bomra chamairou da, ngamri heirapri naiyei phabomthuk siruk, heirou naiyei chanao rapbei phabomthuk Umpu'nungei meira hongbi makatna putrei sirukrap; ngamri heihakya tounanungei keiya chay piwurkhou.

¹⁴ Heiya Umpunung meiwaira thinglhakbi makatna anrei mathikle pheikhnang heiri nangle neiyei chanapawarap heirou neiyei chanapuiya raple pulni khyingei bomra changbini chamairou da. Kouweiyo toulanungri, ansiruk rap heiri Israel rapbei malung pilyerna'nungei makat putrei neiyei siruk, heirou neiyei chanao rapbei siruk khoini khaithutbi pithutkura.

¹⁵ Heirou malanlhakur pheikhnangle heirou thinglhakbi makatkur mathik heiri meira hongbini makatnungei anyao raple pulni heilhakbi, Umpuei maibongra thinglhakbi makatrou da. Awari Umpuei chay piwurkhou hilthungni, nangle neiyei chanao rapbei phabomthuk an'siruk hoirou da.”

¹⁶ Heirouri Moses'ne borhnung'tlim makatput tlangei ngamrou mukheini thikulnarouri, thilak, tlang heiri meira hongurbi louklei karthangkur. Heisi tounarouri ani malungkhawurbi Aaronyei himaleikur chanapawarap Eleazar'le Ithamar'ya heikngai,

¹⁷ “Koutounei nani borhnung'tlim makatput anchumya khyingei bomra chamaimako? Ngamri anchum heiri yerrouwei khyingdui makatput, heirou Ane heiwaya kulyomyei mralya kuknanungei, heirou Umpuei maibongrouei borh limnanungei toubi nanungei piwurkhou putkhat.

¹⁸ Thilak, tlang hee heiri Pucheemyei Hyingduina bomra heilhakmakurari, anchum heiri keinungei chay piwurkhou heinakrimni, nani Khyingei bomra urlhakbini mailourou da.”

¹⁹ Heiya Aaron'ne Moses'nung loukyun, “Thilak, angtuhak yani Umpuei maibongra yaiyei borhnung'tlimle meira pumni hongbi makatnungei put rapya makatkurame. Heirouri anaksi lhouthuk rapya keinungei thukkurnarouri, kounakpi borhnung'tlim makatput anchumya keine mailoulanungri, Umpuei mit thrilnarari lhangairouko?”

²⁰ Heirouri Moses'ne kyun heiwaya mayeknarouri, aiyei ukningra malung pilkur.