LEVIYA 1 - KHYINGEI PU'TLOU Bible (BSI)

Malamput Pumni Hongbi Makatnei Lammit

¹ Heirouri Umpune Khulbung Kartilna Pucheem'rouwei Moses'ya ungbini heirou anungei shunbi atoubi kyun:

² “Israellei thimi rapya shunbini heirou atoubi yunpilak, ‘Naihangrei thimi hukounak khatni Umpunungei khrumnaput makatrou dawanungri, a heini halrul hangrei halya nimanung yaorul hangrei yao rapya makatlaksu.’

³ “Aiyei makatput heiri pumni hongbi makatnungei halshun hoiyanungri, ane msei naimak halshun pacha khatya makatlaksu; heirou ani khulbung kartilna Pucheemyei shumtrumlira makatlaksu, heiyanungri ayari Umpuei maibongra yapibi loulhakpirou.

⁴ Heitoubi ani aiyei hut heiri makatput heiyei lura khoulaksu, heiyanungri makatput heiwaya aiyei runghutra borh kukpina khoini loulhakpirou.

⁵ Heitoubi ane halshun heiya Umpuei maibongra hatlaksu; heitoubi Aaron'yei chanaorap, Suipipu rapni heiyei heeya loubine, heitoubi Khulbung Kartilna Pucheemyei shumtrum lirei klei khrahpal doura karhilni thingphanglaksu.

⁶ Heitoubi ani makatput heiya un laiwurbini, heirou harhar shatchallaksu.

⁷ Heitoubi Suipipu Aaronyei chanao rapni khrahpal doura mei fyourou da, heitoubi heiyei doura thangknaini heeng heimarpeibangrou da.

⁸ Heirouri Aaron'yei chanao, Suipipu rapni, anharrap heiwaya lule, heirou heiyei anyao rapkhi waiknaini khrahpal dourei mei hongpopbi klei heeng rapbei doura marpeibangrou.

⁹ Heitoubi halshun heiyei khrilrang raple. ho rapri ani yuira chaamthairou da. Heitoubi anrap heiri Suipipuni khrahpal doura meini yertlengwa hongurbi Umpunungei khrim muiknam khrumna put khoini makatrou da.

¹⁰ “Heiya kounakpi aiyei meira hongbi makatnungei khrumna put heiri kounakpi yaorullei hoiyanungri, yaoya hoiyanungkhi, nimanung tlangya hoiyanungkhi, put heiri msei naimak yaopa nimanung tlangpaya makatrou da.”

¹¹ Heirou ani an heiwaya khrahpallei khalu-lhangra Umpuei maibongra hatlaksu, heitoubi Aaronyei chanaorap, Suipipu rapni heiyei heeya loubine, khrahpal doura karhilni khrephanglaksu.

¹² Heitoubi ani an heiri lule heirou anyaodang rapkhi kyaoni harhar shatchallaksu, heirou Suipipu heini heirapya waiknaini khrahpal dourei mei hongbi klei heengdoura marpeibaanglaksu.

¹³ Heiya khrilrang raple ho rapri ani yuira chaamthailaksu. Heitoubi heirapya Suipipuni yertlengwa makatdurbini, khrahpal doura meini ikwurlaksu, ngamri heiri meira hongbini khrim muiknam put khoini Umpunungei makatkur khrumnaput.

¹⁴ “Heiya kounakpi aiyei Umpunungei meira hongbini makatnungei put heiri ramwaa hoiyanungri, ani aiyei makatput heiri ram'mathru nimanung cheem'mathru manbini makatlaksu.

¹⁵ Heirou Suipipuni mathru heiri khrahpalla heilhakbi, heirou heiwaya ngak treitatdurbini, heitoubi khrahpal doura meini hongurlaksu, heitoubi heiyei heeri khrahpal ruira manchirsundalaksu.

¹⁶ Heitoubi ani heiyei waa'olle, waa khmulrap heiri phuiloubine, khrahpallei kulkung lhangei mnakra, meimka'ut shungkhouna bira khingurou da.

¹⁷ Heitoubi ani mathru heiri sha khintamrek khripdeekurbi thikthrellaksu, heiya lhang lailaini dayernungeiri yamakrou. Heitoubi Suipi puni waa heiwaya khrahpal doura, mei hongpopbini klei heengdoura khingbaangurbi hongurlaksu; ngamri heiri Umpuya malung pilyernanungei meira hongbi makatkur khrim muiknam khrumna put khat.”