KANTHOUNA 7 - KHYINGEI PU'TLOU Bible (BSI)

Yuitang Thukkur

¹ Heirouri Umpune Noahnung shun, “Nangle heirou neiyei nuwa-chawa raple kalhonni mali rilla wachanglaka; angtuei tlaipang chaan arou tharmu chimri Keiyei mit'thrilnarou neitamtomngeiya.

² Nangle kalhonni khying yaalim-yoolim rapya pa khatle pui khatsol loubini urlhaklaka; heitoubi hyingmak yaalim-yoolim deideikhi pa khatle pui khat loubini pu khatsolkhi urlhaklaka.

³ Heitoubi nungthourei traicha waalim rapkhi pu'eni, pa khatle pui khatsolkhi urlhakbi, heirou tlaipang dourouei yaya himaangyer'maknungei khoupilaka.

⁴ Koungameiyo toulanungri, tlaini eniyei rilla tlaipangpalra masa-nunghang somlinibil Keine nung royerrouwa; heitoubi Keiyei sheemthutkur lhawaipal chiwi lim namyerwaya tlaipang'rouwei Keine maangyerrouwa.”

⁵ Heirouri Noah'ne Umpuei shunpikur tloulhangrap hilthungni lhou namma toukur.

⁶ Tlaipangpalra yuitang thukyeinung Noahri ai'mshaei kum machathruk tlungura.

⁷ Heirou Noah'ne aiyei chanao raple, aiyei nule heirou aiyei chawa rapbei nu raple pulni mali rilla wachangurbi, yuitang'rouwei kartleikur.

⁸ Heisitoubi Dunpune Noahnung shunkur heinakrimni, khying yaalim-yoolim rapkhi, hyingmak yaalim-yoolim rapkhi, heirou nungthourei traicha waalim, heirou thleira ukni tulchabi klei frul'lim rapkhi;

⁹ pa khatle pui khat toubine khintamsol loubini mali rilla wachangyerkur.

¹⁰ Heitoubi tlaini eniyei hillouri tlaipangpalra yuitang thukkurbi dumphopkur.

¹¹ Heirou Noahyei chaan kum macha'thruk tlungkurle, khintam tlung tanglayei tlaini chiple'eninirou waiyoubini, samadru namyerrei tuyna putthutdura, heirou tuywok fyoubi, heirou Thangwanrei tuylamkhi phatdurla.

¹² Heitoubi tlaipangpalra nunghang somlini, heirou masa somlinibil nung rokur.

¹³ Tlaini heihakrou Noah'ne aiyei chanaorap Shem, Ham heirou Japhethle, heirou aiyei nu, heirou aiyei chawa rapbei nu raple kalhonni mali rilla wachangkur.

¹⁴ Heirou yakou kalhonni ramrei yaalim-yoolim kantang, heirou ui-waa limlim, heirou thleira ukni tulchabi klei frul limkantang, heirou cheemrei ui-waa lim kantangreikhi malira tungkur.

¹⁵ Heirou Noah'le kalhonni lhawaipal chiwirap yaalim-yoolim kantangei khintamtam pu shabini mali rilla wachangkur.

¹⁶ Heirou mali rilla wachangkur heirapri, yaalim-yoolim kantangei pa khatle pui khatsol pu shabini Dunpuei shunpikur hilthungni wachangkur; heitoubi Umpune aya thungphopkur.

¹⁷ Heirouri tlaini somlinibil nung haamkurkhi naimakni rowurbi, tlaipangpalra yuitangni thrit'thrit katduilhakura, heitoubi malikhi trailouheibi thlei'rouwei chouni marlhaoloukur.

¹⁸ Heirouri yuitangni tlaipangpal karyouwurbi, yuitang katduilhakkur, heirou malikhi yuidoura marlhaochakur.

¹⁹ Heirouri yui heini tangachaknei ngamrou, tlaipang dourei klei Lhunglim chouna kounakkhi yuini omdumwurchila.

²⁰ Yuitang heini tlaipangpallei Lhunglimrap namma thong'yeng chiple phanga khyumni omdumwurbi yuini huphopburla.

²¹ Heirouri tlaipangpalra kanchekchabi klei lhawaipal chiwirap namma, ui-waa'rap, ram-yaa'rap, frullim, heirou tlaipang thimi rapkhi namma hiwurchiya.

²² Heitoubi thlei taarnarei klei lhawaipal chiwirap nammakhi hiwurchiya.

²³ Heisitoubi Ane tlaipangpallei ringbi klei tlaipang thimirap, ui-waa ram-yaa'rap heirou ukni tulchabi klei chiwirap nammakhi heirou nungthourei traichabi klei ramwaarap nammakhi hiyerwurbini tlaipangrouei mangyerkur. Heirou Noahle akou kalhonbi mali rilla wachangthungkur heirapyatom ringyerkur.

²⁴ Heirou yuitang heiri tlaipangpalra tlaini machale somngabil kanthritmakni omdumbini leikur.