KANTHOUNA 6 - KHYINGEI PU'TLOU Bible (BSI)

Tlaipang Thimiyei Lhangaimak

¹ Heirou tlaipang thimi rapbei mshing katduibi tlaipangpal karyoukur heirouri, tlaipang thimiyei chanapuiya rapkhi chungni pukkurla.

² Heitoubi Dunpuei chanapawa rapne tlaipang thimiyei chanapuiya rapbei shakrung lhangaiya mulhakbi, heirou yani ai'aiyei maduya khalbini nu'nungei lourilkur.

³ Heirouri Dunpune kyun, “Keiyei Lhawairi tlaipang thimiyei rilla klui naimakni leiyermarou; ngamri a heiri khi-kya sharung khoi; heirou ari kum machale somni ringrou.”

⁴ Bongei chaanrouei tlaipang thimi tangrap (yarap heiyari Nephilim toubine mu'kna) chungni loupaalkhou; heitoubi Dunpuei chanapawa rapne tlaipang thimiyei chanapuiya raple lourilkhoubi, heitoubi yani chanao pukkhou; heirou yaiyei chanaorap heiri tlaipang heichaanyei Lhouwarap heirou mincha thimirap khoini paalkhou.

⁵ Heirouri tlaipang thimi rapbei ukningra lhangaimakni thimmura, heirou yani borhyei lhouya kalleng-kallengni touwurlame touri Umpune muwurla.

⁶ Umpune tlaipang doura kouya tounanungei thimiya sheemthutkurawo toubine Aiyei malung-thrammakura; heitoubi heini Aiyei Lhawai lahyerkur.

⁷ Heitounei Umpune kyun, “Keine thleirei sheemthutkur tlaipang thimile kalhonni, thimi'roueini ramrei yoo-waa, frul limkhi heirou nungthourei traicha ramwaa lim rapkhi maangyerrouwa, ngamri Keine yaya sheemthutkuri Keilhawai lahyerwurla.”

⁸ Heiya Noahri Umpuei mit'thrilnara malung'khrahkna thimi khat khoini leikhou.

Noahyei Mali

⁹ Noahyei yu-cha rapbei chaanlamri asitoubi leilei: Noahri tharmu chim thimi khat hoikhou; aiyei chaanrou marmok touri koukhatkhi mak; heirou aiyei chaan khatrek ani Dunpule kalhonni chakhou.

¹⁰ Heirou Noahyei chanapawa napung'khyum pukkhou; yarap heiri Shem, Ham heirou Japheth.

¹¹ Heichaan heirouri tlaipangpal heiri Dunpuei mit'thrilnara borhni marmokkura, heitoubi hatkril-khribkrilni bil thimmura.

¹² Heirou Dunpune thiyeinungri tlaipangpalri lhangaimakura, heirou thimi rapnekhi ai'aiyei sharungei kningyatom toubine borhyerwurla.

¹³ Heirou Dunpune Noahnung shun, “Tlaipang thimirap namyerya Keine maangyerrouwa; ngamri tlaipangpal awari yaingamrou borhni heirou hatkril'khribkrillei lhou rapne bil thimmura. Heingammei thilak, Keine yayari tlaipangrei maangyerrouwa.

¹⁴ Heineri nangni Gopher heengei Mali khat salaka, heitoubi Mali heiyei rilla bomtho chungni khaithutbi naiyerlak, heitoubi heiyei rillakhi heirou purakhi khenaini teifnallak.

¹⁵ Asitoubi nangni mali sananungei manringrou da: Mali heiyei dungra thong-yeng macha-khyum shaangyerlak, heirou heiyei homrani thong-yeng somnga, heirou mlamrani thong-yeng somthum chouni sabaanglak.

¹⁶ Heitoubi maliyei dourani bungkhum makhuplak, heirou mnakrei raaprani thong-yeng khat chouduiyerlak; heitoubi mnakra cheemkhar'tang khat touputlak; heirou maliyei rillani bomtho thak-dak thaak-khyum thukni salak.

¹⁷ Kouweiyo toulanungri, thilak, Keine tlaipangpal karyouni yuitangni omdumyerouwa; heitoubi Keine thleidourei ringbi klei chiwirap nammaya himaangyerrouwa.

¹⁸ Heiya Keine nangkou tlou kantomril khat khourou; heirou nangni mali rilla wachangbi, nangle, neiyei chanao raple, neinule heirou neichawa rapbei nu raple mali rilla wachangchilaka.

¹⁹ Heitoubi lhawaipal chiwi kantangei puile pa pu khatsolkhi nangle kalhonni himaknanungei mali rilla urlhaklak.

²⁰ Heirou ramwaa rapkhi limlimyei pu khatsol, ramyaa limlimyei pu khatsolkhi, heirou thleira ukni tulchabi klei frul limlimyei pu khatsolkhi himaknanungei nangle kalhonni mali rilla urlhaklak.

²¹ Heitoubi nangni chamainungei murchakkhi limlim marpeilhaklak; heini nanungeile heirou yoo-waa rapnungeikhi chamainungei murchak hoinarou.”

²² Heisitoubi Noah'ne Dunpuei chay pikur hilthungni namma marshiklhakkur.