KANRETHUTPI 9 - KHYINGEI PU'TLOU Bible (BSI)

¹ Heirouri Thangring phangatam tlung heiwane aiyei pengkul yukkhungurla. Heirou sorwa khat tlaipangdoura yongdakur keine loukmu, heitoubi Anungei mayu naimak thleiputdei hang laatnanung malanpikur.

² Sorwa heine mayu naimak thleipurya laatdurbi heirou tangkur meibomrei meikhu kathuknakni, thleipur heirouwei meikhu kathuk; heirouri thleipur heiyei meikhu heine kinni'al heiyale heirou nungthou nammaya mehyerkur.

³ Heirou meikhur rilwairei khaothur chungwane tlaipangra heirothutkur, heitoubi yanungei chogkheyei khru kleinakni khru leiyerkur.

⁴ Heitoubi yayari ramna-louna, nimanung heengtrung, nimanung koutrung khatkhi deek-bai thuknungei yamakme toubi shunkur; heiya yane machalra Dunpuei simanlha namphangmakni klei thimi rapyatom pal kya.

⁵ Heitoubi khaothur rapyari anaksi thimi rapya hatnanungei yapimak, heiya tangla tlun phanga yaya klah-knang pinanungtom yapikur. Yai klah-knang pinei kna heiri chogkheyei chiknei kna nakrim hoirou.

⁶ Heinaksi tangla tlun phanga heiyei rilla yane khi rapya thipharou, heiya yane rapha mumakrou; heirouri yane hi'knine chanchaheirou, heiya khi heiwane yairouwei loutrukeirou.

⁷ Heirou khaothurrap heiri thiyei kaalnung raal chananungei marshikbi klei sapuk rulnakni kmu; yaiyei lurani sinayei lukhupnak makhup; heirou yai mairungrap heiri tlaipang thimiyei mairungnaksi.

⁸ Heitoubi yaiyei shamri napuiya rapbei shamnaksilei, heirou yai ha rapri yangkongei hanaksi.

⁹ Heirou yai malungpakri thirrei chung lhobphopbi kleinaksi kmu, heirou yai sha yaapnei hou heiri sapuk kaari chungwane raalbomra kardounanungei channei hounaksilei.

¹⁰ Yai khmeirap heiri chogkheyei khmeinakni klei, heirou yane thimiya thirlanungri tangla tlun phanga na'kyer khru khmeira klei.

¹¹ Heitoubi yaidoura mayu naimak thleipurrei upa hoibi Thangring heiwane pu hoibine klei. Aiyei min heiri Hebrew tloura ‘Abaddon,’ heirou Greek tlourani ‘Apollyon’ toubine ung, heiwaya mallengthutri (Marhotbi maangkyer pu) toubi ung.

¹² Heirou lamkriyei klah-knang heiri luiwurla; heitoubi heihillou hanuikhi klah-knang khintam hungthunungei leileihui.

¹³ Heirouri Thangring thruktam tlung heiwane aiyei pengkul yukkhungurla. Heirou Dunpuei maibongra mayungbi klei sinayei khrahpal chithek phalitamrei houkhat keine loumayekkur.

¹⁴ Hou heine Thangring heiwanungei kyun, “Euphrate kungtangrei phonphopbi khoukur Thangring phalitam heiya malhetthutlaka!”

¹⁵ Heitounei Thangring phalitam heiyari malhetthutdurla; heitoubi heikumhakei tangla heihakrou, heirou heikaallei kheen heihakrou yane tlaipang thimirap siruk khyumyei siruk khatya hatdurna'nungei marshikbi leikur.

¹⁶ Heitoubi raallui rapbei thimi mshing heiri keinungei sherthutpikur, yarap heiri lakha lishingkhni tlunglei.

¹⁷ Keiyei kar'annara keine sapuk raple heirou heiyei dourei tungbi klei thimi rapya muwurla. Yai malungpakra meithlanyei mrao'nakni, khokparyei, heirou kant-porangei kimnaksi klei chung lhobphopbi klei. Heitoubi sapuk rapbei lu rapri yangkongei lunaksi, heirou yai murrouwei meithlan, meikhu heirou kant-meikuikhi wathuk.

¹⁸ Heisitoubi tlaipang thimi siruk khyumtamei siruk khatri heinaksi pharthraida khyumtam heine sapuk rapbei murrouwei wathukkur meithlan, meikhu heirou kant-meikui heine hiyerkur.

¹⁹ Kouweiyo toulanungri sapuk rapbei mantrang heiri yai murle khmeirakhi klei. Heitoubi yai khmeirap heiri frulnaksi, heirou khmeirap heine tlaipang thimiya thirkyer.

²⁰ Heitoubi heinaksi pharthrai kna rapne hatdurnarei yaomak tlaipang thimirap dei namma heiri, yaitamei sheemthutkna thrailha raprei yane kallekthutmakni leileihui. Yane kraoya khrumnarei mitkhi mumanemak, khnakhi mayekmak, heirou karwaichakhi manimak sinayei, lapa thirrei, kori thirrei sheemthutkur thrailha rapya, heirou thlung rapya, heeng rapya dongmakni khrumbi leilei.

²¹ Heirou yane yai thimi hatnarei, thui-urnei lhourei, chorit naimak lhourei heirou mucha-mumainei lhourei ukning hungmakni leileihui.