KANRETHUTPI 8 - KHYINGEI PU'TLOU Bible (BSI)

Enitam'tlung Simanlha

¹ Heirou Yaoshun heine enitam tlung simanlha heiya toubaiwurbi laatdei kaalnungri, Thangmunram heiri kheen lhang'khatdeimal riedaine leikur.

² Heitoubi Thangring enitamne Dunpuei maibongra mayungbi leinarou yanungei pengkul enitam malanpikur.

³ Heirouri Thangring khatne muiknam mroh ikna sinayei kaikam khat shinbine wathuk, heitoubi khrahpal pongra wamayungkur. Heirouri Dunpuei thimirap namyerwani shunchayei iknanungei'le, Krungbom maibongrei klei sinayei khrahpalra makatnanungei toubi anungei muiknam mroh chungwane malanpikur.

⁴ Heirouri Dunpuei maibongra mayungbi klei Thangringei hutrouwei Dunpuei thimi rapne shunchanei tloule kalhonne mroh iknei meikhu heiri traibaangkur.

⁵ Heitoubi Thangring heine mroh ikna kaikam heiya louheibine khrahpalra mei thimni shunglhakur, heitoubi tlaipangdoura khingsundakur. Heirouri tlaipangpalra marwanyei houle, lhimnung-marthee tangle, liptlai kwaarle heirou linglang khngaakle toukur.

Pengkul'rap

⁶ Heirouri Thangring enitamni pengkul enitam shinbine heitoubi khungnanungei marshikbi leikur.

⁷ Lamkriyei Thangringne pengkul heiya yukkhungkur. Heirouri nungheile meile heirou heele markotbine tlaipangra shungsundabi royerkur. Heirouri tlaipangpal heiri siruk khyumtamei khatri - heengtrung raple heirou mar'em heengna-rona nammakhi meini kaangtaakkur.

⁸ Heitoubi khintam tlung Thangring heine aiyei pengkul heiya yukkhungkur. Heirouri meithlan dourei lhungdou tang khat samadru rilla khinglhakur. Heirouri samadru heiri siruk khyumtamei khatri hee heiholkur,

⁹ heitoubi samadru rillei chiwirap heiri siruk khyumtamei khatri hiwurchi, heirou malikhi siruk khyumtamei khatri maangurchei.

¹⁰ Heitoubi Thangring khyumtam tlung heine aiyei pengkul yukkhungkur. Heirouri warbi klei meishar kmal sorwa tang khat nungthou lhangrei laksundabine heitoubi kung siruk khyumtamei khatra, heirou yuiput rapbei dourakhi dabaangkur.

¹¹ (Heirou sorwa heiyei minri ‘Duiyei kha’ toubine ung.) Heirouri yuiputrap heiri siruk khyumtamei khatri khakur, heitoubi yuiput heirouwei yui mongloukur thimirap chungwane hikur, ngamri yuiput heiri khakur.

¹² Heitoubi Thangring phalitam tlung heine aiyei pengkul yukkhungkur. Heirouri kinni heiri siruk khyumtamei khatri, heirou tanglakhi siruk khyumtamei khatri, heirou sorwa rapbeikhi siruk khyumtamei khatkhi umbaikur. Heingammei kinni heikhi, tanglakhi heirou sorwakhi yaiyei warbi klei heirouwei siruk khyumtamei khatri yenmehkur; heirou nunghangei kheenroukhi siruk khyumtamei khatri warmakne mehkur, heitoubi masanungkhi heinakrim hoikur.

¹³ Heirou keine thinarouri malaang khatne nungthoura choune traichabine hou choune kyunya keine loumayekkur. “Dei Thangring khyumtamni yai shinbi klei pengkul heiya yukhungeinung, tlaipangpallei klei thimirap namyerwanung, Ulleiyo! ulleiyo! ulleiyo! kounakei lah'kna hoirouwo!”