KANRETHUTPI 7 - KHYINGEI PU'TLOU Bible (BSI)

Israellei Thimi Lishing Khatle Somlile Phali

¹ Heihillou Thangring phalitamni tlaipangpal chithek phalitamra mayungbine, heitoubi tlaipang'rakhi nimanung samadru'rakhi, nimanung heengtrung khatdei dourakhi marthee thiyermaknanung toubi tlaipang'dourei martheeya churphopbi kleiya keine muwurla.

² Heirou Thangring khatne Khring Dunpuei simanlha shinbine kulkung lhangrei hungthukya keine loukmu. Heitoubi ane tlaipangpalle samadruya maangyernanungei toubi Dunpuei mantrang pikur Thangringrap phalitamnung hou choune ungraobi heishunkur.

³ Thangring heine atoubi kyun, “Kane kai Dunpuei shik rapya, yai machalra simanlha namphang'bongyenri tlaipangpalle, samadru, nimanung heengtrung rapyari khatchatomkhi deek-bai thukyermakrou.”

⁴ Heitoubi machalra simanlha namphangpikur thimi mshing heiri keinungei shunpiwurla, heirou Israellei cheemkhur kantangrei simanlha namphangpikur heiri lakha khatle lishing somlile phalibil tlunglei.

⁵ Yarap heiri, Judah cheemkhurrei lishing chiple khni simanlha namphangurla; Reuben cheemkhurei lishing chiple khni, heirou Gad cheemkhurei lishing chiple khni,

⁶ Asher cheemkhurei lishing chiple khni, Naphtali cheemkhurei lishing chiple khni, Manasseh cheemkhurei lishing chiple khni,

⁷ Simeon cheemkhurei lishing chiple khni, Lev cheemkhurei lishing chiple khni, Issachar cheemkhurei lishing chiple khni,

⁸ Zebulun cheemkhurei lishing chiple khni, Josephbei cheemkhurei lishing chiple khni, heirou Benjamin cheemkhurei lishing chiple khniya simanlha namphangpikur.

Sherchichangmak Thimichung Kulyom

⁹ Heiyei hillou keine thinarouri bi heirou thimi hunekhi mshing sherchichangmak kulyom kartilbi klei keine muwurla! Thimirap heiri tloulim kantangrei, cheemkhur kantangrei, heirou lim kantangrei thimirap; heirou yane Krung'bommei maibongra heirou Yaoshunyei maibongrakhi khngou shambya mansambine, heitoubi yaiyei hutrani kangwoi banrap shinbine mayunglei.

¹⁰ Heitoubi yane hou choune paobi, “Ralthutpina bom heiri Krungbom doura ombi klei kaiyei Dunpurei, heirou Yaoshun heirouwei kyongme!” toubi kyun.

¹¹ Heirou Thangringrap namyerwani, Yama upa rapnekhi heirou lhawaipal chiwi phalitamnikhi Krungbomya mayungkarhilbi leilei. Heisitoubi yane lu sikhuplhakbi heirou Dunpuya khrumchalei,

¹² heitoubi yane, “Amen! Dunpuya mathanglei. Ngamri thang'alkhi, shingkheikhi, mathangkurkhi, rikrai khrumknakhi, mantrangkhi, heirou manikhi namma heiri klui naimakne Dunpuei hoiniyasu! Amen!” toubi kyun.

¹³ Heirou Yama upa rapbei hangrei napung khatne keinungei kngai. “Khngou linglikchul shambya mansambi kleirap heiri huwo? Heirou yarap heiri koulhangrei kyongo?”

¹⁴ “Upawa, keiri mumakme, Neiyei kmu heiwariame,” toubi keine loumallangkur. Heirou Ane keinung loushun, “Thimirap heiri klah-knang kounakrei yenralthutkur thimi rapme. Yane yai linglikchul shamb rapya mathaiwurbi heirou hei rapya Yaoshunyei heeni ngouyerkur thimi rapme.

¹⁵ Heitounei ngammei yane Dunpuei Krungbom maibongra leibine, masa-nunghang naimakne Puwei cheemra Aiyei watlhou toubi klei. Heirou Krungbom doura ombi klei Puwani yayari Aiyei kalhonpikur heine huithutpirou.

¹⁶ Heirouri yane hanui kallengne msul-yuykhat toukhi naimakrou; heitoubi yai doura kinninekhi heirou kounaksi meishanekhi kaangmakrou.

¹⁷ Ngamri Krung'bommei tlailamra klei Yaoshun heiwane yaya shilpipu hoirouwa, heirou Ane yayari khringei yuiphum leinara ruilhakpirou. Heirou Dunpune thimi kantangei mitrei mityuikhi rutmthaipirou.”