KANRETHUTPI 6 - KHYINGEI PU'TLOU Bible (BSI)

Siman Lharap

¹ Heirouri Yaoshun heine siman lharap enitam'rouwei lamkri heiwaya umbaiwurbi laatkurya keine muwurla, heitoubi lhawaipal chiwi phalitam'rouwei khatne marwanyei hounakne “Wawalo!” toubi kyunya keine mayekkur.

² Heitounei keine thinarouri bi heirou sapuk khngou khat louklei. Heiyei dourei tungbi klei Puwaei hutra taak khatkhi shinlei, heirou Ane lukhup khatkhi makhup. Heitoubi Ane raal thang-thangne yenmaneheibi hunglei.

³ Heirouri Yaoshun heine khintam tlung siman lhakhi umbaiwurbi laatdurthu; heirou khintam tlung lhawaipal chiwi heiwayei, “Wawalo!” toubi kyunya keine loumayekkur.

⁴ Heitoubi sapuk mrao khatkhi wathukthu. Heiyei doura tungbi klei heiwanung tlaipangra raal yennanungei mantrang pilhakur, heisitoubi thukthu. Heiyei thimi rapne khatle khat hatrilheirou. Aiyei hutra raalshon khyang khatkhi rumlanpiwurla.

⁵ Heitoubi Yaoshun heine khyumtam tlung simanlha heiya toubaiwurbi laatkur; heitoubi lhawaipal chiwi khyumtam tlung heiwane “Wawalo!” toubi kyunya keine mayekkur. Heirou keine thinarou, bi heirou sapuk khmong khat louklei. Heiyei dourei tungbi klei Puwani Aihutra khrit-khyaang holna pukhat shinbi leilei.

⁶ Heitoubi lhawaipal chiwi phalitam hangrei houkhatne, “Nungkhatnuiyei lhouchurnei klahmanri gehu khrungkok khat hoirou, heitoubi nungkhatnuiyei lhou churnei klahman heiri chuncha-khngou kun khrungkok khyumtam hoirou. Heiya olive-trung raple darkha-yam rapri toumaangkur yamakrou!” toubi kyunya keine loumayekkur.

⁷ Heitoubi Yaoshun heine simanlha phalitam tlung heiya toubaiwurbi laatkur; heirou lhawaipal chiwi phalitam tlung heiyei houne, “Wawalo!” toubi kyun heiya keine mayekkur,

⁸ Heitounei keine thinarouri bi heirou sapuk balkhat louklei. Heitoubi heiyei doura tungbi klei Puwaei minri Khi toubine ung, heirou Khiyaram heine heiwayei hilla chanthungbi klei. Heirou tlaipangpal heiyei siruk phalitamei khatdei doura raalni, purvi-purchamni, pharthrai knane heirou ramyaa limlimni hatdurnungee toubi yanungei mane-mantrang piwurla.

⁹ Heitoubi Yaoshun heine simanlha phangatam tlung heiya toubaiwurbi laatkur. Heirouri khrahpal daakra Dunpuei tlou shunthutkhounei ngamrou hatkur thimi rapbei, heirou malungamkna khoiyei tlou mayungkhoupi thimi rapbei lhawai rapya keine mukur.

¹⁰ Heirou yane hou choune, “Khying heirou chimmei Mantrang Puwo! Tlaipang doura kaya hatkur thimi rapbei doura koulumnang nangne pichar toubine tanti piheirouwo?” toubi ungraokur.

¹¹ Heirou ya khatsolnung khngou shambya piwurbi, heitoubi yanakrimni hatrou kyou thimirap heirou shok hoimalkna paluirap heirou yai teinaorap nammakhi tlungbongyen, yane lepcha loungaaknungei toubi yanungei shunkur.

¹² Heirou Yaoshun heine simanlha thruktam tlung heikhi toubaiwurbi laatkur keine muwurla. Kheen heirouri linglaang kalthi khngaakkur, heirou kinnine yaa'khmulphi khmong naksine yenmehkur, heitoubi tanglane hee naksine katmraokur.

¹³ Heirou martheene sha'khngaakei kaalnung khyudhei ngouringni trungrei trulsundakur heinakne sorwa rapne tlaipangra yendakur.

¹⁴ Heitoubi nungthouni phokhyo naksine khyobaangurbi mumakkur, heirou lhung rapkhi, tuymakpung nammakhi yai bomrouwei louthutkur.

¹⁵ Heirouri tlaipangpallei krung rapne, pu hoibi klei rapne, heirou raalluipu rapne, dun thimi rapne heirou toumane thimi rapne, heirou thimi deirap namyerwani, shok rapne heirou cheempu rapkhi, ya namyerwani lhunglim-daamlimrei thlungtang daakra, heirou thleipur-thlungpur rillakhi louyulkur.

¹⁶ Heitoubi yane tlung rapya heirou thlungtang rapya “Kaidoura kalletbangbi heirou Krungbom doura ombi klei Puwaei mit'thrilnarei, heirou Yaoshun heiyei malungkhanarei kaya bei yulkhoupilaklo!

¹⁷ Yai meithukkei malungkhanei Tlaini heiri arou leiyurame, hune heiyei maibongra mayungchangrouwo?” toubi ungraochane kyun.