KANRETHUTPI 5 - KHYINGEI PU'TLOU Bible (BSI)

Lailik-khyo Heirou Yaoshun

¹ Krungbom doura ombi klei Puwayei thya lhangrei hutra lailik-khyo khat shinbi klei keine muwurla; heitoubi lailik heiri mnak khintamra mayebi heirou heiyei doura simanlha enitam nambangbi klei.

² Heirou keine Thangring khatkhi muwurla, Ane hou choune ungraobi atoubi yunlei, “Hune simanlha nampopkurya toubaiwurbi lailik-khyo heiwaya laatkur manerouwo?”

³ Heiya Thangmunrakhi nimanung tlaipangrakhi heirou thlei daakrakhi lailik-khyo heiwaya laatbine thikur manirou thimi hukhatkhi maklei.

⁴ Heitoubi lailik-khyo heiya laatmane nimanung heiyei rilla thichangrou thimiri hukhatkhi maknei ngamrou keine kalthi malungdouni chapkur.

⁵ Heirouri Yama upa khatne kyun, “Chapmakalo, thilak! Judahyei cheemkhurrei Davidyei yu-cha Yangkong khatne heinaksi raalya maniwurla, heirou simanlha enitam namphangkur heiwaya toubaiwurbi Ane lailik-khyo heiwaya latdurla.”

⁶ Heitoubi Yaoshun khat, lhawaipal chiwi enitamle Yama upa rapbei kuikarhilbi klei Krung'bommei tlailamra mayungbi kleiya keine muwurla. Yaoshun heiri hatkurnak kmalni klei. Tlaipangpal karyouni malhetthutkur Dunpuei Lhawai enitam heiri aiyei chee enitamle mitlung enitamkhi klei.

⁷ Heitoubi Krungbom doura klei Puwayei thya lhangrei hutrouwei lailik-khyo heiya Yaoshun heine hungchangbine louheikur.

⁸ Heirou Ane heisi tounarouri, lhawaipal chiwi enitam heile Yama uparap somnile phalini Yaoshun heiyei maibongra kanellhakbi heirou ya khatsolni sinayei taarile heirou daarkokra Dunpuei thimi rapne shunchanei muiknam mroh thimthimni lhakbine shinlei.

⁹ Heitoubi yane mathangna laa ranya salei. “Nangri lailik-khyo heiya loubine heitoubi heiyei simanlha rapya umbaiwurbi latmani Pume. Kouweiyo toulanungri Neiyari hatdurkhou, heirou Neiyei makatbine hipikur heiyei ngamne, phunghlim, tloulim heirou thimilim kantangei thimi rapya Nangne Dunpunung yenlhakpiwurla.

¹⁰ Heitoubi Nangne yayari kaiyei Dunpuya watlhou tounanungei Suipi pu rapbei Krungbom khoine sheempiwurla, heirouri yane tlaipangpalra Pu khoine paalrouwa.”

¹¹ Heirou keine hanuikhi thinarouri, Thangring'rap lishing lishingei, lakha-lakhaei houya keine mayekthula. Yane lhawaipal chiwi phalitamle Yama-upa rapbei tlailamra klei Krungbomya mayungkarhilbi,

¹² heirou hou choune laa salei. “Hatdurkhou Yaoshun heiri mantrangkhi, rung lhangaikhi, shingkheikhi heirou toumanekhi, rikrai-khrumknakhi, thang'alkhi heirou mathangpikhi phabom thuk!”

¹³ Heirou lhawaipal chiwi namyerwani, Thangmunra, tlaipangpalra, thlei rilla heirou samadru dourakhi -tlaipangpal karyouni laa sabi kleiya keine mayekurla. “Krungbom doura ombi klei Pu heirou yaoshun Anungeikhi, klui naimakne rikrai khrumknale, thang'alle heirou mane-mantrang heiya mathangkur hoiniyasu!”

¹⁴ Heirou lhawaipal chiwi phalitamni loumallangkur, “Amen!” Heitoubi Yama upa rapne Aiyei maibongra kanelhakbine khrumkur.