KANRETHUTPI 4 - KHYINGEI PU'TLOU Bible (BSI)

Thangmunra Pukhrum

¹ Tloulamrap heiyei hillou keine kar'anbi thinarouri Thangmun cheemkhar laatbi kleiya muwurla. Heitoubi pengkul hounak khatne lamkriyei keinungei yukshunya keine loumayekurla, “Bi ara kawalo, heitoubi aei hillouri kouya hungthukrouwo touri Keine neinungei muyerpirou.”

² Heirouri tallengne Lhawaine keiya rkolphobpikur. Heirouri Thangmunra Krungbom khat klei, heitoubi heiyei doura hukhat ombine louklei.

³ Ombi klei Heiwayei mairung heiri manklu jasper thlungnakni, heirou sardis thlungnakni alkur, heitoubi Krungbom heiyei karhilni emerald thlungei kimnakni langthingni albi klei.

⁴ Krungbom heiya kuikoolna rilla Krungbom dei somnile-phalikhi klei, Krungbom somnile-phali'yei doura Yama upa napung somnile-phalini khngouwei shambya kansambine heirou sinayei lukhup khupbine omlei.

⁵ Heitoubi Krungbomrei liptlaiyei alnakni, heirou marwanyei hounakni khungbi allei. Heitoubi Krung'bommei maibongrani Dunpuei Lhawai enitamni meishar nakni albi leilei.

⁶ Heirou Krungbom heiyei maibongrani likleeyei samadruni khngou-yeryerni albi leilei. Heitoubi Krungbom khatsollei karhilrani, mitlung hil'maibong kyao lhawaipal chiwi phalitamni kuikoolbi klei.

⁷ Heirou lamkri heiwari yangkong kmal; khintam tlung heiwari halpa kmal; heirou khyumtam tlung heiwari mairungrani tlaipang thimi kmal; heirou phalitam tlung heiwari traichabi klei malaang kmal.

⁸ Lhawaipal chiwi khatsollei trainanungei sha thruktamsol klei, heirou yarap heiri mitlungni yaiyei sharungrap namma karyouni thimbi klei. Yane masa-nunghang naimakne laa sabine klei. “Khying, khying, khying; bongei waiyoubi louklei, asinungkhi ringbi klei, heirou hillou hungrou kyou Pu heiwari, Mantrangni thimbi klei Dunpume.”

⁹ Heirou lhawaipal chiwi phalitamni Krungbom doura ombi klei, klui naimakne ringbi klei Puya mathangbine rikrai khrumnale kalhonbi thang'allei laaya shabi leilei. Heirou yane laa shayei kaalnung,

¹⁰ Yama uparap somnile-phalini Krungbom doura ombi klei Puwei maibongra kanellhakbi heirou klui naimakne ringbi klei Puya khrumbine leilei. Yane Krung'bommei maibongra yaiyei lukhupya khingsundabine kyun,

¹¹ “Kaiyei Pu Dunpu! Nangri thang'alle, rikrai khrumknale heirou mantrangya phabom thuk. Kouweiyo toulanungri, Nangne put namyerwaya sheemthutpi, heitoubi Neiyei kning hilthungne ya namyerwaya khring lhawaiya lhakpibi yaya ringyerpilei.”