KANRETHUTPI 3 - KHYINGEI PU'TLOU Bible (BSI)

Sardis'nung Maye Lhangai Pao

¹ Sardis Churchrei Thangring'nung mayelei. “Pao-laa ari Dunpuei Lhawai enitam kyao heirou sorwa enitam kyao Airouweime. Nangne koulhouya touleiyo touri Keine mulei; nangne hikurya hoiyanungkhi, khringei minthulya phawurla touri Keine mulei.

² Heine ipnarouwei kanthoulaka, heitoubi neiyei haalleiyoubi klei heiya namma hiwurbongnung mantrangyerlak. Ngamri Keiyei Dunpuei mit'thrilnarari neiyei touwurkhou heiri rong tlungmakhuime touri Keine mula.

³ Heiyanungri, nanungei shunmatupikur heiraprouei nai mayekkur heiri kouweiyo toubi ningthutlak; heitoubi heirapya hilthunglak, heirou nai borh'rouwei kallekthutlak. Heirou nangne iplhakurnarei kanthoumanungri, Keine mucha thimi'nakni yongeirou, heiya nangne Keiyei yongrou kyou kheen heiri koukaallouwo touri mumakrou.

⁴ Heiya Sardisrei klei thimirap na thani naiyei shambya mardunyermakni marthingni khoukhi yaolei. Nari Keikou khngou shambya mansambine chamalnaeirou, ngamri nari heisibil toubomthuk thimi rapme.

⁵ Raal manikur thimi rapne heinaksi khngouwei shambya mansamheirou, heirou yaiyei minrap heiya keine khringei lailikrei louthutdurmakrou. Heitoubi Keiyei Pawaei maibongrakhi heirou Aiyei Thangring rapbei maibongrakhi yari Keiyei thimi rapme toubi shunthutpirou.

⁶ “Khna klei thimi a heine, Lhawaine Church rapnung kouya yunleiyotou heiya ninglhaklaksu!”

Philadelphia'nung Maye Lhangai Pao

⁷ Philadelphia Churchrei Thangring'nung mayelei. “Pao-laa ari khying heirou chim Pu'rouweime. Davidyei hoikhou hang heiri Anungei klei, heirou Ane cheemkhar latlanungri, thimi hukhatnekhi thungchangmak, heirou Ane cheemkhar heiya thungurlanungri, thimi hukhatnekhi latchangmak.

⁸ Nangne koulhouya touleiyo touri Keine mulei; heitoubi neiyei mantrang tangmakme toukhi Keine mulei; nangne Keiyei shunmatupikurya hilthungura, heirou Keinung'tlim malungamkna hoiyura. Heirou thimi hukhatnekhi thungkur manimak cheemkhar khat Keine neiyei maibongra latdurla.

⁹ Louningpilo! Satanyei hoibi klei thimi rapnung heirou Jehudia'khi nimakne yame toubi mandallei tlou kyun thimi rapya neiyei bomra wayerbine heitoubi neiyei hopongra khrumyerheirou. Heitoubi Keine neiya malungshime touri ya nammani murou.

¹⁰ Nangne Keiyei chaylam rapya khoubi kanthramnei ngamrou, Keinekhi tlaipangpallei thimirap nammaya marshakbi thinanungei hungrou kyou klah-knang heirouwei naya Keine kalpirou.

¹¹ Keiri khrangne yongrou. Neiyei klei heiya nangne lhangaini khoulak, heiyanungri thimi hukhatnekhi neiyei raal maninei klahman heiya muloumakrou.

¹² Raal mane thimi heiyari Keine Keiyei Dunpuei cheemra shutlai hoiyerrou, heirou ani cheem heiya kouniroukhi lakurkhoumakrou. Keine aidoura Keiyei Dunpuei min heirou Keiyei Dunpuei Thangmun ramrei yenpirou kyou Krungkul ran Jerusalemei minya mayepirou. Keine aidoura Keiyei ran minya mayepirou.”

¹³ “Khna klei thimi a heine, Lhawaine Church rapnung kouya yunleiyotou heiya ninglhaklaksu!”

Laodicea'nung Maye Lhangai Pao

¹⁴ “Laodicea Churchrei Thangring'nung mayelei: “Pao-laa ari Amen'rouwei, malungamna kya heirou chimmei tlou mayungpi Pu heirou Dunpuei sheemthutkur put nammaei yenwaiyouna Pu'rouweime.

¹⁵ Keine neiyei toubi klei lhou heiri kouwo touri mulei; nangri daikhi nimak, heirou klumkhi nimakme touri Keine mulei. (Keiyei ningchanarari nangne khatya nimanung khatya hoiyerla'nungri kounak lhangairou)!

¹⁶ Heiya nangri lumshotnei ngamrou, kreikhi nimak, heirou klumkhi nimaklei, heineri Keine neiya Keiyei murrouwei mthukthutrouwa!

¹⁷ Nangneri, ‘Keiri dun thimi heirou nungkngai thimime heirou Keiyei kwatsam namyerwa phawurchila,’ toubine yunlei. Heiya nangri kounak klah-mrim, tounaram mak thimiyo touri nangne mumaklei. Nangri kanring thimi, phi'up-phirulkhi yaomak heirou mitdeo thimi.

¹⁸ Heine Keine neiya shunmatupilei touri nangne dun thimi hoinanungei Kei'rouwei sina khyingya lolak. Heirou neiyei rikraikna phi'up-phirul yaomakni hangwalni klei sharungya upkhalna'nungei khngou-marthing phirulya lolak. Heitoubi neiyei mitlungra lhaknungei hilhak'khi lolak, heiyanungri neiyei mitdeo heiri mumanirou.

¹⁹ Keine malungshipi thimirap namyerwaya Keine raakpilei, heirou tantikhi pilei. Heiyanungri, nangne lhawai kyaone toubi heirou neiyei borh'rouwei kallekthutlak.

²⁰ Thilak! Keine shumtrumra mayungbi cheemkhar hei'umlei; hukhatne Keiyei houya mayekbi heirou cheemkharya loulatlanungri, Keine aiyei cheemra wachangrou heitoubi akou chamalnarou, heirou anikhi Keikou chamalnarou.

²¹ Raal manikur thimi rapyari Keine raal maniwurbi heirou asinung Keiyei Pawaei Krungbomra aiyei pongra ombi kleinakni, yayakhi Keiyei Krungbomra Keipongra omyerna'nungei mantrangya pirou.

²² “Khna klei thimi a heine, Lhawaine Church rapnung kouya yunleiyotou heiya ninglhaklaksu!”