KANRETHUTPI 21 - KHYINGEI PU'TLOU Bible (BSI)

Ran Thangmun'ram Heirou Ran Tlaipangpal

¹ Heirouri ran Thangmun ramle heirou ran tlaipangya keine muwurla. Heirou lamkriyei Thangmunle lamkriyei tlaipang heiri maangura, heirou samadru heikhi makkura.

² Heirou Khying Khukarthil, ran Jerusalem heiri Thangmunrei Dunpurei yongchumbi, heitoubi shal dunrou kyou nangaka heiwini aiyei shalya murilnanungei kansambine kngaaknak marshikbi leikurya keine muwurla.

³ Heitoubi Krungbomrei hou choune yukyunya keine loumayekkurla. “Asinungri Dunpuei Pucheem heiri tlaipang thimi rapkou leiyura! Ane yakou pulni leimalnarou, heitoubi yane Aiyei thimirap hoirouwa. Dunpu A'hakne yakou kalhonpirou heitoubi Ane yaiyei Dunpu hoirou.

⁴ Heitoubi Ane yai mitrei mityui rutpirou. Bi heirouri khi toukhi naimakrou, heirou klah-knang, nimanung kna'sayei kanril toukhi naimakrou. Heirou khmanyei putchei nammakhi maangurchiya.”

⁵ Heirouri Krungbom dourei ombi klei Puni yunlei, “Heitoubi asinungri Keine put namyerwaya hoiyerwurla!” Ane keinungei asitoubikhi yunthulei, “Tlou aya ninglhaklaklo, ngamri tlourap ari chim heirou uklum kya.”

⁶ Heirou Ane kyun, “Lhou namma luilhakurla! Keiri Alpha heirou Omega, touri Younakhi heirou Dongnakhi Kei. Heirou hukhatne yui hatdanungri khringchaan yuishorei yuiya koumankhi naimakne Keine aya mongyerrou.

⁷ Raal manikur thimi hukhatne Keirouwei anaksiya phaeirou. Keine aiyei Dunpu hoirou heitoubi ane Keiyei chanapawa hoirou.

⁸ Heiya chikal thimirap, uklummak thimirap, machinkna thimirap, thimi hatrap, chorit naimakrap, heirou thui-ur thimirap, thrailha rapya khrum thimirap, heirou mandal thimirap namyerwaei leinanungei biri kant'le heirou kaangbi klei meikhurrei samadrura khnui tlungei khiyaram heitamrou hoiyerrou.”

Ran Jerusalem

⁹ Heirou luilhakna thraiknaei daarkok enitam thimni shinbi klei Thangringrap enitamei hangrei khatne hungbine kyun, “Hungalo Yaoshunni lounungei nu heiya Keine neinungei muyerpirou.”

¹⁰ Heirouri Lhawaine keiya rkolbine, heirou Thangring heine keiya lhungdou chouna khatra ruibangpikur. Heitoubi ani Khyingei Khukarthil Jerusalem'ya Aiyei thang'alle kalhonne waarbine Thangmunrei Dunpurei yongchumya keinungei muyerkur.

¹¹ Khukarthil heiri Dunpuei thang'alni manklu thlungnak alni, Jasper thlungnak kwaarni, heirou thlungrillei marthingnak albine klei.

¹² Heitoubi khukarthil heiyei karhilni paltang khatkhi klei, heirou paltang heiri choukhi chou, heirou heiyei palthung-shumtrum chiple khni klei, heitoubi palthung shumtrum rapya Thangring chiple khnine mayungakbine klei. Palthung shumtrum rapbei doura Israellei cheemkhur chiple khniyei min rapya mayebine khou.

¹³ Heitoubi khukarthillei paltang mnak kantangra palthung shumtrum khyumtamsolkhi klei; kulkung lhangra khyumtam, khate lhangra khyumtam, khalu lhangra khyumtam, heirou kulrel lhangra khyumtam klei.

¹⁴ Khukarthil heiyei paltang heiri cheemmunyei thlungtum chiple khni dunbine sabaangkur, heitoubi heirapbei doura Yaoshunyei Ruishik chiple khniyei minkhi mayebaanglei.

¹⁵ Heitoubi keinungei tlou yunpikur Thangring heiyei hutra khukarthil heile, heiyei palthung raple heirou paltang heiwaya holmarkhenanungei sinayei markhechei khat shinbine klei.

¹⁶ Khukarthil heiri homkhi heirou dungkhi khatnakdiklei. Heitoubi Thangring heine khukarthil heiya aiyei markhena cheine holmarkhenarouri, heiyei dungni lamtup'yeng lishing khnile macha phali, heirou aiyei homkhi heirou choukhi dungle khatnakdiklei.

¹⁷ Heitoubi paltang heiwaya thimine, touri Thangringne markhenarou, heiyei douri metre somrukbil choulei.

¹⁸ Paltang heiri manklu jasper thlungne sabaangkur, heitoubi khukarthil heihakri sina khyingne, touri likleenakne marthingne sabaangkur.

¹⁹ Heitoubi khukarthil paltangei cheemmun heiri manklu thlung limlimne mansambine sabaangkur. Lamkriyei cheemmun thlung heiri jasper thlung, khintam tlung heiri mrao-khmuk thlung, khyumtam tlung heiri agate thlung, phalitam tlung heiri emerald,

²⁰ phangatam tlung heiri sardonyx, thruktam tlung heiri carnelian, enitam tlung heiri chrysolite (quartz porang), chottam tlung heiri beryl, takotam tlung heiri topaz, chiptam tlung heiri chrysopras, chiple-khat tlung heiri jacinth, heirou chiple-khni tlung heiri amethyst thlung.

²¹ Heirou palthung chiple khni heiri manklu thlungkwaar chiple khniyei sabaangkur. Heitoubi khukarthil heiyei khullamrap heiri liklee naksine mukallei kya sina khyingne sabaangkur.

²² Khukarthil heiyei rillari keine Pucheemri mukhoumak, ngamri heiyei rillei Pucheem heiri tangdui-choudui Pu Dunpu heirou Yaoshun Ahakne hoibi klei.

²³ Heitoubi khukarthil heiri kinnikhi, tanglakhi warbom maklei, ngamri Dunpuei thang'alne heiyei doura albine klei, heirou Yaoshunni heiyei meishar khoine warbi klei.

²⁴ Tlaipangpallei lim namyerwane kwaar heirou karwaicharou, heitoubi tlaipangpallei Krung rapne kwaar heiyei rilla lalthum yenlhakrou.

²⁵ Khukarthil heiyei palthungrap heiri nunghangfchip laatbidik leirou; heirou palthungrap heiri kouniroukhi thungkurtou naimakrou, ngamri bi heirou masa'toukhi naimakrou.

²⁶ Heitoubi lim nammaei thang'allei lal heirou yaiyei toumane namma heiri khukarthil heiyei rilla yenlhakrou.

²⁷ Heirou Yaoshunyei Khringei Lailikra min mayelhakur thimirap nimakne, khukarthil heirou mardun, machinknayei lhourap, heirou mandalkhei thimi rapyari changyermakrou.