KANRETHUTPI 20 - KHYINGEI PU'TLOU Bible (BSI)

Kum Lishingkhat

¹ Heirouri Thangring khatne aiyei hutra mayu naimak thleipurrei hangcheile thirrui khrit khatkhi shinbine Thangmunrei yongchumya keine loukmu.

² Heitoubi ani chingyaa, frul tara, touri Lhangaimakei Pu, nimanung Satanya manwurbi - heitoubi thirruini phonphopbine kum lishing khat khoukur.

³ Heitoubi Thangringne aya mayu naimak thleipurra khingsundawurbi, hang chalphopkur, heitoubi siman nambaangkur, heitounei ngamrou ani kum lishingkhat yenluibongyen hu lim khatyakhi minamchangmarou. Heihillouri ayari kheen lepchanungei malhetthutpirou.

⁴ Heirouri Krungbomrap, heirou heiyei doura ombi klei thimi rapnung pichar tounei mantrangya pikur keine muwurla. Heirou Jesuei muyerpikur chimtlou heirou Dunpuei paolaa shunthutpinei ngamrou hiyerkur thimi rapbei lhawai rapkhi keine muwurthula. Yari yaya nimanung heiyei lhaya khrumkhoumak, heitoubi yai machalra nimanung hutbangra heiyei mu'kna siman lhakhi touri mu'kna hutlha nambaangkhoumak. Yane katringthutbi Christakou kalhonbi kum lishingkhat Krungnakni thrungkhoula.

⁵ (Heitoubi hikur thimirap dei nammari kum lishingkhat luibongyenri ringthutmak.) Awane lamkriyei khirouwei ringthutkur hoirou.

⁶ Lamkriyei ringthutnarei kyao thimirap heiri nungkngai heirou likarsui lhangai hoirou. Khnui tlungei khi heine yaidoura manikhoumarou; yari Dunpueikhi heirou Christaeikhi Suipi Purap hoirouwa; heirou yane Christale kalhonbi kum lishingkhat thrungeirou.

Satanya Manekur

⁷ Heirouri kum lishing khat heiwaya yenluikur hillouri, Satanyari phonphopbi khounarei malhetthutrou,

⁸ heirou ani wathukbi tlaipangpal karyouni chekkurbi klei lim namyerwaya, touri Gogle Magogya minamheirou. Heitoubi Satan'ne ya namyerya raalbomra samadrurei shitnruinak chungni ungmartilheirou.

⁹ Heirou yane tlaipangpal karyouni chekkurbine, heitoubi Dunpuei thimi rapbei rungbomya heirou Aiyei malungshipibi klei khukarthilla kuikoolpiheirou. Heiya Thangmunrei mei yongdabi yaya kaangtummurou.

¹⁰ Heirouri yaya minamkur Lhangaimakei pu heiyari, Yaa heiyale chimmakkei thimkhuiya lamkriyei khinglhakurna bi kantyei meikhurra khinglhakur; heitoubi yane bi heirou masa-nunghang trimkur naimakne mrim-knangne leiheirou.

Luilhakna Pichar

¹¹ Heirouri tangkur khngou Krungbom khatle heiyei doura ombi klei Pu heiyakhi keine muwurla. Heitoubi Tlaipangpal heirou Thangmunram khintamne Airouwei trukurbine yaya hanui kallengne muphamakura.

¹² Heirouri Krungbom maibongra mayungbi klei tang-mandi naimakne hikur rapya keine mukur. Lailikrap heiri laatdurla, heirou lailik dei khatkhi, touri Khringei Lailik heiwakhi laatdurla. Heirou lailikrap heiyei rillei mayelhakur hilthungne yaiyaiyei touwurkhou lhou rapbei hilthungne yaya pichar toupikur.

¹³ Heitoubi samadruni aiyei rillei klei khi rapya pithutdurla. Heirou Khi heinekhi, heirou khiya ramnikhi yaiyei rillei klei khi rapya pithutdurla. Heitoubi ya namyerwaya yaiyaiyei touwurkhou lhou rapbei hilthungne yaya pichar toupikur.

¹⁴ Heirouri khi raple heirou khiya ramya meikhurrei samadru rilla khinglhakurla. (Meikhurrei samadru heiri khnui tlungei khiya ram.)

¹⁵ Heirou Khringei Lailikra mayelhaknarei yaomak thimirap heiri meikhurrei rilla khinglhakurla.