KANRETHUTPI 2 - KHYINGEI PU'TLOU Bible (BSI)

Ephesus'nung Maye Lhangai Pao

¹ “Ephesus Churchrei Thangring'nung mayepilei. “Ari aiyei thya lhangrei hutra sorwa enitam shinbine, heirou sinayei meishar dunna meitharl enitamei tlakra karwaichabi klei Pu airouwei lhangaiyei paolaa.

² Nangne koulhou touwurlawo touri Keine mulei; heirou nangne kounak krakni lhou churbi klei heirou kounakbil kanthram kheine kleiyo toukhi Keine mulei. Heirou Keine mulei touri nangne lhangaimak thimi rapya douheimakura, heirou chimkhi-chimmakni yai'mshane paocha thimi rapme toubi klei rapya nangne marshakthibi yari mandal thimi rapme toubi neiyei raphathutkur heiya Keine muwurla.

³ Nari Keinungei'tlim kanthram kheine klah dou thimi, heirou nane naiyei uklumya hil karshonmak thimi rapkhi hoilei.

⁴ Heiya naya keiyei yanimakri arime. nane Keiyari lamkriyei malungshipikur heinaksi asinungri Keiya malungshimaklei.

⁵ Nari kounakbil tlane hil karshonnurawo toubi khalthilak! Heitoubi nane nai borh'rouwei kallekthutlak, heirou nane haallei toukhou nakrimne toulak. Nai borh'rouwei nane kallekthutmaka'nungri, Keine nanungei yongbi heirou naiyei meishar dunna meitharl heiya aiyei birouwei louheirou.

⁶ Heiya naiyei kningri asitoubi leilei. Nicolaitan rapne keiyei tounakrimni toubi klei heiyari nangne machinlei.

⁷ “Khna klei thimi a heine, Lhawaine Church rapnung kouya yunleiyotou heiya ninglhaklaksu!” “Raal manikur thimi heinungei Keine Dunpuei paradise yekul rilla pukbi klei khring chaanyei heengtrungrei hei heiya chayernanungei yapieirou.

Smyrna'nung Maye Lhangai Pao

⁸ “Smyrna Churchrei Thangring'nung mayelei. “Paocha awari lamkrikhi heirou kluikhi khoi, heirou hiwurbi hanui kallengne ringthutkur Ai'rouweime.

⁹ Keine neiyei klah heiwaya mulei; heirou nangri kanring, heiya nangri tanghakni dunme touri keine mulei. Heirou Jehudia'khi nimakne yai'mshane Jehudiame toubi kyun thimi rapne naya lhangaimak tloune karhani yunkur heikhi keine mulei; yari Satan rullei thimirap!

¹⁰ Nai klah-knang dourou kyou heiyei ngamrou koukhi chimakniya. Louningpilo! Ngamri Satan'ne na thaya kulrilla khinglhakbi marshakthirou waiyoulei, heirou nangne tlaini chipnibil klah-knang phaeirou. Nangne khi ramphane malungamkna khoine leiyalo, heirou Keine neinungei raal maninei klahman khoine khring chaanya pirou.

¹¹ “Khna klei thimi a heine, Lhawaine Church rapnung kouya yunleiyotou heiya ninglhaklaksu! “Raal manikur thimi heiyari khnui tlungei khi heine thirchangmakrou.

Pergamum'nung Maye Lhangai Pao

¹² “Pergamum Churchrei Thangring'nung mayelei. “Pao-laa ari thyoi-thyara klei tuikhrat shonkhyang shinbi klei Ai'rouweime.

¹³ Nai leina bi heiri Satanyei krungbomme touri Keine mulei. Nangri Keiyei malungamkna thimi, heirou Satanyei bira Keinung'tlim malungamkna khoine mayungpi thimi Antipas'ya hatdei kaalnung ramphane nane Keiya uklum heiri hil kallengmaklei.

¹⁴ Heiya Keine naya yanimak lhoubom tha leilei. Naihangra thimi thane Balaam'yei shunmatupi rapya, heirou Balak'ya shunmatupibi Israellei thimi rapya koutou malhimbine heirou thrailha rapnung makatkur put rapya chamaiyerbi, heirou chorit naimakei lhou rapya touyerbi borhyernanungei shunmatupi tlou rapya hil chanthungkur leilei.

¹⁵ Heinakrimni nane naihangra Nicolaitan rapbei shunmatupi tlou rapya hil-chanthungbi kleikhi yaolei.

¹⁶ Heini, asinungri nane nai borh'rouwei kallekthutlaka! Heitoubi nane kallekthutmaka'nungri, Keine nanungei khrangne yongbi heirou thimirap heiya Keiyei murrei wathuk shon-khyangle kalhonne yaidoura raal darouwa.

¹⁷ “Khna klei thimi a heine, Lhawaine Church rapnung kouya yunleiyotou heiya ninglhaklaksu! “Raal manekur thiminungei Keine muei klei mannaya piheirou. Heirou Keine yanungei pharou kyou thimi raptom nimakne, thimidei hunekhi muchangmak rannei min mayelhakur thlungpak khngou khat piheirou.

Thyatira'nung Maye Lhangai Pao

¹⁸ “Thyatira Church'rei Thangring'nung mayelei. “Pao-laa ari Aiyei mitni meithlan naksine albi klei, heirou Aiyei honi rsilmathaikur kulshan'naksine albi klei Dunpuei Chanapawarei.

¹⁹ Nangne koutoubi kleiyo touri Keine mulei. Neiyei malungshi khei, neiyei malungamkna khoi, neiyei watlhou lhangai, heirou neiyei kanthramkhei heiri Keine mulei. Nangne lamkriyei toukuryakhi duine lhangaini touleime toukhi Keine mulei.

²⁰ Heiya Keine neiya yanimakri arime, ai'msha-aitamne Dunpuei paocha thimi khatme toubi yunthut napuiya Jezebel'yari nangne yapiwurla. Aiyei marnopikurap heine Keiyei shok rapya chorit naimak lhouya tounanungei lamra ruilhaklei, heirou thrailha rapnung makatkur put rapya chamaiyerlei.

²¹ Ayari Keine aiyei borh'rouwei ukning hungnanungei kheen piwurla, heiya aneri aiyei chorit naimak lhourouwei kallekthutnimaklei.

²² Heingammei ayari Keine akou kanthrinni chorit naimakei lhou toumalnakur thimi raple pulne mrim-knang douyerna'nungei khumdoura khingbangeirou. Heirou yane akou kanthrinni touwurkhou lhangaimak lhou raprouwei ukning hungbongyen Keine yayari mrim nangyerou.

²³ Heitoubi Keine aiyei hilla chanthung rapyakhi hatrou, heirouri Church kantangni Keiri thimi kantangei ukningyakhi heirou kningyakhi kmu Pume toubi Keiya murou. Keine thimi kantangnungei yaiyaiyei touwurkhou lhouyei hilthungne klahman piheirouhui.

²⁴ “Heiya Thyatira'rei klei thimirap na deiri anaksi lhangaimak shunmatupinara chanthungmaklei; heirou nari thimi dei rapne, ‘Satanyei klu tlou rapme’ toubi kyun heiyari marnomaklei. Heinak thimirap nanungei Keine yunlei touri Keine naidoura putkhrit deiri koukhatkhi khangbangpimarou.

²⁵ Heiya Keine yenkalleng'bongyen nai haallei youbi klei heirouwei chetni churphopbi leilak.

²⁶ Heirou Keiyei touyerkni hilthungne klui rampha lhou toubine raal manikur thimi rapnungei Keine Keiyei Pawarei phakur mane-mantrang heinakrimni, yanungeikhi piheirou.

²⁷ Keine yayari thimi lim rapbei doura thrungnanungei mane-mantrang piheirou, heitoubi ayari yaidoura thirrei shungkrokya shinbine thrungyerbi, phuwan rapya baiyerkur heinakni yaya harhar dani umbaiyeirou.

²⁸ Heitoubi Keine yanungei ningshunyei Kafla piheirou.”

²⁹ “Khna klei thimi a heine, Lhawaine Church rapnung kouya yunleiyotou heiya ninglhaklaksu!”