KANRETHUTPI 19 - KHYINGEI PU'TLOU Bible (BSI)

¹ Heitoubi lhourap heiyei hillouri Thangmunra thimichung kartilbi ungraonei hounaksi khatne atoubi kyun keine mayekkur, “Dunpuya mathanglei. Ngamri Ralthutpikhi, thang'alkhi heirou mantrangkhi kaiyei Dunpueithil!

² Heitoubi tharmule chimri Aiyei pichar! Tlaipangpalya chorit naimakei lhouni borhkyer napuiya heiyari Ane klal dayerlei, Dunpune heinaksi napuiya heiyari Aiyei shik rapya hatdurnei ngamrou tanti piwurkhou.”

³ Heirou yane hanuikhi kat'ungraothu, “Dunpuya mathanglei! Tangdui khulilya kaangtlummurna meikhu heiri trim naimakne traibaangbi leilei!”

⁴ Heirouri Yama upa napung somnile phaline, heirou lhawaipal chiwi phalitamnekhi kanellhakbi, Krungbom doura ombi klei Dunpuya khrumbine leilei. Yane kyun, “Amen! Dunpuya mathanglei!”

Yaoshunyei Nulounei Kneilhun

⁵ Heirouri Krungbomrei hou khatne atoubi yukshun, “Kai Dunpuei shikrap, heirou Aya rikrai khrumbi klei thimirap, tang-mandikhi naimakne, na namyerwani Dunpuya mathanglaklo!”

⁶ Heirouri thimichung kartilnei houya, yui chunsundanei, heirou marwan danei hounaksi khatkhi keine loumayekkur. Yane atoubi kyunya keine loumayek, “Dunpuya mathanglak. Ngamri kaiyei Mane-Mantrang Pu Dunpu heiri Krungme!

⁷ Kane nungkngai hoiyase, heirou langthouwase; kani Aiyei toumane heiwaya mathangase! Kouweiyo toulanungri Yaoshun heiyei Nulounei Kneilhun heiri hungtlungura, heirou Aiyei nu heine kneilhun heinung'tlim Aitamne kansambi leiyura.

⁸ Aiyei kansamna'nungei khngou-marthingei phaikhring shamb heiwari anungei piwurla. (Phaikhringei shamb heiri Dunpuei thimi rapbei lhou'lhangai heirime.)”

⁹ Heirouri Thangring heine keinungei kyun, “Arapya yukmayelhaklak. Yaoshunyei Nulounei Kneilhun heiranung unglhakkur thimirap heiri nungkngai hoirou.” Heitoubi Thangring heine yukyunthu, “Tlourap ari Dunpuei chim tloume.”

¹⁰ Heirouri keine aya khrumnanungei aiyei hopongra kanellhakna'rouri ani keinungei loushun, “Heisi tourimakhuilo! Ngamri keiri neiyei shik hoimalkna palui khatme, heirou neiyei teinao rapbei, touri Jesuni yanungei mutpikur chim tlou rapya shinbi klei thimi rapbei palui khatme. Dunpuya khrumlaklo!” Ngamri Jesuei mutpikur chim tlourap heiri thimkhui rapnungkhi shunmatupikur heirapri.

Sapuk Khngou Dourei Tungbi Klei Pu

¹¹ Heirouri Thangmunram laatbine klei heiwaya keine mukur, heitoubi bi heirou sapuk khngou khat klei. Heirou heiyei doura tungbi klei Pu heiwari ‘Malungamkna’ heirou ‘Chim’ toubi unglei; heirou Ane chimmei Picharyadik toupilei, heirou tharmuei raalbomkhi kardoulei.

¹² Heirou Aiyei mitlungri meithlan naksi, heirou Aiyei lura lukhup chungwane makhuplei. Heirou Upawa Aitamne kmu nimakne thimidei hunekhi muchangmak min Anungei klei.

¹³ Heirou hee khrephang linglikchul khatkhi knaa. Aiyei minri “Dunpuei Tloulhang,” toubi ung.

¹⁴ Thangmun ramrei raallui rapne sapuk khngouya tungbine heirou khngou phaikhringei shambni kansambi Aihilla chanthunglei.

¹⁵ Aiyei murrouwei tuikhrat raalshon khat wathuklei, raalshon heiwaya shinbine thimi lim rapya Ane raal maniheirou. Heitoubi Ane yaidoura thirrei shungkrok shinbine paalleirou, heirou Ane Toumani Dunpuei meithukni malungkhanei darkha shumnabi heiwaya tatphopbine leiheirou.

¹⁶ Heirou Aiyei linglikchul dourale Aiyei pheikhnang dourakhi min khat, “Krung rapbei Krung, heirou Pu rapbei Pu,” toubi mayelei.

¹⁷ Heirouri Thangring khat kinniyei doura ombine klei keine muwurla. Heirou nungthourei traichabi klei ramwaa rapnung hou choune kyun. “Wawalo, Dunpuei tangni kneilhun markhulnara wachangalo!

¹⁸ Wawalo, heitoubi thimi nammaei Krung rapbei, raallui upa rapbei, heirou raallui rapbei, sapuk rapbei, heirou sapuk dourei tung thimi rapbei, shok rapbei, heirou pu rapbei, tangkhi heirou mandi thimi rapbei sharungei mitee rapya kar'umbine mailakalo!”

¹⁹ Heirouri yaa heiwale tlaipangpallei Krung rapne yai raallui rapkou kartilbi heirou sapuk dourei tungbi klei Pu heiwale aiyei raallui rapya raal kardounanungei marshikkur heiya keine muwurla.

²⁰ Heirou yaa heiwari aiyei maibongra kngakei lhou toukhou chimmak thimkhuile kalhonne manbi kulrilla chalphopburla. (Heinaksi kngakei lhou rapbei ngamne ani yaa heiyei simanlha nambangkur thimi rapya, heirou yaa lhaya khrumbi klei thimi rapya minamkurme.) Heirou yaa heiyale chimmak thimkhui yakhunta heiyari kant kaangyerbi klei meikhurra khringni khinglhakur.

²¹ Heitoubi yaiyei raallui rapyari sapuk doura tungbi klei Puwei takarei heishothutkur raalshon'ne shaat'hatkur; heirou ramrei waalim-yoolimrap nammani yai sharung rapya ukthoni kroeimkhei mailoukur.