KANRETHUTPI 16 - KHYINGEI PU'TLOU Bible (BSI)

Dunpuei Malungkhanei Daarkep'rap

¹ Heirouri Thangring enitam'nung Pucheemrei hou chou khatne atoubi kyunya keine mayekkurla. “Nane yongbi heirou tlaipangpalra Dunpuei malungkhanei daarkep enitam heiwaya shungsundalak!”

² Heirouri lamkri Thangringne yongchumbi tlaipang doura aiyei daarkep heiwaya shungsundakur. Heisi tounarouri yaa heiyei mu'kna hutlha popkur thimi raple heirou yaa lhaya khrumbi klei thimi rapnung chi'knayei shakrung khoine khyem'kna mseini thimkur.

³ Heitoubi khintam tlung Thangring heiwane aiyei daarkep heiya samadru rilla shunglhakur. Heirouri samadruei yui heiri hikur thimiyei heenak heiholkur, heirou yuirillei ringbi klei chiwirap namyerwa hiwurchi.

⁴ Heitoubi khyumtam tlung Thangring heiwane aiyei daarkep heiri kungtang raple heirou kungban rapra shunglhakur, heirouri kungrap heiri hee holwurchi.

⁵ Heirou yui dourei thikulpibi klei Thangringei kyun hou khat keine mayekkur, “O asinungkhi heirou bongnungkhi ringbi louklei Khyingei Pu, Neiyei pichar toupikur heiri chimhakme!

⁶ Yane Dunpuei thimi raple thimkhui rapbei heeya shungsundawurla, heisitoubi Nangne yaya hee khoine pimongurla. Heirou yai phabom thukya yane phabine leilei!”

⁷ Heirouri khrahpal heirouwei houkhat keine loumayekkur, “Mane-Mantrangei Pu Dunpu! Tanghakni Neiyei pichar heiwari chimhakme!”

⁸ Heirouri phalitam tlung Thangringne aiyei daarkep heiri kinni doura shungbaangkur, heitoubi tlaipang thimi rapya kinniyei meishane kaangyerkur.

⁹ Heisitoubi yaya kinniyei meishane kaanghatkur, heirou heinaksi thraiknayei doura pu hoibi klei Dunpuei minya yane manchokur. Heiya yane yaiyei borh'rouwei kallekthutbine Dunpuei toumaneya mathangkhoumak.

¹⁰ Heitoubi phangatam tlung Thangringne aiyei daarkep hei yaayei Krungbom doura shungbaangkur. Heirou yaayei Krungkul heiri kmehni kuiphopbi leikur, heirou thimi rapne nawurnei ngamrou yai malei chikphopbi leikur,

¹¹ heirouri yane nawurnei ngamrou, heirou yemmurnei ngamrou Thangmunrei Dunpuya manchokur. Heiya yaneri yaiyei borh lam'rouwei kallekthut'khoumak.

¹² Heitoubi thruktam tlung Thangringne aiyei daarkep hei Euphrate Kungtangra shunglhakur, heirouri kulkung lhangrei hungbi klei Krung rapnung lam laatpinanungei kungtang heiri yui yenheepkur.

¹³ Heirouri uitrok kmal hyingmak lhawairap khyumtam keine mukur. Uitrok kmal lhawairap heiri chingyaa heiwayei murrouwei, yaawayei murrouwei, heirou chimmak thimkhuiyei murrouwei wathuk.

¹⁴ Yarap heiri kngakei lhouya touthutbi klei Satanyei lhawairap. Lhawai khyumtam heine tlaipangpallei Krungrap nammaya, Mane-Mantrang Dunpuei tangkur Tlainiyei raalbomranung yaya ungmartilnanungei chawura.

¹⁵ “Louningpilaklo! Keine mucha thiminakni yongeirou! Heine iplhakmakni mitkhringni klei heirou aiyei phirulya karbilni kansambi louklei thimi heiri nungkngai hoirou, heiyanungri a heiri khulbungei maibongra phirul yaomakni karwaichabi rikrai phanungeibom makrou!”

¹⁶ Heitoubi lhawairap heine Krung rapya Hebrew tloura Armageddon toubi ung bi heirou lokpani ungmartilkur.

¹⁷ Heirouri enitam tlung Thangring heine aiyei daarkep heiya marthee hangra shunglhakur. Heirou Pucheem rilwairei Krungbom'rouwei hou khatne kalni ungraothutkur, “Awari luilhakurla!”

¹⁸ Heirouri liptlai kat'alkurle, marwanyei houle heirou chi'knayei shakrung hoikur linglaangkhi khngaakkur. Heirouweine tlaipang thimi sheemtirrei waiyoubi heinaksi linglaang khngaakri tekkhi thuk'khoumakhui; linglaang khngaaknarou anedui thuithikur!

¹⁹ Heirou khukarthil tangwakhi sungkhyum thukni baikur, heirou khokul namyerwaei khukarthil rapkhi maangurchi. Heirouri Dunpune Aiyei meithukne malungkhanei daarkepya mongyerkur Babylon tangkur khukarthil heiwaya ningthutkur.

²⁰ Heirouri tuymakpung namyerwakhi mangkur, heitoubi lhunglim namyerwakhi tlummurchi.

²¹ Heirou nungheikhi khatkhatrou khrungkok somngaeimal khritni thimi rapbei doura nungthourei rosundakur. Heirouri thraikna heinung'tlim Dunpuya manchobine yunkur, ngamri thrai kna heiwari beimak chi'knayei shakrung hoikur.