KANRETHUTPI 13 - KHYINGEI PU'TLOU Bible (BSI)

Yaa Khintam

¹ Heirouri keine samadrurei yaa khat kathuk loukmu. Aiyei chee chiptam heirou lu enitam klei; heirou aiyei chee kantangei dourane lukhup khatsol kyao, heirou aiyei lu kantangei dourane Dunpuya laoknayei min khatsolkhi kyao.

² Heirou yaa heiwari thiyei kaalnung humetangei sharungkhi kmal, heirou aiyei hobur rapri yekthrum kmal, heitoubi murrari yangkongkhi kmal. Heirou chingyaa heine anungei aiyei mantrang, aiyei Krungbom, heirou aiyei mane-mantrang namyerkhi pikur.

³ Heirou yaa heiyei lu khatri thuithini yemkurkhi kmal, heiya yemnabi heiri dammura. Heirou tlaipangpal nammani aya ngakkur, heirou aiyei hilla chanthungurchiya.

⁴ Thimi nammani chingyaa heiya khrumwurchiya, ngamri ani aiyei mane-mantrang namma yaa heinungei pilhakur. Heirou yane yaa heiyakhi khrumbine atoubi kyun, “Yaa awanakri hu leilei? Heirou aya raal kardoubi manirouri hu leileiyo?”

⁵ Heitoubi tangchaei tlou heirou Dunpuya lhouhoimakei tlouya yunnanungei yaa heiwanungei mur piwurla, heirou anungei tangla tlun somlile-khnibil mane-mantrangei lhou tounanungei yapiwurla.

⁶ Heirouri ani Dunpuya aiyei minyakhi, aiyei leina ramyakhi heirou Thangmunrei klei namyeryakhi manchobi laonanei tloune yunyoukur.

⁷ Heirou ayari Dunpuei thimi rapkou raal kardourilnungei heirou yaya maniyernanungei yapikur, heitoubi cheemkhur kantangei, lim kantangei heirou tloulim kantangei dourakhi anungei mane-mantrang piwurla.

⁸ Heitoubi tlaipangpal kanrebongei hatdurkhou Yaoshunyei khring lailikra min mayelhakmak tlaipang thimirap namyerwani aya khrumheirou.

⁹ “Heiyanungri, khna klei thimi rapne ninglhakpilaksu!

¹⁰ Huhune kul chalphopburnung bom hoiyanungri ayari yulmakni kul chalphopbeirou; heirou huhune raalshon'ne hatdurnungei bom hoiyanungri aya raalshon'ne yulmakni hatdurheirou. Anaksi lhourap awane Dunpuei thimi rapya uklum chetni kanthram heinanungei tou.”

¹¹ Heirouri keine yaa dei khatkhi tlaipangrei wathuk muwurthu. Yaa heiri lura yaonakni chee khintam klei, heirou yaa heine chingyaaei tlou kyunnakni tlou kyun.

¹² Heitoubi lamkri yaa heiyei mane-mantrang namma heiya ani aiyei maibongra yrengchakur. Heirou ani tlaipang thimi nammayakhi heirou heiyei doura ringbi klei yoolim-waalim nammayakhi khi'kyayei yemnarei raikur lamkri yaa heiwaya khrumyerkur.

¹³ Khintamtlung yaa heiwane kngakei lhourap kounak touthutkur; heirou ani nungthou lhangrei tlaipang doura mei yongdayerbi thimi kantangei mit'thrilnara mu'kna lhourap tangtang mutpikur.

¹⁴ Heirou ayari lamkri yaa heiyei maibongra kngakei lhourap kounakya touyerbine tlaipangpalra ringbi klei thimirap nammaya manikur. Heirou yaa heiwane yanungei shunbi, haallei raalshon'ne yemmurbi heirou ringbi klei yaa heiyei maibongra aya rikrai khrumkna khoine yaalha khat sabaangyerkur.

¹⁵ Heitoubi khintam tlung yaa heiwane yaalha heiya nil sholhakyerbi ringyerkur, heisitoubi yaalha heine tlouyun manikur, heirou aya khrummak thimi rapya ani hatyerkur.

¹⁶ Heitoubi yaa heiwane thimi nammaya, tang-mandi naimakne, dun thimi-kanring thimi rapkhi naimakne, shokrap heirou shok nimakrap naimakne, ya nammaya yai thyarei hutbangra, nimanung machalra hutlharap nambangpikur.

¹⁷ Heisitoubi thimi hukhatnekhi hutlhahei yaomakni touri yaa heiyei min nimanung heiyei minkhlang mu'kna mshing shernanungei yaomanungri koukhatkhi klokhi yamakrou, nimanung yorkhi yamakrou.

¹⁸ Arouwei mulhaknanungei roushingkhei leilei. Huhune shingkhei hoiyanungri, ane yaa heiyei minya mu'kna mshing heiya sherthilaksu, ngamri mshing heiri thimi khatdei min. Heitoubi mshing heiri macha-thrukle somrukle thruk.