KANRETHUTPI 12 - KHYINGEI PU'TLOU Bible (BSI)

Napuiya Khatle Heirou Chingyaa Khat

¹ Heirouri nungthoura kngakne lha tang khat muyerkur. (Bi heirou napuiya khat louklei) Aiyei shambni kinni naksi, heirou aiyei ho daakrane tanglanak, heitoubi aiyei lurane sorwa lha chiple khniyei lukhup khatkhi makhuplei.

² Heirou napuiya heiri nao-ur, heitoubi nao puknei mrim-knang heine aya ungraochayerkur.

³ Heitoubi nungthoura kngakni lha khatkhi muyerkur. Nungthoura chingyaa mrao tang khatkhi, aiyei lu enitam krung, heirou lu rapra chee chiptam thuklei, heirou aiyei lu rapra lukhup khatsol makhuplei.

⁴ Heitoubi aiyei khmeini nungthourei sorwa rapya siruk khyumtamei khat taanglouheibi heirou sorwa rapya tlaipang doura khingsundakur. Heirou ani napuiya heiwiyei nao yukpukthutle tallengne loumainanungei aiyei maibongra mayung-ngaakbi leikur.

⁵ Heirouri ani Chanapawa khat, thirrei shungle kalhonne lim namyerwayei doura thrungnanungei pukpiwurla. Heiya nao heiri tallengne Dunpuei bomra heirou Aiyei Krungbomranung loubangurla.

⁶ Heirouri napuiya heine Dunpune anungei marshikpikur ramhangra trukyulwurbi, heitoubi bi heirou aya tlaini lishing khatle macha khnile somrukbil yukthutpikur.

⁷ Heirouri Thangmunra raal khat thukkur. Michael'le aiyei Thangring rapne chingyaa'le heirou aiyei Thangring rapkou kalhonne raal kardourilkur;

⁸ heiya chingyaa heine raal manemakkur, heirouri ayale aiyei Thangring rapya heiyei hillouri Thangmunra tlani leiyermakkur.

⁹ Heirou chingyaa tang touri bongnung Satan toubi ung tlaipangpalya klal dayerkur frul heiyari pura khingthutkur. Heitoubi ayale aiyei thangringrap nammayakhi akou kalhonne tlaipangra khingsundakur.

¹⁰ Heirouri Thangmunra hou choune yukyun khat keine loumayekkur, “Asinungri Ralthutpina bomkhi, mantrangkhi, kaiyei Dunpuei Krungbomkhi heirou Aiyei Christaei Mane-mantrang heiri yongura! Ngamri Dunpuei maibongra mayungbine masa-nunghang naimakne kaiyei teinao rapya klal dayerbi klei heiwayari Thangmunrei khingthutdurla.

¹¹ Kaiyei teinao rapne Yaoshunyei heeyei ngamne heirou yai shunthutpibi klei chim heine aidoura maniwurla; heirou yane yaiyei rongchanya makatdurbi hipikurkhi maniwurla.

¹² Ngam heineri Thangmun ramkhi heitoubi bi heirou klei na namyerwakhi nungkngai hoiyalo. Heiya tlaipangpalle samadru heinungri kounakni thuithikurawo. Ngamri Satan'ne nanungei yongchummura, heirou ari meithukni malungkhawura, ngamri anungei kheen lepchangeiyame touri ani kmu!”

¹³ Heirou chingyaa heiwane ayari tlaipangra khingsundawurlame toubi ningmukur heirouri, ani Chanapawa khat pukbi klei napuiya heiwiya klah-knang pinanungei marhotyoukur.

¹⁴ Heirouri napuiya heiwinung aya kum khyumle lhang'khat chingyaaei marhotnarei klah dayermakni leiyerna'nungei bi ramhangra traiwurna'nungei malaang tang khatdei shanakni khintam pikur.

¹⁵ Heisi tounarouri chingyaa heiwane aiyei murrouwei napuiya heiwiya kungrei yuitangni trailoukur naksine martlaolou'nungei toubi aiyei hilla mraowei tuywok heimathukthutkur.

¹⁶ Heiya tlaipangpalni napuiya heiwiya trungpikur; heirou chingyaaei murrouwei heimathukthut tuywok heiwiya thleini taka kat'aangbi loumadulkur.

¹⁷ Heitoubi chingyaane napuiya heiwiya meithukne malungkhapikur, heirou aiyei yu-cha rapyale Dunpuei chaylam rapya hilthung thimi rapya, heirou Jesu'nungtlim mayung thimirap namyerwaya raal kardourilnanungei shaalkur.

¹⁸ Heitoubi chingyaa heiwane samadru ruira mayungbine leikur.