KANRETHUTPI 11 - KHYINGEI PU'TLOU Bible (BSI)

Tlou Myungpi Khintam

¹ Heirouri keinungei thiyeinung shungkrok kmal ramholna chei khat malanpiwurbi kyun, “Wabine heirou Dunpuei Cheemle, heiyei rillei khrahpal heikhi holmarkhelak, heirou Pucheem rillei Pukhrumbi klei thimi rapkhi namyerwa mshing kansherlak.

² Heiya Pucheem heiyei yuntlangmai heiri holmarkhemak, ngamri purei bomrap heiri Khyingei Khulil doura tangla somlile khnibil lim deiyei thimi rapne tatmnuiwurnungei pithutdurla.

³ Bi heirou Keiyei tlou mayungpi thimi hoinanungei Keine napung-khni yenmalhetrou, heirouri yane phaikhringei phiya upbine, heitoubi tlaini lishing-khatle macha-khnile somrukbil Dunpuei paolaa shunthutpirou.”

⁴ Tlou mayungpi napung-khni heiri tlaipangpalra Dunpuei maibongra mayungbi klei olive-trung khintamle heirou meishar dunna meitharl khintam heirapri.

⁵ Heirou hukhatne yaya hotmaangnanung wairaanglanungri, yai murrouwei meithlan mathothutbine heitoubi yaiyei yeekna thimi rapya maangyerou; heirouri heinakrimne huhune yaya maangyerlanungri, heinakya hatdurou.

⁶ Yane nungthouya nungkhi royermakne thungkurkhi maninei mantrang klei, heitounei ngammei yane Dunpuei paolaa shunthutpiyei kaalnung nungkhi romakni leikur. Yane yuiputrei yuiyakhi hee holyerwurnei mantrang klei; yane thlei dourakhi, yai pisunda'kni kheen kantangrou limlimyei kna'sa thukyerneikhi mani klei.

⁷ Heirou yane yaiyei paolaa shunthutpi luilhakur heirouri, mayu naimak thleipurrei kathuk yaalim heiwane yakou raal kardourilleirou. Heitoubi ani yaya raal maniwurbi heirou yaya hatdurheirou.

⁸ Heirouri yai khi'lhungrap heiri, yaiyei Upawaya hatdurna bi khukarthil tangwaei khullamra phneibi khouheirou. Khukarthil heiwaya mu'knari Sodom, nimanung Egypt toubine ung.

⁹ Heitoubi thimilim nam'rouwei, phunghlim nam'rouwei, heirou tloulim nam'rouwei thimi rapne yaiyei hikur sharungrap heiyari, yaya phumkhi phumyermakni tlaini khyumnile lhang'khatbil thibine leirou.

¹⁰ Ya napung-khnine hiwurnei ngamrou tlaipangpallei thimi rapne haraoweirou. Heitoubi yane khatle khat hutthul pirilbine nungkngaiyei knei tlun-khi touheirou, ngamri ya thimkhui khintam heiwane tlaipang thimi rapnung klah-knang chungni piwurkhou.

¹¹ Heitoubi tlaini khyumnile lhang'khatdei hillouri Dunpurei khringei nilso yongpibi yanungei changpikur, heirouri yane kanthoubi mayungkur; heirouri yaya mukur thimirap namyerwani chi-kanchunni leikur.

¹² Heirouri thimkhui khintam heine Thangmunrei yakhuntanung yukshun houkhat loumayekkur, “Bi ara kawalo!” Heirou yai yeekna rapne thiyeinung, yane ramei doura tungbi Thangmun'ranung kakur.

¹³ Heitoubi kheen heihakrou linglang kalne khngaakkur, heirou linglang khngaakninung thimi lishing-eni hikur. Heitoubi maleithung thimirap namyerwa heiri chi-kanchunkur, heirou Thangmunrei Dunpuei toumane heiwaya mathangkur.

¹⁴ Khintam'tlung klah-knang heiri yenrallura, heiya khyumtam tlung klah-knang heiri khrangne hungthukrouwa!

Enitam'tlung Pengkul

¹⁵ Heirouri enitam tlung Thangring heine Aiyei pengkul heiya yukkhungkur, heirou Thangmunra hourap heiri atoubi kalne kyun, “Asinungri Tlaipang doura Krung khoine paalnanungei mane-mantrang heiri kaiyei Pu heirou Aiyei Christanung leiyura, heirou Ane klui naimakne thrungeirou!”

¹⁶ Heirouri Dunpuei maibongra Krungbom dourei ombi klei Yama uparap somnile phaline yai mairung sikhuplhakbi Dunpuya khrumbine atoubi kyun.

¹⁷ “Asiyeikhi heirou bongei waiyoubi louklei Mane-mantrangei Pu Dunpu! Kane Neiya mathanglei touri Nangne Neiyei tangkur Mane-mantrangya loubine heitoubi Pu khoine paalyouwura!

¹⁸ Dunpuya mumak thimi rapne thuithiyei malungkhani thimmura, ngamri khi thimi rapya pichar tounanungei Neiyei meithukni malungkhanei kheen heiri hungurame. Neiyei shik rapya, thimkhui rapya, heirou Neiya rikrai khrumnabi klei Neiyei thimi rapya, tangkhi mandikhi naimakne klahmanya pinanungei kheen heiri hungura. Heitoubi tlaipangpalya maangyerkur thimi rapya maangyernanungei kheen hungurame!”

¹⁹ Thangmunra Dunpuei Pucheem heiri laatdurla, heitoubi Tlou Mardingpina Theengkung heikhi muwurla. Heirouri bi heirou tliplaiyei kwaarle, marwanyei houle, linglaang khngaakle, heirou nungheine thimmura.