KANRETHUTPI 10 - KHYINGEI PU'TLOU Bible (BSI)

Thangring Heirou Lailik-khyo Mandikhat

¹ Heirouri Thangmunrei mantrang Thangring khatne kyongya keine loukmu. Heitoubi Aiyei lura rameile heirou langthingne karhil allei, heirou Aiyei mairungni kinninak, heirou Aiyei hopar'rap heiri meithlanyei shutlainaksi.

² Heirou Aiyei hutra lailik-khyo mandikhat laatbine shinlei. Heitoubi Aiyei thyarei hone samadru rilla trumbi, heirou Aiyei thyoirei honi thleira trumbine leilei.

³ Heitoubi yangkongei hounak ungraobi kyun. Heirouri Aiyei ungraobi kyun hillouri, marwanyei hounaksi enitamni ungraobi loumallangkur.

⁴ Heirou yane ungraobi kyun hillouri tallengne keine loumayethungnungei marshikkur. Heiya Thangmunrei hou khatne, “Marwanyei hounaksi enitamei kyun heiri mayethutmakni muni khoulak!” toubi yukshunya keine loumayekkur.

⁵ Heitoubi keiyei mukur samadru dourale thleira mayungbi klei Thangring heiwane Thangmunra Aihut lhangbine,

⁶ heitoubi klui naimakne ringbi klei Thangmun, tlaipangpal heirou samadruya Sheempi Pu, heirou heirapbei rilla ringbi klei putlim namyerwaya Sheempi Pu Dunpuei min shinbine tlou kantomkur. Thangring heiwane atoubi kyun, “Arouri kheen theengnungei yamakrou!

⁷ Heiya enitam tlung Thangring heine Aiyei pengkul yukkhungeinung Dunpune Aiyei shik rapnung, thimkhui rapnung shunthutpiwurkhou muei wairangkhou heiwari tlungyerrouwa.”

⁸ Heitoubi keiyei loumayekkur Thangmunrei yukshun hou heine keinungei hanuikhi atoubi yukshunthu, “Nangne wabine heitoubi samadrura heirou thleira mayungbi klei Thangringei hutrei shinbi klei laatbi khoukur lailik-khyo heiya walouwalo.”

⁹ Heitounei keine Thangring'nung wabi heirou lailik-khyo heiri keinung pilaklo toubine wabukur. Heirou Ane keinung loushunkur, “Heiya loubine heitoubi nangne madullaka; heirou lailik-khyo heiri neiyei ukrilla khyur holrou, heiya neiyei murpaalrane khuiningnak shimrou.”

¹⁰ Heirouri keine lailik-khyo heichaya Aihutrei louheibine madulkur, heirou lailik-khyo heiri keiyei murpalra khuiningnak shimkur. Heiya keine madullhakur hillouri, keiyei ukrillari khyur heiholkur.

¹¹ Heirouri, “Nangne hanui kallengne Dunpuei paolaaya thimi nammaei, lim nammaei, tloulim nammaei heirou Krung rapbei ngamrou shunthutpithurou da,” toubine keinungei shunpithu.