KANRETHUTPI 1 - KHYINGEI PU'TLOU Bible (BSI)

¹ Lailik ari Jesu Christa'ne kanrethutpikur lhou rapya mayekhouna. Dunpune Upawanung kanrethutpibi, hillou kou hungthukleiyo toubi aiyei shik rapnungei muyerkur. Christa'ne Aiyei shik John'nung Aiyei Thangringya yenyilbi kanrethutpikur,

² heirou John'ne aiyei mukanrekur lhourap namyerwaya shunthutpikur. Awari aiyei Dunpurei phakur paolaa heirou Jesu Christa'ne kanrethutpikur chim lhou rapbei ngamrou shunthutpikur tlourap.

³ Heitoubi lailik aya pa'thimiri likarsui lhangailei, heirou shunthutpikur paolaaei tlou rapya ninglhakbi heirou lailik heiyei rilla mayelhakur tlou rapya hilthung thimi heiri nungkngai hoilei! Ngamri mayelhakur tlourap namyerwa hei hungthuknanungei kheenri yennakkura.

Church Enitam'nung Karyemnei Tlourap

⁴ Asia Khokulrei klei Church enitamnung John'rei chethi aya manthunthunglei. Asinungkhi, haallei waiyoubi louklei heirou hungrou kyou Dunpurei, heirou Aiyei Krungbom maibongrei klei Lhawai Enitam'reikhi,

⁵ heirou malungamkna khoiyei tlou mayungpi Pu Jesu Christa, khirouwei lamkrini ringthutyerwurbi heirou tlaipangpallei khring rapbei doura thrungbi klei Pu Airouwei kringpi kheile kying heiri nanungei leipiniyasu. Ane kaya malungshipilei, heirou Aiyei makatbi hipikur heiyei ngamne Ane kaya kaiyei borh'rouwei malhetthutpila,

⁶ heitoubi kayari Aiyei Dunpu heirou Pawaya watlhou toupinanungei Suipipu rapbei krungbom khoine sheempiwurla. Jesu Christara thang'alle heirou mane-mantrang heine klui naimak hoiniyasu! Amen.

⁷ Thilak, Ane ramei doura tungbine yonglei. Thimi kantangni, heirou Aya cheine thunkur thimi rapkhi kyaone Aya loumuheirou. Heirou tlaipangpallei thimi lim namyerwani Aiyei ngamrou lhawai klahni kanrilheirou. Moi, heisibil hoiyeirou! Amen.

⁸ Heirou asinungkhi, haallei waiyoubi louklei, heirou hungrou kyou Pu, Mane-mantrang Dunpune yunlei, “Keiri Alpha heirou Omega.”

Christaei Mu'kyer

⁹ Keiri neiyei teinao John, Jesuei hilthung thimi khat khoine Aiyei Krungrammei hoibi klei thimi rapbei doura dabi klei klah-knangya urtrungpi thimi khat khoine nangle kanthram'malkna palui khat. Keine Patmos tuymakpung doura leikhou, ngamri Jesu Christa'ne keinungei muyerpikur Dunpuei chim tlou rapya keine shunthutpikhou.

¹⁰ Heitoubi Dunpuei Tlainirou Lhawaine keiya rkolpibi leiyei kaalnung, pengkul hounak khatne keiyei hillhangrei heikyunya keine loumayekkur.

¹¹ Hou heine atoubi kyun, “Neiyei mukur heirapya mayelak, heitoubi lailik heiri khukarthil enitamra klei Church rapnung. Ephesus, Smyrna, Pergamum, Thyatira, Sardis, Philadelphia heirou Laodicea rapnung malhetpilak.”

¹² Heisi tounarou keine kallekphabi keinungei tlou heikyun heiri huwo toubi louthinarouri, keine sinayei meishar dunna meitharl enitam kallekmukur,

¹³ heirou yaihangra thimiyei Chanapawaei shakrungnak khatkhi, Aiyei hoparbil yongtlungni linglikchul khat naabi heirou Aiyei malungpakra sinayei shinkai ruikhi yeetbi kyao khatkhi keine mukur.

¹⁴ Heirou Aiyei lurei shamkhi yaa'khmulnak, heirou thurnakni khngou, heirou Aiyei mitlungni meithlannak allei;

¹⁵ heitoubi aiyei homaini rsilmathaikur kulshan'naksine allei, heirou aiyei houni yui chunsunda hounaksi.

¹⁶ Ane aiyei thyarei hutni sorwa enitam shinbine heirou aiyei murrei thyoi-thya raa knai tuikhraat shonkhyang khatkhi wathuk. Heirou aiyei mairungni nunghang-tlaikallei kinni alnakni allei.

¹⁷ Heirouri keine aya munarou, keiri aiyei hopongra khi thimi naksine kanellhakbi leikur. Heirouri ani keidoura aihut khoupibi kyun, “Chimaklo, Keiri lamkrikhi heirou kluikhi khoi.

¹⁸ Keiri ringbi klei Pu khatme! Keiri hiwurkhou heiya asinungri klui naimakne ringbi leilei. Keiri khiyei dourakhi heirou khi tlaipangei dourakhi mane-mantrang klei.

¹⁹ Heineri, neiyei mukur rapya touri asiyei klei put rapkhi heirou hillei hungrou kyou put rapkhi khintamrekya nangne mayelak.

²⁰ Neiyei mukur Keiyei thyarei hutra shinbi klei sorwa enitamei, heirou sinayei meishar dunna meitharl enitamei mu'kna heirapri arime; Sorwa enitam heiri Church enitamei Thangring enitam heirime, heirou meishar dunna meitharl enitam heiri Church enitam heirapri.