JUDE 1 - KHYINGEI PU'TLOU Bible (BSI)

¹ Jesu Christaei shik heirou James'yei teinaowa Jude'rei - Dunpune ungthutpiwurbi, Pawa Dunpuei malungshinara heirou Jesu Christaei rkolpina rillei klei thimi rapnungei mayepilei:

² Kringpi kheile kyingle heirou malungshi kheini naidoura thimni leipiniyasu.

Klalni Marnopi Purap

³ Keiyei malungshi'kna paluirap, ka nammane pulni siruk dongrilbi klei Ralthutpina bomyei ngamrou keine nanungei lhangaini mayepinanungei wairangeinung, Dunpune Aiyei thimi rapnung hanuitom pithutkur uklumyei lhou heinung'tlim lhawai kyaoni kardourilnanungei toubi nai ukning thoubaangpibom thukme toubi ningmubine mayepikur.

⁴ Kouweiyo toulanungri, kai hangra Dunpuya uklummak thimirap tha karyeplhakkur leiyura, heinak thimirap heiri yaitamyei kning chorit naimakei lhoura chanenei ngamrou kai Dunpuei kringpi kheiyei ngammei paolaaya lehyerwurbi, heirou kaiyei khattom khoi Pu Upawaya yapimak thimi rapme. Heinaksi thimi rapya pichar tounanungei kheen kounakei maibongrouweini Khyingei Lailikra mayelhakbi loukhouwurla.

⁵ Ngamri heinak namyerwaya nane muwanungkhi, koutoubi Dunpune Israellei thimi rapya Egypt'rouwei hanuitomrou kalthutpibine hillou uklummak thimi rapya mangyerkurro tounei ngamya keine naya ningthutyernilei.

⁶ Heitoubi yai urbomthuk khulruiya duini lamduibi, yai bom'rouwei lakurkhoubi chakur Thangring rapya ningthutlak; yayari Dunpuei beimak tang Tlainirou kluiyei pichar tounanungei toubine daakrei kmehyei bomra klui naimak thirruini phonphopbine khouwurla.

⁷ Sodom'le Gomorrah heirou heiyei karhillei klei khukarthil rapya ningthutlak, khukarthilrap heiyei thimi rapne heinaksi Thangring rapbei touwurkhou lhounaksi chorit naimakni, yai sharungya rikrai naimakni yorbi borhyei lhouya tounei ngamrou: yane mu'kna khoine klui naimak meini yaya pichar toukur.

⁸ Heinakrimne thimirap heinikhi yai rmongra loumubi, heirou heirapne yai sharungya borhyernei lhouya toukur; yane Dunpuei mane-mantrangyakhi lhouhoipimak, heirou Thangring rapbei thang'alyakhi thi'msitbi yunkur.

⁹ Heinaksi tlouri Thangring upa Michael'ne rampha yunthutkhoumak. Heitoubi ane Satankou ngaalyeinungkhi, heirou Moses'yei sharungya lungrilbi tlou rkalrilyei kaalnungkhi Michael'ne Satanyari heinaksi thi'msitnei tloune yunbi aya klal dayerkhoumak, heiya ane “Dunpune neiya yapimak!” toubi yunkhou.

¹⁰ Heiya heinaksi thimi rapne koukhatkhi mu'tlungmakni lhou kantangrou thi'msitdei tloune yunbithil norkhou; heitoubi yaiyei kmu lhourap heirou ramyaa'nakne chanchanarou, heirapne yaya maangyerwurla.

¹¹ Yanungeiri kounak lah'kna lhou hoikurawo! Yane Cain'yei chakhouna lamra chanthungura. Ngamri yane tuy madunei ngamrou Balaam'ne touwurkhou klallei lhoura yaimsha-yaitam pilhakurla. Korah'ne karhayei lhou toukhou'nakne yanekhi karhayei lhouya touwurla, heirou heinakrimne yayakhi maangyerwurla.

¹² Yane nai malungshirilnei chak khangnara polhakbi rikrai mumakni maduphalei. Yane yaitam'tomyei karsukna hoinanungthil thiphabine leiyura. Yari martheeyei urchabi klei nung yaomak rameinaksi hoiyura; heirou yari showangnung ramphane hei heimak heengtrungnak hoiyura. Heinaksi heengtrung rapyari yrungrampha phukkurbi khnui tlungei hiyerkur heinakura.

¹³ Yari yaimshaei rikraikna lhoura marphungbi klei yuiphunnaksi, heirou thuithikur samadrurei yuilhounaksi, heitoubi yanungei'tlim Dunpune khyukni klei kmehyei bom marshikbine khouwurla.

¹⁴ Tlou awari Adamrei yenrankur thruktam tlung yu-cha Enoch'ne kum kounakei maibongrei yai ngamrou yunthutkhou: “Christa'ne Aiyei khying Thangringrap lishing kounakle kalhonbi,

¹⁵ thimi namyerrei doura pichar tounanungei, heirou Dunpu yaomakei lhoutou thimi rapya tanti tounanungei heirou Dunpuya shak mumak borh thimi rapne Aya karhane thuithiyei tlou yunkur heinung'tlim yongeirou!”

¹⁶ Heinaksi thimi rapne kheenserou miyei klalyatom raphabine heirou deiya yanemakni yunbangnanung'tom klei; yane yaimsha yaitamyei toukni lhouyathil toubi klei; heirou yane yaimsha yaitamtomya tangchane ningchabi, heirou deiyari marmulbine yanung tungchanungei'tom lhou toubi klei.

Tlousher Heirou Shunmtupinei Tlourap

¹⁷ Heiya keiyei paluirap, yenyounung kaiyei Pu Jesu Christaei Paocha rapne nanungei koutoubi yunpikuro touri nane ningthutlak.

¹⁸ Yane nanungei atoubi yunpikhou: “Kluiyei tlainirap heinungeiri naya laokna thimirap hungthukeirou, heirou thimi rapne Dunpu yaomakne yaimsha yaitamyei kningra lhou touheirou.”

¹⁹ Heinaksi thimi rapne naihangra lhang-lhang dayerreirou, heitoubi heinaksi thimirap heiri Lhawai Khying yaomakne, yai tlaipang sharungei kningne kulchalbi klei thimirap hoirou.

²⁰ Heiya nari, keiyei paluirap, naimsha naitamne nai hyingduiyei uklumbi klei bom heirouwei rongchan sabanglak. Heirou Lhawai Khyingei mantrangra nane shunchalak,

²¹ heirou nanungei klui naimak khring chaanya piroukyou Aiyei kringpina rilla kaiyei Pu Jesu Christa'ya karngeibi klei heinakni naimsha naitamne Dunpuei malungshina rilla leinanungei toulak.

²² Khalcha'kna thimi rapnung nane malungshipi kheiya mutpilak;

²³ heirou thimi deiya meiwairouwei tangthutpibine kalpilak; heitoubi thimi deinungeiri chi-rikraile kalhonni malungshipi kheiya mutpilak, heiya yaiyei borhne mardunyerbi klei phirul rapyari nane machinlak.

Dunpuya Mathangnei Shuncha

²⁴ Kanelwurnarei naya khulkanthoupi mane Pu, heirou naya Aiyei thang'allei maibongra klal makni heirou hakraone urlhakpi Puya-

²⁵ heirou kaiyei khattom khoi Dunpuya, kaiyei Kalpipu Pu Jesu Christaei minra Aiyei thang'al, mane-mantrang, heirou Krung khoine thrungbi klei heinung'tlim, yenyoukur kheenroukhi, asinungkhi heirou klui naimakni mathangkur hoiniyasu! Amen.