JOSHUA 9 - KHYINGEI PU'TLOU Bible (BSI)

Gibeonia Rapni Joshua'nung Mandalkur

¹ Heirouri Jordan kung ralbi klei lhungdou ramrakhi heirou phaitlai ramrakhi, heirou Lebanon wa'tlungni Samadru Tang ruithungni yuldabi klei limrap: Hittia, Amoria, Caanania, Perizzia, Hivia, heirou Jebusia rapni pao heiwaya mayeknarouri;

² yani pulni kartilbini Joshua'le Israel rapya raal kardounanungei kantlangni yarilkur.

³ Heiya Gibeon'ra yuldabi klei thimi rapni Joshua'ne Jericho'le Ai khukarthillei doura thuithini toupikur heiwaya mayekurla.

⁴ Heitounei ngamrou yani mandalnanungei ningchawurbini, ram tlatnarei thimirap kansabini, yaiyei gadha rapbei doura phi-mtum khingbangbini, heirou darkhayui haalna an'unkao khmanya cheetna thruibini;

⁵ heitoubi khorkhang khman cheetya yaihora tunglhakbi, heitoubi yaiyei sharungra phi'up cheet-khmanya upbaangbini, heitoubi yai chamainungei mumtol rapkhi taarwurbi khremchalkur rapya marshiklhakbini chakur.

⁶ Heitoubi yani Gilgal'yei rungbomra wabini Joshua'yei leinara wachangbi, heitoubi anungle, Israellei thimi rapnung: “Kari ram beimak tlatnarei leibi kwa thimi rapme, heineri asinungri kanungei tloukantom khat khoupilaklo,” toubine wakyun.

⁷ Heirouri Israellei thimi rapni Hivia rapya loukyun: “Nari kai ramra klei thimirap maallei; heiyanungri koutoubi kani nanungei tlou kantomrouwo?”

⁸ Heiya yani Joshua'nung shun: “Kari neiyei shokrapme.” Heirouri Joshuane yanungei loukngai: “Nari huwo? Heitoubi koulhangrei leibi kwa thimiyo?”

⁹ Heirou yani anungei loumallangkur: “Neiyei shokrap kari ram tlatnara leibi, naiyei Dunpu, Umpuei minya mayekbi kwame; kouweiyo toulanungri, Ane Egyptra touwurkhou lhourap nammaei paoya kani mayekurla.

¹⁰ Heitoubi Ane Jordan kung ralbi klei Amoria rapbei Krung rapnungei, touri Heshbonyei Krung Sihon'nungei, heirou Ashtaroth'ra klei Bashan'yei Krung Og'nungei toupiwurkhou lhourap nammakhi kani mayekurla.

¹¹ Heitounei ngamrou kaiyei tara-tartrui rapni heirou kaiyei ramra paalbi klei thimirap nammanikhi kanungei shunbi: Nane lamrakra chamainungei chak-an heirou putchei marshikloubini, heitoubi naya wamurilbi, ‘Kari naiyei shok rapme, heineri kanungei tlou kantom khat khoupilaklo’ toubine washunchalaklo toubi kaya watyilkur.

¹² Thilak, kaiyei mumtol rapkhi, kani naileinara wayeinung lamrakra chamainungei marshikbi lhakyeinungri lumleihui. Heiya asinungri taarwurchibi khremchalwura.

¹³ Heitoubi darkha yui haalna an-un kaorapkhi ranleihui, heiya asinungri thilak, awakhi cheetdurchiya; heitoubi lamtla shaangachaknei ngamrou, kaiyei phi'up-phirul rapkhi heirou kaihorei khorkhang rapkhi namma manwurbi cheetdurchiya.”

¹⁴ Heisi tounarouri, Israellei thimi rapni yaiyei chamaiput rapya, yani Umpuei kya tloukhi ngaithimakni tha louloulhakpikur.

¹⁵ Heitoubi Joshua'ne yakou kyingni yakantlangrilbi, tloukantom khat khoupikur; heitoubi yaya paalyerkur; heisitoubi kulyomyei yama upa rapnikhi yaidoura tlou kantombi yapikur.

Gibeonia Rapya Shok Hoiyerkur

¹⁶ Heirouri yani Gibeonia raple yarilbini tlou kantomrilkur hillei tlaini khyumni tlungkur heirouri, thimirap heiri yaipongra knakni paalbi klei cheemlhun rapme touri Israel rapni mayekkurla.

¹⁷ Heirouri Israellei thimi rapni lamtla chawurbi khyumni tlung tlainirou Gibeonia rapbei khukarthil rapra, touri Gibeon, Chephirah, Be-eroth, heirou Kiriath-Jearim'ra wa'tlungkur.

¹⁸ Heiya Israellei thimi rapni yaidoura raal dapimakur, ngamri kulyomyei yama upa rapni Israellei Dunpu, Umpuei minra yanungei tlou kantomwurkhou. Heitounarouri kulyomrap nammani yama upa rapbei doura malungkhabi ngaalpikur.

¹⁹ Heirouri yama upa rapni kulyomrap nammaya shunkur: “Kane Israellei Dunpu, Umpuei minra yanungei tlou kantomwurkhoula; ngam heineri, asinungri kani yaidoura hutlhanungei yamakrou.

²⁰ Kane yanungei asitoubi toupirou da, touri kani yanungei tlou kantomwurkhounei ngamrou, kaidoura Umpuei malungkha yongdamaknungei, kani yaya hatmakrou da.”

²¹ Heirou yama upa rapni yanungei shun: “Yayari hatmakni khringni khoulak, (heiya yarap heiri kulyom nammanungei heengdeekpi thimirap, heirou yui shukpi thimirap khoini leiyerlaka).” Heisitoubi yama upa rapbei shunpikur heinakrimni heisi hoiyerkur.

²² Heirouri Joshua'ne yaya unglhakyerbi, heitoubi yaya shun: “Nane kaipongra knakni paalbi, ‘Kari ram tlatnarei thimi rapme’ toubi nani yunbi kanungei mandalpikurya koutouneiyo?

²³ Ngam heineri, asinungri nari manchokur hoirouwa, heitoubi nayari shok hoinarouwei malhetkhoumarou; heitoubi kaiyei Dunpuei Pucheemra heengdeek thimirap, heirou yuishuk thimirap khoini nani leirou dawa.”

²⁴ Heisi tounarouri yani loumallangbi Joshua'nung shun: “Kane nai maibongra mandalwurla, ngamri naiyei Dunpu, Umpune Aiyei shikrui Moses'nung chay piwurkhoubi, ram awaya namma nanungei pilhakurbi, heiyei rilla paalbi klei thimirap nammaya naimaibongra hatlakalo toubi kyun heiwaya kani mayekurla. Heitounei ngamrou kani nayari beimakni chitekkurbi, hinimaknei ngamrou, kani heinaksi yunbi mandalkurme.

²⁵ Heirou asinungri thilak, kari naihutra leikur awariya; heineri nani lhangairoume tou heiwaya kanungei heisi toupilaka.”

²⁶ Heisitoubi Joshuane yayari Israel rapbei hutrouwei kalthutpikur, heirou Israel rapni yayari hatmakni khoupikur.

²⁷ Heiya Joshua'ne hikur tlainirouwei waiyoubi angtu ramphani yayari kulyomyei heirou Aya khrumnanungei khalthutdurna bi kantangra Umpuei khrahpal watlhou tounara heengdeek thimirap, heirou yuishuk thimirap khoini watlhou touyerkur.