JOSHUA 8 - KHYINGEI PU'TLOU Bible (BSI)

Ai Khukarthilya Raal Manewurbi Lukloukur

¹ Heirouri Umpune Joshua'nung shun: “Chimak, heirou neilhawai lahmak! Nangle kalhonni raalluirap namma ruibini kanthouwa, heitoubi Aiyei khukarthilla kawalo. Thilak, Aiyei Krungle, aiyei thimi raple, heiyei Khukarthil heirou aiyei ramkhi Keine neihutra pilhakurla.

² Heitoubi nangni Jericho'le, heiyei Krungnungei toupikur heinaksini Ai khukarthilyale heiyei Krungyakhi heisibil toupirou da; nangni raalman khoini heiyei putchei raple, yaiyei uiwaa raptomya nainungei khoini markumrou da. Heitoubi khukarthil heiyari hil lhangrouwei muni mrimbini raal dalaka.”

³ Heisi tounarouri Joshua'ne kanthoubi raalluirap nammale kalhonni Ai'ranungei kakur; heitoubi ani raalluirap sireikhei thimi napung lishing-somthum khalthutbi, heitoubi masanung yaya shunmatubi watyilbi chayerkur.

⁴ Heirouri ani yaya atoubi chay pithungkur: “Thilak, nani khukarthil heiwaya hil lhangrei muni heimrimrou da. Khukarthil heirouwei tlatneri leimakrou da, heiya na nammani mit-na shingni mrimrou da.

⁵ Heitoubi keile, heirou keikou chamalkna thimirap nammani khukarthillei maishuk lhangra heitonlhakrou. Heirouri yani haallei'naksini kaya loukardourilnungei wathukyei kheenrouri, kani yaimaibongrei loutrukrou.

⁶ Heirouri yani kaihilla heihulthungei kheenrou, khukarthil heirouwei namma wathukchibongyen kani yaya loumalhimrou; heirouri yaitamni: ‘Yari haallei'naksini kai maibongra loutrukurchiyame’ toubi yunrou. Heisitoubi kani yaimaibongra loutrukrou.

⁷ Heirouri nani muni mrimbi leinarouwei wathukbini, heitoubi khukarthil heiwaya wachangbi luklourou da; kouweiyo toulanungri, naiyei Dunpu, Umpune heiwaya naihutra pilhakrouwa.

⁸ Heirouri nani khukarthil heiwaya lukloukur hillouri meini shulhakrou da. Nane Umpuei tloulhang hilthungni tourou da. Thilak, keine nanungei chay pikur awariya.”

⁹ Heisitoubi Joshuane yaya malhetthutkur; heirouri yani muni mrimna bira wawurbini, heitoubi Aiyei kulrel lhangra, Bethel'le Ai tlakra mrimbini leikur; heiya Joshuari heiniyei msanungri thimi rapbei hangra yarekkur.

¹⁰ Heirouri Joshuane ningshun manma kanthoubini, heitoubi thimi rapya mshing kansherkur, heitoubi ani Israel rapbei yama upa raple kalhonni raallui rapbei maibongra Ai'ranung louchakur.

¹¹ Heirouri akou chamalnakur raalluirap nammani knakni kabini, heitoubi khukarthillei maishuk lhangra ka'tlungkur; heitoubi Aiyei khalu lhangra rungbom sheembini leikur. Heirou yaiyei leinale Aiyei tlakra phaikar khatni khaibini klei.

¹² Heirouri ani thimi lishing phangayeimal ruilouheibini, muni mrimnanungei Ai'le Bethel'yei tlakra, khukarthillei kulrel lhangra kachangkur.

¹³ Heisitoubi yani raalluirap nammaya bicha-chani khoulhakbini, khukarthillei khalu lhangrakhi, heirou khukarthillei hil'lhangei kulrel lhangrakhi muni mrimyerkur. Heitoubi Joshuane heiniyei masanungri phaikar tlaira yarekbi leikur.

¹⁴ Heirouri Aiyei Krungni mrimbi klei heiwaya mulhakurla; heitounarouri khukarthil heiyei thimirap nammani khnotni manma wathukbini, ale heirou aiyei thimirap nammani Israel rapya raalbomra kardourilnanungei ramthingra Arabah phaikarei maishuk lhangra louleikur. Heiya khukarthil heiyei hil lhangra muni mrimbini louklei heiwaya ani mukhoumakura.

¹⁵ Heirouri Joshua'le Israellei thimirap nammani yaimaibongra manimaknei loutrukkur heinakrimni, yani ramthingra loutruk'kallengkur.

¹⁶ Heirouri khukarthil rillei louklei thimirap nammaya Israel rapya hulthungnanungei ungmartilkur; heisitoubi yani Joshuaya chanthungurbi, hillouri yani khukarthil heirouwei tlatni chakur.

¹⁷ Heisitoubi yani Israel rapya hulbi chanthungnarouri, Ai'rakhi heirou Bethel'rakhi thimi napawa huchakhatkhi leithungmakura; heisitoubi khukarthil heiyei palshungya ngakthungrou thimi hukhatkhi makni yani lakkurkhoubi, Israel rapya hulbi chanthungkur.

¹⁸ Heirouri Umpune Joshua'nung shun: “Neihutrei shinbi klei raalchei heiwaya Aiyei lhangra heilamthutlaksu; kouweiyo toulanungri, khukarthil heiwari Keine neihutra pilhakurla.” Heisi tounarouri Joshua'ne aihutrei shinbi klei raalchei heiwaya Ai khukarthil lhangra heitlangthutkur.

¹⁹ Heirouri muni mrimbi klei raallui rapnikhi yaiyai birouwei khrangni traikanthoubini, Joshuane aiyei hut katlamthutdei kheenrou, tallengni khukarthilla chanlhakbini raaldabi lukloukur; heitoubi yani khnotni toubine khukarthil heiwaya mei shulhakkur.

²⁰ Heirouri Ai khukarthillei thimi rapni hil lhangra kallekbini thrilthiyei kheenrouri, thilak, khukarthil heirouwei nungthou lhangra meikhu kathukkurya heimulhakur; heirouri yari koulhangrakhi truknaram makkura; kouweiyo toulanungri, ramthingra loutrukkur Israellei raallui rapni yaya hulthung thimi rapbei lhangra loukallekbini kardourilkur.

²¹ Heirouri Joshua'le Israelrap nammani, muni mrim thimi rapni khukarthil heiwaya raal manewurbi luklouheila, heitoubi khukarthil heirouwei meikhukhi kathukkurame toubi mukur heirouri, yani hilkallengbi Aiyei thimi rapya kluini hattumkur.

²² Heirouri thimi deirapkhi khukarthil heirouwei wathukbini Israel rapya loukardourilkur; heisitoubi yayakhi Israel rapbei tlakra, thimi thani maishuk lhangra, heirou thimi thani hil lhangra marubphopbini khoukur, heitoubi Israel rapni yayari huchakhatkhi lakkhoumakni, heirou thimi khatchatomyakhi kartleiyermakni hattumkur.

²³ Heiya yani Aiyei Krungyari khringni manbi urloukur, heitoubi aya Joshua'yei pongra yenruilhakkur.

²⁴ Heirouri asitoubine thukkura touri, Israel rapni Ai khukarthillei thimi rapya, heirou yaya hulthungkur thimi rapya ramthingei phaitlaira namma hattumkur hillouri, Israel rapni Ai'ra heikallenglhakbi, heitoubi raalshon'ne bi heirou louklei thimi rapyakhi namma hattumkur.

²⁵ Heisitoubi heiniyei hikur Aiyei thimi rapri, napawakhi heirou napuiyakhi pulni lsihing chiple khnibil tlung.

²⁶ Kouweiyo toulanungri, Joshuane Aiyei thimi rapya namma hattumchi'bongyen, aiyei hutrei raalchei shinbi malamthutkurya laksundamakni khoukur.

²⁷ Umpune Joshua'nungei chay piwurkhou tloulhang hilthungni, Israel thimi rapni Ai khukarthil heirouwei maleithung sina-lapa raple halrul tomya raalman put khoini louheikur.

²⁸ Heisitoubi Joshuane Ai khukarthil heiwaya meini hongkangurbi, angtu ramphani meikuipung khoini leileihui.

²⁹ Heitoubi Ai khukarthillei Krungya ani heengra manyarhatdurbi rawai'phani khoukur; heitoubi rawaiyei Kinni yongchipkurle tallengni Joshua'ne yanungei chay piwurbi, heirou aiyei khi'lhung heiwaya heengdourei lousundawurbi, khukarthillei palshung pongra khingsundakur; heitoubi heiyei doura thlungpung tangni khingmarpeiwurbi khoukur heiwari angtu rampha leileihui.

Ebal Lhungdoura Mardingpikur Tlouya Pathutpi

³⁰ Heirouri Joshuane Israellei Dunpu, Umpu'nungei Ebal Lhungdoura khrahpal khat sabaangurkhou.

³¹ Umpuei shikrui Moses'ne Israel rapnungei chay piwurkhou heinakrimni ani sabangkur. Heirou Moses'yei Ayil Lailikra mayelhakhou hilthungni, thimi hukhatnikhi thirrei hutsuni umbaikhoumak thlungpum rapni khrahpal khat sabaangbi, heitoubi yani heiyei doura Umpunungei pumni meira hongbini malanputle malungpilyerna putya makatkur.

³² Heitoubi heiyei doura, Israel rapbei maibongra Moses'yei mayekhou ayillei lailik thokhat ani mayebaangkur.

³³ Heirouri Israellei thimirap nammani, heirou miram-mithrillei thimirap lhuimakni heirou yaiyei tara-tartrui rapkhi, yama uparap, heirou lhou'urpu upa rapkhi kyaoni, Umpuei Mardingpina Theengkungya chungthimi Levia rapbei maibongra, Theengkung heiyei manak thyoi-thyara mayungkur. Heitoubi yarap lhang'khatni Girizim Lhungdou lhangra, heirou ya thani Ebal Lhungdou lhangra mayungbini, heitoubi Umpuei shikrui Moses'ne haallei chay pikhou heinakrimni yani Israel rapya phor shaampikur.

³⁴ Heihillouri Moses'yei Ayil Lailikrei mayelhakkur hilthungni, Ayillei tloulhangrap nammaya, phoryei tloukhi heirou manchonei tlou rapkhi pathutkur.

³⁵ Heisitoubi Moses'ne chay piwurkhou tloulhangrap heiri Israel rapbei kulyom nammayei, napuiya, naoshun naopar, heirou miram-mithrillei thimi lhuimakni kartilna maibongra, tloulhangrap heiwaya khatchatomkhi karkulmakni pathutpikur.