JOSHUA 7 - KHYINGEI PU'TLOU Bible (BSI)

Israel Rapya Ai Khukarthilra Raal Manekur

¹ Heiya Israellei thimi rapni lounungei yamak putchei rapya munni louheibini malungamkna yaomakni lhou touwurla; kouweiyo toulanungri, Judah cheemkhurei Zerah'yei chanapawa Zabdi'ne pukkhou Carmi'yei chanapawa Achan'ne klou yamak putchei rapya muni tha louheibini yulkhoukur; heitounei ngamrou Umpune Israel thimi rapbei doura meithukni malungkhakur.

² Heirouri Joshuane Bethellei kulkung lhangra klei Beth-Aven pongra nakrilni phunbangbi klei Ai khukarthilya muni thikulnanungei toubi Jericho'rouwei thimi thaya ani asitoubi shunmtubini heimalhetkur: “Nane muni kabi heitoubi ram heiwaya thikullaka.” Heisitounarouri thimi rapni chabini Aiyei khukarthil heiwaya muni thikulkur.

³ Heirou yani yenkallengbi Joshua'nung atoubi pao hungtamkur: “Thimirap nammani karimakse, heiya thimi lishing khnitom, nimanung lishing khyum'tomni kabi Ai khukarthilya raal dawase, heitoubi thimi deiri toulahmakase, ngamri yari thimi chungmaklei, thachangei.”

⁴ Heisitoubi yani thimi lishing khyumchatom Ai'ra raal Dananungei kakur; heiya yani Aiyei thimi rapbei maibong'rouwei mai khreibini trukkallengkur.

⁵ Heirou Aiyei thimi rapni yaihangrei thimi napung somthumle'thrukya hatthungurbi, heitoubi yani Israel rapya yaiyei khukarthillouwei waiyoubini Shebarim yuphani hulsundawurbi, heitoubi lhungsora yaya hatdurchi; heisi tounarouri Israel thimi rapbei ukningra chiwurbi yuinakni yasundakur.

⁶ Heirouri Joshuane aiyei phi'upya threlwurbi, thleira mai sikhuplhakbini, Umpuei Mardingpina Theengkung maibongra rawai'phani kanel'lhakbi leikur; heirou Israellei yama upa rapkhi heisi kanel'lhakbi, heirou yaiyei lura rahui chaiphangbi leikur.

⁷ Heirou Joshua'ne kyun: “Ulleiyo, kounak lhawai lanakurrawo! O Pu DUNPU! Kounungei Nangni thimirap awaya Jordan kung ruiralthutdurbi Amoria rapbei hutra namma himangyerkurawo? Kounakpi kani Jordan kung heiralthutmakni leiyanungri lhangairoume!

⁸ O Dunpu, Israellei thimi rapni yeekna thimi rapbei maibongra mai khreibi trukkurya keine kouya hanui yunserouwo?

⁹ Kouweiyo toulanungri, Caanania rapni heirou ram heirouwei yuldabi klei thimirap nammani pao heiwaya mayeklanungri, heirou yani kaya kuikoollurbini, heitoubi yani tlaipangpal arouwei kaiminya mityerrou kleiyame. Heiyanungri Nangni Neiyei toumani min heinung'tlim kouya touserouwo?”

¹⁰ Heisi tounarouri Umpune Joshua'nung shun: “Kanthouwalo! Kounungei neiyei maiya thleira sikhuplhakbini leikurrawo?

¹¹ Israel rapni borhlhou touwurla, heirou Keine yanungei mardingpikur chaytlouya toubaiwurbini marmokyerwurla. Heitoubi yani klou yamak putcheirap thakhi muni louheibini yulkhouwurbi mandalnei lhoukhi touwurla. Heiyakhi duinara, yani putchei rapya yaiyei putchei rapbei hangra touchoklhakurla.

¹² Heitounei ngammei Israel rapni yaiyei yeekna thimi rapbei maibongra mayungchang'makur, yaiyei yeekna thimi rapbei maibongrouwei yani mai khreibini loutrukkur, ngamri yari manchokur thimirap hoiyura. Heineri klou yamak putchei rapya naihangrouwei toumangurmaka'nungri, Keine neiya kalhonpimakrou.

¹³ Kanthouwalo! Thimi rapya marthingthutpilaka; heitoubi yaya asitoubi shunpilak: ‘Nane ningatou tlaininungei naimshani marthingthutlaka; kouweiyo toulanungri, Israellei Dunpu, Umpune atoubi shunlei: Naihangra klou yamak putchei rapya louheikur leiyurame, O Israel! Heinaksi putchei rapya naihangrei louthutdur'bongyenri, nani naiyei yeekna thimi rapbei maibongra mayung'changmakrou.

¹⁴ Ngam heineri, nangni ninga-ningshun neiyei thimi rapya cheemkhur khatsol waiknaini heiruilhakrou da; heitoubi Umpune khalthutkur cheemkhur heirouwei cheemmai-bommai khatsolya thangknaini maibong lhangra hungthukyerrou da; heitoubi Umpune khalthutkur cheemkhur heirouwei thoumi khatsol hungthukyerrou da; heitoubi Umpuei khalthutkur thoumi heiyei thimi napung kantangni maibong lhangra hungthukrou da.

¹⁵ Heirouri klou yamak putchei rapya louheikur thimi heiyari meira, ale heirou aiyei putcheirap nammale kalhonni hongurou da; ngamri ani Umpuei Mardingpinei tlouya marmokyerwurla; heitounei ani Israel rapya rikraiyernei lhouya touwurla.’ ”

Achanyei Mral

¹⁶ Heisitoubi Joshuane ningshun manma kanthoubi, heirou Israel rapya cheemkhur kantang ruithutkur, heitoubi Judah'yei cheemkhurya khalthutkur.

¹⁷ Heitoubi ani Judahyei cheemkhurya pongra yenruilhakbi, heirou Zerah'yei cheemmai'ya khalthutbini, heirou Zerah'yei cheemmairei napawa rapya waiknaini ungthutkur, heitoubi Zabdi'ya khalthutloukur.

¹⁸ Heirouri Joshuane aiyei bommairei thoumi napawa khatsolya pongra yenruilhakkur, heitoubi Judah'yei cheemkhurrei Zerah'yei chanapawa, Zabdi'ya pukkhou Carmi'yei chanapawa Achan'ya khalthutkur.

¹⁹ Heirouri Judahni Achan'ya shun: “Keicha napawa, Israellei Dunpu, Umpuei thang'al hoilaksu, keinungei khyingni heirou chimni shunthutpilak, nangni kou klalya touwurkhoula? Neiyei touwurkhou lhou heiwari keiyei maibongra yulkhouri yamakrou.”

²⁰ Heisi tounarouri Achan'ne Joshua'nung loumallangbi kyun: “Tanghakpani keine Israellei Dunpu, Umpuei bomra klalyei lhouya touwurkhoula. Heirou keiyei touwurkhou lhou rapri:

²¹ Raal danarei deekhromkur putchei rapbei hangrei Shinar touri Babylon'rei lhangai shamb khatle, heirou kulshan shekel macha khnile heirou shekel somngamal khrit sina khangyal khatkhi mulhakkurnarouri, heirapya keine maduwurbi keine muni louheikur; heitoubi heirapya keiyei cheemwaira thleira touphumbini yulkhoukur.”

²² Heisi tounarouri Joshua'ne thimi malhetbi, heirou yani aicheemra channi hungbi thinarouri, thilak, putcheirap heiri kulshanle kalhonni thleira phorphumbini louklei karthangkur.

²³ Heitoubi yani cheemwairei phorlouheibi, heirapya Joshua'yei leinara heirou Israel thimirap nammayai maibongra heilhakbini, heitoubi Umpuei maibongra heirapya shungthutbi myerkur.

²⁴ Heirouri Joshuane akou louklei Israellei thimirap nammani, Zerahyei chanapawa Achanya ruithutloubi, kulshan'le, shamb'le, sina khangyal, heirou aiyei chanapawa raple-chanapuiya rapyakhi, aiyei halpa, aiyei gadharap, aiyei yaorul rapkhi heirou aiyei cheem-keile heirou aiyei putchei touwei'mkheikhi namma urthutloubini heitoubi Achor phaikara urloukur.

²⁵ Heirouri Joshua'ne kyun: “Kouya tounanungei nangni kaya lahyerkurro? Angturi Umpune neiyakhi lahyerrou dawa.” Heisitoubi Israelrap nammani yayari thlungni nanghatkur, heitoubi thlungni nanghatkur hillouri yaya meini namma hongtumkur.

²⁶ Heitoubi yani aya hongurna doura thlung khing'manpungbi khoukur heiwari angtu ramphani leileihui; heisitoubi Umpune Aiyei meithukni malungkha heiwari yairouwei kallekthutkur. Heitounei ngammei bi heiwaya angtu rampha Achor touri Lahyerkur toubine ungleihui.