JOSHUA 6 - KHYINGEI PU'TLOU Bible (BSI)

Jerichoya Raal Dabi Lukloukur

¹ Asinungri Jerichoei palshung heiwari Israel rapya chiwurnei ngamrou cheemkhar thungkhalbi hang rotphopbidik khouwurla, heingammei thimi hukhatkhi wathuk-hungchangkhi toumakni leirilkur.

² Heirouri Umpune Joshua'nung shun: “Thilak, Jericho'ri Keine aiyei Krungle, heirou aiyei hutmantrang shireikhei raallui rapyakhi neihutra pilhakurla.

³ Heitoubi nangni, raalluirap nammale kalhonni, khukarthil heiwaya nungkhatnuirou hanuitomtom karhilni kuibi chalak. Heisitoubi nangni thruknibil karhilni chalaka.

⁴ Heitoubi Suipipu napung enikhi kyaoni, yaopaei chee pengkul khatsol shinbini, Mardingpina Theengkung maibongra louchayerlak; heitoubi enini tlung tlainirouri nani khukarthil heiwaya enibuirek karhilni kuibi charou da; heitoubi Suipipu rapni pengkul rapya shakhungrou da.

⁵ Heirouri asitoubine hungthukrou touri, yani pengkul hou tlani shakhungeinung, heiyei houya nani mayeklanungri, raalluirap nammanikhi hou chouni lou'ungraorou da; heirouri khukarthillei raalpal heiwari namma deeksundabini khromchirouwa; heirouri raallui rapni maibong lhangra raalsobi heitonlhakrou da.”

⁶ Heisitoubine neiyei chanapawa Joshuane Suipipu rapya ungbini, heitoubi yaya shunmtupikur: “Nane Mardingpina Theengkungya chungbanglaka, heitoubi Suipipu napung enini yaopa chee pengkul enitam shinbini Umpuei Mardingpina Theengkung maibongra louchawa.”

⁷ Heitoubi Joshua'ne thimi rapya shun: “Nane maibong lhangra louchalaka, heitoubi khukarthil heiwaya karhilni kuilaka; heitoubi raal-shamb mansambini hutsu shin raallui rapni Umpuei Mardingpina Theengkungei maibongra louchalak.”

⁸ Heisitoubi Joshua'ne thimi rapya shunnarouri, Suipi purap napung'enini yaopa cheeyei pengkul khatsol shinbini, shakungbini Umpuei maibongra louchakur; heitoubi yaihilla Umpuei Mardingpina Theengkung heiwani heichanthungkur.

⁹ Heitoubi pengkul shakhungbi louchakur Suipipu rapbei maibongrani raal-shamb mansamkur raallui rapni louchakur, heirou Suipipu rapni pengkul shakhungbi louchayeinung, heiyei tlakrani khangshellak rapni Theengkungei hilla heichanthungkur.

¹⁰ Heiya Joshua'ne thimi rapya chay pibini shun: “Keine, ‘ungraolakalo’ toubi nanungei chay pinei tlaini hungtlungbongyen, nani kouhoukhi shaonung yamakrou, heirou tloukhi yunnung yamakrou. Heiya keine naya chay pilanungri nani lou'ungraolak.”

¹¹ Heisitoubi ani Umpuei Mardingpina Theengkung heiwaya chungyerbi khukarthil heiwaya nungkhatnuirou hanuitomtom karhilni kuiyerkur, heitoubi yani rungbomra yenkallengbi, msanungri cheemra mathrilkur.

¹² Heirouri Joshuane ningshun manma kanthoubi, heirou Suipipu rapnikhi Umpuei Mardingpina Theengkungya chungbini urloukur.

¹³ Heirou Suipipu napung eninikhi yaopaei chee pengkul enitam shinbi Umpuei Mardingpina Theengkungei maibongra louchabini, pengkul rapya shakhungkur; heitoubi raal-shamb kansamkur raallui rapni yai maibongra louchakur, heitoubi khangshella rapni Umpuei Mardingpina Theengkungei hilla heichanthungkur; heisitoubi pengkul shakhungbini chakur.

¹⁴ Heitoubi khnini tlung tlainiroukhi yani khukarthilya hanuitom kuikarhilkhoubi, heitoubi cheemra yenkallengkur. Heisitoubi yani thruknibil kuikarhilkur.

¹⁵ Heirouri enini tlung tlainiroukhi yani ningshun kulkayei kheenrou kanthoubi, heitoubi hallei nakrimni khukarthil karhilni enibuirek kuikarhilkur; heiyei tlainirou'tomri yani khukarthil heiwaya enibuirek kuikarhilkur.

¹⁶ Heirouri yani enibuirek kuikarhilbi, heitoubi Suipipu rapni pengkul shakhungkur heirouri, Joshua'ne thimi rapnung chay pibini shunkur: “Ungraolak! Ngamri, Khukarthil heiwari Umpune nanungei piwurla.

¹⁷ Heirou khukarthil heile heiyei rillei klei putcheirap namyerwa heiri markumbi louheinungei yamakrou, ngamri heiwani Umpuei bomrari runnarou; heitoubi chorit naimakpi Rahab'le aiyei cheemwaira louklei thimi rapyatom hatmakni horkhourou da; ngamri ani kaiyei heimalhetkur raal'mucha rapya yulkhoupibi martleipikur.

¹⁸ Heiya nani deekmangyerkur putchei rapya khramphabini markummaknanungei mukheini toulak, nimanungri nani heirapya khramphabi cheemra yenkhumheilanungri, nani Israel rapbei rungbomra manchoyerbi klah dayernarou.

¹⁹ Heiya sinale, lapale, kulshan heirou thirrei sathutkur putcheirap namma heiri Umpunungei khyingei putcheirap khoini khoulhakrou da, heirapri Umpuei sina-lapa lalkeira shunglhakbi mallongrou da.”

²⁰ Heisitoubi Suipipu rapni pengkul shakhungle kalhonni, thimi rapnikhi raalsobi ungraokur. Heirouri asitoubi thukkura: Thimi rapni pengkul hou loumayekle tallengni raalsoni ungraokur; heirouri khukarthillei raalpal heiwari deekhrombi dasundakur; heirouri thimi rapni khukarthil rilla minung-minung chanlhakbi khukarthil heiwaya yani lukloukur.

²¹ Heitoubi yani khukarthil heiyei rillei louklei putcheirap namma, napawakhi, napuiyakhi, douwakhi-upa rapyakhi, heirou ui-waarap- halpa rapkhi, yaorul-tlangrul rapkhi, heirou gadha rapkhi koulhuimakni raalshon'ne namma shat'hatbi tumyerkur.

²² Heirouri Joshua'ne ram heiwaya raal'mucha khoini chabi raphathutkur thimi napung'khniya shun: “Nakhuntani chorit naimakpi napuiyaei cheemra wachangbi, heirou nakhuntani anungei kantomwurkhou heinakrimni, ale aiyei cheemwairei louklei nammaya wa'urthutlaka.”

²³ Heisitoubine raal'mucha khoini wachangkhou kartlanga napung'khnine wachangurbi, heitoubi Rahab'yale aiyei pawaya, aiyei puiwiya, aiyei trahpa rapya waruithutbi heirou aiyei klei putcheirap nammakhi urthutloukur; heitoubi yani aiyei teinao rapyakhi ruithutloubini, Israel rapbei rungbom pura yaya yenruiheibi khoukur.

²⁴ Heitoubi yani khukarthil heiwaya, heiyei rilla louklei putcheirap namyerwaya mei shulhakbi hongkur. Sina, lapa, kulshan, heirou thirrei putchei rapyatom yani Umpuei Pucheem lalkeira marpillhakkur.

²⁵ Heitoubi chorit naimakpi Rahab'ya heirou aiyei pawale puiwiya, heirou aiyei klei nammayari Joshua'ne hatkarkulkur; heitoubi angtu rampha ani Isarael rapbei hangra ringbini leileihui; kouweiyo toulanungri, Joshua'ne Jericho'ya thikulnanungei raal'mucha khoini malhetkur thimi rapya ani yulkhoubi martleipikur.

²⁶ Kheen heirouri Joshua'ne yaidoura tlou kantombi kyun: “Jerichoei khukarthil awaya hanui kallengni sabangkur napawa heiri Umpuei maibongra mancho phakur hoiniyasu. Khukarthil heiyei cheemmun thulbangkur napawa heiyei chanapawa samrankhi hirou; heirou khukarthil heiyei palshung bunkanthou thimi heiyei chanapawa dongwakhi hirou.”

²⁷ Heisitoubi Umpune Joshua'ya kalhonpikur, heirou aiyei min heiwari ram karyouni mayekrilkur.