JOSHUA 5 - KHYINGEI PU'TLOU Bible (BSI)

Amoriaei Krung Raple Caanania'yei Krung Rapni Chi-kanchunkur

¹ Heirouri Jordan'yei kulrel lhangra yuldabi klei Amoria'yei krung raple, Samadru ruithung yuldabi klei Caanania rapbei krung rapni, Israel rapni Jordan kung heiralthutdeinung, ralthutchibongyen koutoubi Umpune Jordan kungei yui heepyerkurro tounei paoya mayeknarouri chitekwurbi yai solung rapri khuilunakni yasundakur; heitounei Israel rapbei ngamrou, yari Israel rapnungeiri lhawai yaomakurnaksi hoiwurchiya.

Israel Rapya Gilgal'ra Sermur Dankur

² Kheen heirouri Umpune Joshua'nung shun: “Nangni tuikhrat shon tha sheembini marshiklak, heitoubi Israellei chanao rapya hanuikhi sermur danpithulak.” (Awari Egyptrei shalthutkur hillei Ramthingra lamtla chayei kheenrou puklhakkur Israellei chanao rapya sermur danpinei lhou).

³ Heitoubi Joshuane tuikhrat shon tha marshikbini, heitoubi Gibeath-Haaraloth bira Israellei chanao rapya sermur danpikur.

⁴ Heirou Joshua'ne Israellei chanao rapya sermur danpinei ngamri: Egyptrei hoyoubi shalthutkur thimirap, napawa nammakhi, heirou raalluira yaomani nammakhi, Egyptrei shaalthutkur hillouri ramthingei lamrakra hiwurchi.

⁵ Kouweiyo toulanungri, Egyptrei hoyoubi shaalthutkur napawarap namyerwari sermur dankurya hoiyanungkhi, Egyptrouwei heiyoubi ramthingra lam tlayei kheenrou puklhakkur napawarap namyerwa heiri sermur danmakhui.

⁶ Heirouri Israellei chanao rapni ramthingra kum somlibil ranchakhouyeinung, Egyptrei hoyoubi shalthutkur raalluira yaochangkur napawarap namma, yani Umpuei houya ninglhakmaknei ngamrou, Umpune kanungei piroume toubi yaiyei patar rapnungei kantompiwurkhou nuyuile khuining channa ram heiwaya Ane yanungei muyerkhoumakni ya namma hitumkur.

⁷ Heitoubi Umpune yai rungkhlangra shunyerkur chanao rapya Joshua'ne sermur un danpikur; kouweiyo toulanungri, yayari Ramthingra lam tlayeinung sermur dankhoumaknei ngamrou danpikur.

⁸ Heirou yani Lim nammaya sermurrei un danpikur hillouri, kna-msei damchibongyen rungbom'rouwei wathukmakni leikur.

⁹ Heirouri Umpune Joshua'nung shun: “Angtu tlainirou naidourei klei Egyptra shok hoikhounei rikraiknayei shakrung heiwari Keine louthutdurpila.” Heitounei ngamrou ram heiwaya angtu rampha min ‘Gilgal’ toubine ungrilleihui.

¹⁰ Heirou Israellei chanao rapni Gilgal'ra rungbom sheembini leikhouyei kheenrouri, tangla heiyei chiple-phalini tlung tlainiyei rawainung, Jericho phaikarei ramthingra yani Ralthutpinei Kneitang khat markhulkur.

¹¹ Heitoubi Ralthutpinei Knei nithangei tlainirouri, ram heirouwei thukkur trunwai lungya, phri sikmak mumtol khoini ngoubi shaikur, heitoubi roubinikhi chamaikur.

¹² Heirouri yani ram heirouwei putthuk trunwai lung rapya chamaiyoukur tlaini hillouri manna yongdamakura; heisitoubi Israellei thimi rapni manna phamakura. Heiya yani kumkhatrek Caananrei putthuk rapya chamaikur.

Thangring Raallui Upa

¹³ Heirouri Joshua'ne Jericho pongra mayungbi leiyei kheenrou, ani mangalbi thiyeinungri, aiyei maibongra napawa khatni aihutra raalshon phuithutbi shinbini loumayung ani mukur; heirouri Joshuane aiyei pongra tonkarsilbini, heitoubi anung heikngai- “Nangri kanungeiko, nimanung kaiyei yeekna thimi rapbeiko?”

¹⁴ Heirouri ani loumallang: “Keiri hunungeikhi nimak, heiya Keiri Umpuei raallui upa khat khoini kyong.” Heitounei ngamrou Joshuane aiyei mai thleira sikhuplhakbi khrumbini anung kyun: “Upawane Aiyei ruishiknung koupaoya shunpinung kleiyo?”

¹⁵ Heitounei Umpuei Raallui upawa heini Joshua'nung shun: “Neihorei khorkhang heiri yuklhukurlak, ngamri neiyei mayungna bi heiwari khying bime.” Heirouri Joshua'ne kyunya chanthungni lhou toukur.