JOSHUA 4 - KHYINGEI PU'TLOU Bible (BSI)

Ningthutna'nungei Jordan'rei Thlung Khulmanpungkur

¹ Heirouri Limrap nammani Jordan kung heiralthutkur hillouri, Umpune Joshua'nung shunbi asitoubi kyun:

² “Nangni cheemkhur kantangrei thimi napung'khatsol khalthutbini, ya napung chiple-khni ungthutlaka;

³ heitoubi yaya chay pibini: ‘Nane Jordan kungtlairei, Suipipu rapbei ho trumbini mayungkhouna birouwei thlungmtum khatsol khulloubi, heitoubi thlungmtum rapya urbini, heirou angtu masa nani wa'tlungbini yarekrou youna bira seopungkhoulaka’ toubine shunlaka.”

⁴ Heitounei ngamrou Joshua'ne Israellei cheemkhur khatsolrei napawa napung'khatsol ungthutbini, thimi napung chiple-khni khalthutkur.

⁵ Heitoubi Joshua'ne yanung shunkur: “Hanui heikallengbi naiyei Dunpu, Umpuei Mardingpina Theengkung khouna heiralbini, Jordan kungtlaira wachangbini thlungmtum khatsol Israellei cheemkhur mshing hilthungni wakhulthutlak.

⁶ Heitoubi heirapni hillou naihangra naiyei yu-cha rapni ‘Thlungrap heiri kouya touknawo?’ toubi ngaithiyei kheenrou, nanungei mu'kna hutlha khat hoinarou.

⁷ Heirouri nani yanungei louyunpirou: ‘Thlungpung heiwari Umpuei Mardingpina Theengkungya Jordan kungra chungraalyei kheenrou, Jordan kungrei yui heiwari tuyshun lhangra chanmakni kallongbi leikur.’ Heitounei ngamrou thlungrap heiwaya Israel thimi rapni klui naimakni ningthutnanungei hutlha khoini khulmanpungkur.”

⁸ Heisitoubi Israel rapni Joshuane yanungei chay pikur hilthungni lhoutoukur. Heirou Umpune Joshua'nung shunmtupikur heinakrimni, yani Jordan kungtlairei thlungmtum chiple-khni, Israellei cheemkhur mshingni khulthutloukur; heitoubi yani urlouheibi, yaiyei rungbomra seomanpungkur.

⁹ Heisitoubi Joshuane thlungmtum chiple-khni, Jordan kung tlaira, Mardingpina Theengkungya chungbi urkhou Suipipu rapni ho trumbi mayungkhouna bihakrouwei khulthutbini seomanpungkur, heirou thlungpung heiwari angtu ramphani leileihui.

¹⁰ Kouweiyo toulanungri, Joshuane Moses'nung shunmtupikur hilthungni, Joshuane Umpuei chaytlou rapya thimi rapnung shunthutpi luibongyen, Theengkungya chungbi klei Suipipu rapni Jordan kungtlaira mayungbini leikur. Heihillouri yani khnotni heiralthutkur.

¹¹ Heirou thimirap nammani heiralthutchikur heirouri, Umpuei Mardingpina Theengkungle Suipipu rapkhi thimi rapbei maibongra heiralthutkur.

¹² Heirouri Reuben'yei chanapawa raple Gad'yei chanapawa rapkhi, heirou Manasseh'yei cheemkhur lhang'khatdei chanapawa rapkhi, Moses'ne yaya shunmtupikur heinakrimni, raal-shamb mansambini Israel rapbei maibongra heiralthutkur.

¹³ Yane thimi lishing somlieimal raal-shamb mansambini, Umpuei maibongra raalsobini, Jerichoei phaikar lhangranungei heiralthutkur.

¹⁴ Heiyei tlaini heirouri Umpune Joshua'ya Israel rapbei mit'thrilnara kngakei lhouya touyerbi chouni mathangbangpikur; heitounei ngamrou yani Moses'ya aiyei chaan khatrekrou rikrai khrumnapikur heinaksini, Joshua'yakhi chouni rikrai khrumnapikur.

¹⁵ Heirouri Umpune Joshua'nung shunkur:

¹⁶ “Mardingpina Theengkungya chungcha thimi Suipipu rapya Jordan kungrouwei kathuknanungei chay pilaka.”

¹⁷ Heisitoubi Joshua'ne Suipipu rapya chay pibi shun: “Jordan kungrouwei kathuklaka.”

¹⁸ Heirouri Umpuei Mardingpina Theengkungya chungchabi klei Suipipu rapni Jordan kung tlairouwei yaiho karthutdurbi, kungpalla yui taarna thleira katrumkurle tallengni, Jordan kungrei yui heiwari halleinakrimni namma yenkallenglhakbi kungpal kaphani yui yenkungkur.

¹⁹ Heirou thimi rapni lamkri tanglaei chipni tlung tlainirou Jordan kungya ralthutkur, heitoubi Jericho'yei kulkung lhangei rikarchunna ramra klei Gilgalra rungbom sabi leikur.

²⁰ Heitoubi yani Jordan kungtlairei khulthutloukur thlungmtum chiple-khni rapya Joshua'ne Gilgal'ra seomarpeikur.

²¹ Heitoubi Joshuane Israellei chanao rapnung shunpikur: “Hillou naiyei chanao rapni yai pawa rapnung, ‘Thlungrap heiri kouya mu'knawo?’ toubi ngaithiyei kheenrou;

²² heirouri nani naiyei chanao rapnungei, ‘Israel rapni Jordan kungya yui taarna doura ralthutdurnei wariya yunpibi muyerpirou da.’

²³ (Ngamri, naiyei Dunpu, Umpune kai maibongra Mrao Samadru'ya kani heiralthutchi'bongyen yui heepyerkur heinaksini, Ane Jordan kungya nani heiralthutchi'bongyen naimaibongra yui heepyerkur).

²⁴ Heineri tlaipangpallei Limrap nammani, Umpuei hutri toumanime toubine murouwa, heisitoubi nani naiyei Dunpu, Umpuya kalui naimakni rikrai khrumrillouwa.”