JOSHUA 3 - KHYINGEI PU'TLOU Bible (BSI)

Israel Rapni Jordan Kung Raalthutkur

¹ Heirouri Joshua'ne ningshun manma kanthoubini, heitoubi ale, Israellei thimi nammani hoyoubi Shittim birouwei Jordan'ra wa'tlungkur; heitoubi Jordan kung heiralthutbongnung bi heirou rungbom sheembini leiwurkhou.

² Heitoubi tlaini khyumniyei hillouri ruichingpipu rapni rungbom karyouni cheem kantangra yenkarwaichakur;

³ heitoubi yani thimi rapya chay pibini paochilkur: “Naiyei Dunpu, Umpuei Mardingpina Theengkung heiwari Leviayei Suipipu rapni chungbi chakurya nani mulanungri, nakhi nainaiyei bi heirouwei hoyoubini chalaka, heitoubi aihilla chanthunglaka.

⁴ Heiya nale Theengkungei tlakra thong lishing khniyeimal tlatrilyerlak. Heiyei pongrari knakni karnaklhaknungei yamakrou, heitoubi nani koulhangra charouwo touri nani murou da; kouweiyo toulanungri, nani heilhangrari halnung tekkhi heiralkhoumakhui.”

⁵ Heirouri Joshua'ne thimi rapnung shun: “Naitam naimshani marthingthutlaka, kouweiyo toulanungri, ningaei tlainirouri Umpune naihangra kngakei lhou tourou youlei.”

⁶ Heitoubi Joshuane Suipipu rapnung shun: “Mardingpina Theengkungya chunglaka, heitoubi thimi rapbei maibongra heiralbini chalaka.” Heisitoubi yani Mardingpina Theengkungya chungbini, heitoubi thimi rapbei maibongra heiralbini louchakur.

⁷ Heirouri Umpune Joshuaya shun: “Angtu tlainirou Keine neiyari Israel rapbei mit'thrilnara chouni mathumbangrouwa; heiyanungri yani murouwa touri Keine Moses'ya kalhonpikhou heinaksini Keine neiyakhi kalhonpirou.

⁸ Heitoubi nangni Mardingpina Theengkungya urbini klei Suipipu rapnungei chay pibini asitoubine shunlaka: ‘Nane Jordan Kungei yuiruira yu'tlunganungri, nani yuitlaira wachangbini mayungrou da.’ ”

⁹ Heirouri Joshua'ne Israellei thimi rapya shun: “Alhangra wachangalo, heitoubi naiyei Dunpu, Umpuei tloulhang rapya ninglak.”

¹⁰ Heirou Joshuane shunthu: “Asitoubi nani murou touri ringbi klei Dunpu heini naihangra kalhonpirou, heitoubi Ane Caanania rapya, Hittia rapya, Hivia rapya, Perizzia rapya, Girgashia rapya, Amoria rapya heirou Jebusia rapya nai maibongrouwei shuimakni hulthutdurou.

¹¹ Thilak, tlaipangpal nammaei Pu Umpuei Mardingpina Theengkung heiwari nai maibongra Jordan Kungra louralthutdura.

¹² Ngam heineri, asinungri nangni thimi napungchiple khniya cheemkhur kantangrouwei napung khatsol khalthutlaka.

¹³ Heirouri asitoubine hungthukrou touri Tlaipangpal nammayai Pu Umpuei Mardingpina Theengkungya chungchakur Suipipu rapbei honi Jordan kungei yuitlaira heitrumlhakle tallengni, Jordan kungei tuyshun lhangra yenchan yui heiwari tatkhairou, heitoubi bikhatra thulmallongbini leiyurou.”

¹⁴ Heisitoubi thimi rapni yaiyei rungbom'rouwei shalthutnanungei, yaiyei khuiluphiyei cheem rapya thresundawurbi, Jordan kungya heiralnanungei chayei kheenrouri, Suipipu rapni Mardingpina Theengkungya chungbini yai maibongra louchakur.

¹⁵ Heirouri Mardingpina Theengkungya chungbi cha'thimi, Suipipu rapbei homaini Jordan kungei yuitlaira hek watatlhakur; (ngamri, trunwai luklumnungri Jordan kungri kungpal katpahoini yui kyong).

¹⁶ Kheen heirouri tuyna lhangrei yenkung yui heiwari dongurbi, tuyna lhangra shar-knaini Zarethan kungso pongrei klei Adam toubi ung khukarthil kadani yui kat'omdumkur; heitoubi tuyshun lhangrakhi Arabahyei Mitti Samadru yongdani chan yui heiwakhi khreng-taarni heepkur. Heisitoubi thimi rapni Jericho lhangra heiralthutkur

¹⁷ Heirou Umpuei Mardingpina Theengkungya urthimi Suipipu rapneri Jordan kung tlailamra mayungbi, Israellei thimi rapni, yai Limyei thimirap nammani yui heepburna kungtlaira heiralthutchibongyen mayungbini leikur.