JOSHUA 24 - KHYINGEI PU'TLOU Bible (BSI)

Joshuane Israel Rapbei Chaanlamya Hanui Kallengni Sutpithu

¹ Heirouri Joshua'ne Israellei cheemkhur thimirap namma Shechem'ra ungkartilkur, heitoubi Israellei yama uparap, heirou yaiyei cheemkhur shullam uparap, heirou yaiyei pichar purap, heirou lhou'urpu rapya Dunpuei maibongra malanlhakpikur.

² Heitoubi Joshuane thimirap nammanung shun: “Israellei Dunpu, Umpune atoubi shunlei: ‘Bongei waiyoubi naiyei patarap, minkhoini lhanglanungri, Abraham'le, Nahoryei pa Terah'ne Euphrate kung ralbini loupaalkhou; heitoubi yani thraidei rapya watlhou loutoukhou.

³ Heirouri Keine naiyei patar Abraham'ya Euphrate kung serallouwei ruithutloubi, heitoubi Caananyei ram nammaya ruiralloubini, heitoubi anungei chanao rapkhi chungwani phayerwurbini, Keine anungei Isaac'khi pukyerkur.

⁴ Heitoubi Isaac'nungei Keine Jacob'le Esauya pukyerkur, heirou Esau'nungei yul dananungei Keine Seir'yei Lhungdou pikur; heiya Jacob'le aiyei chanao rapri Egyptra yudabi paalkur.

⁵ Heirouri Keine Moses'le Aaron'ya watyilbi malhetkur, heitoubi Keine Egyptra pharthrai malhetlhakbi, yaihangra chansherni taakyerkur; heitoubi hilluirouri Keine naya ruithutloukur.

⁶ Heirou Keine naiyei patar rapya Egypt'rouwei ruithutloukur, heirouri nani Samadrura heiralthutdeinung, Egyptbei thimi rapni sapuk kaari'le heirou sapuk'tung raallui raple toubine naiyei patar rapya Mrao Samadru'bil heihulthungkur.

⁷ Heiya yani Umpunung chapni ungraoyei kheenrouri, Ane nale Egyptbei thimi rapbei tlakra kmehni hubphobpikur, heitoubi yaidoura Samadrurei yuini yenhubphopbi martlaohatkur; heisitoubi Keine Egyptra koutoukurro touri naimit-rungrungni muthungurla. Heitoubi nani Ramthingra kum kounak tlanikhi palwurkhoula.

⁸ Heirouri nayari Keine Jordan kung ralbi klei Amoria rapbei ramra yenruilhakpikur; heirou yani naya raal loukardoukur; heiya Keine yayari naihutra pilhakkur, heitoubi Keine yayari naimaibongrei mangyerkur hillouri, nani yairamra dalhakbini ram kalkur.

⁹ Heirouri Zippor'yei chanapawa, Moab'yei Krung Balak'ne fyoubini Israel rapya raal loukardoukur, heitoubi ani naya manchonanungei toubi Beor'yei chanapawa Balaamya ungyerkur.

¹⁰ Heiya Keineri Balaam'ya ninglhaknimakur, heisi tounarouri aniri naya phor shampikur, heitoubi Keine nayari aihutrei kalthutpikur.

¹¹ Heitoubi nani Jordan kung ralthutdurbi, heirou Jericho'ra wa'tlungkur; heirouri Jericho'ra paalbini louklei thimi rapni naya raal loukardourilkur; heirou Amoria rapnikhi, Perizzia rapkhi, Caanania rapkhi, Hittia rapkhi, Girgashia rapkhi, heirou Jebusia rapnikhi naya raal loukardourilkur; heisitoubi yayari Keine naihutra pilhakur.

¹² Heirouri Keine nai maibongra chi'knayei shakrung khoi khuirui rulkhat loumalhetbini Amoria'yei Krung napung'khniya nai maibongrei hulthutloukur, heiya heiwari naiyei raalshon'ne nimanung naiyei malani hulthutloukuri nimak.

¹³ Heitoubi nani yrani paangbi langkhoumak ram heiwaya Keine nanungei piwurkhoula; heirou nani sabangkhoumak khukarthil rapya, naiyei leina bi rapya, heirou nani chabini klei darkha yekul rapya heirou nani linglhakhoumak Olive heengyao rapyakhi Keine nanungei namma piwurkhoula.’ ”

Angtu Tlainirou Umpu ya Khalthutlak

¹⁴ “Ngam heineri asinungri, Umpuya chi-rikraini, heirou ukning khyingle kalhonni Aya chimni watlhou toulak; heitoubi naiyei patar rapni Jordan kung kraalni klei ramra, heirou Egyptra khrumbi watlhou toukhou thrailha rapya khingurkhoubi, Umpuya watlhou toulak.

¹⁵ Heiya kounakpi nani Umpuya watlhou tounimakme toulanungri, angtu tlainirou nani khalthutlaka, nani naiyei patar rapni Jordan kung ralbi klei thrailha rapya watlhou tourouko? Nimanung nani paalbi leina ramra Amoria rapbei thrailha rapya khrumrouko? Heiya keiyeiri, heirou keiyei cheemmaineri, kani Umpuya watlhou tourou.”

¹⁶ Heitounarouri thimi rapni loumallangbi kyun: “Kane Umpuya khingurkhoubi dei thrailha rapya watlhou touroume touri kairouwei tlatni leiyurasu;

¹⁷ kouweiyo toulanungri, kaiyei Dunpu, Umpuri kayakhi heirou kaiyei patar rapyakhi Egyptbei ramrei shok hoina bomrei ruithutloukur Pume, heirou kaiyei mit'thrilna maibongra kngakei lhou rapya touthutdurbi, heitoubi kai yenranchaeina lamtlunthung, heirou kaiyei yenpalheina lim rapbei tlakrakhi kaya ngaaksilpibi ruithutpikur Pume.

¹⁸ Heitoubi Umpune limrap touri yeekna thimirap nammayakhi kaiyei maibongrouwei hulthutloubi, kaya Amoria rapbei ramrakhi palyerkhou. Heineri kanikhi Umpuya watlhou touroume, ngamri A heiri kaiyei Dunpu.”

¹⁹ Heirouri Joshuane thimi rapnung shun: “Nane Umpuya watlhou touchangmakrou, ngamri Ari Khying Dunpu khat, heirou Ari (tharmu chimnung'tlim) horthitang Dunpu khat; Ane naiyei klalya nimanung borhya kukpimakrou.

²⁰ Kounakpi nani Umpuya khingurkhoubi, miramrei thrailha rapya watlhou toulanungri, Ane nairouwei kallekthutdurbi, heitoubi hillouri naya klah-mrimyerbi heirou naya kontlumheirou.”

²¹ Heirouri thimi rapni loumallangbi kyun: “Nimakme, heiya kani Umpuya watlhou touroume.”

²² Heirouri Joshua'ne thimi rapya shunthu: “Nane Umpuya watlhou tounanungei khalthutdurlame toubi kyun heiwari naimsha-naitamni tloumayung hoilaksu.” Heirou yani loukyun: “Kai'mshani tloumayung hoinaroume.”

²³ Heirouri ani kyun: “Heiyanungri asinung nani naihangrei klei miramrei thrailha rapya khingthutdurlaka, heitoubi Israellei Dunpu, Umpunungei naiukning lhukni malungshini watlhou toulak.”

²⁴ Heirouri thimi rapni Joshua'nung loukyun: “Kaiyei Dunpu, Umpuya kani watlhou tourouwa, heirou kani Aiyei houya ninglhakrou.”

²⁵ Heisitoubi tlaini heihakrou Joshua'ne thimi raple tloukantom khat mardingrilkur, heitoubi ani yanungei Shechem'ra kulyomyei chorit lammit raple Puwatlhouwei youkna lammit rapya sheembini malanthutpikur.

²⁶ Heitoubi Joshua'ne tloulhangrap heiwaya Dunpuei chaylam Lailikra mayelhakur; heirou ani thlungmtum tangkhat loubini, heitoubi Umpuei Khying Pucheem maibongra bok'heengtrung holira thlungmtum heiwaya bunbaangkur.

²⁷ Heitoubi Joshua'ne thimirap nammanung kyun: “Thilak, thlungmtum awari kanungei tloumayung touri shakhi hoirouwa; kouweiyo toulanungri, awane Umpune kanungei shunpikur tloulhangrap namma mayekthungurla; kounakpi nani naiyei Dunpuya yapimakur thukkanungri, thlungmtum awane nanungei tloumayung hoipilaksu.”

²⁸ Heirouri Joshua'ne thimi rapya, ai'aiyei cheemra shalkarkhaiyerkur.

Joshua Hiwurbi Kantompikur Ramra Khi-ruikur

²⁹ Heirouri Nun'yei chanapawa, Umpuei shikrui Joshua'ne kum machale chip hungtlungurbi hikur hillouri asitoubi hungthukura:

³⁰ Yane Joshua'yei khilhungya Ephraim Lhungdou ramrei klei, Gaash Lhungdouwei khalu lhangra klei aiyei yul paalkhouna bi Timnath-Serah'ra phumkur.

³¹ Heirouri Israel rapni Joshua'yei chaankhatrek, heirou aiyei hikur'hillei ringthung uparap, Umpune Israel rapnungei lhangaiyei lhou toupikurya mitrung'rungni muthungkur thimi rapbei chaan-khatrek'roukhi Umpuya watlhou toukur.

³² Heirou Israellei chanao rapni Josephbei thrukhrong rapya Egypt'rei kat'urheibini, heitoubi Jacobni Shechem'yei chanapawa Hamoryei chanao rapbei hutrei lapa macha khat pibini lowurkhou ram Shechemra phumkur; heisitoubi ram heiwari Josephbei yu-cha rapbei palnaram hoikur.

³³ Heirou Aaron'yei chanapawa Eleazar'khi hiwurbi, heitoubi aiyei chanapawa Phinehas'nungei piwurkhou Ephraim Lhungdou ramrei Gibe-ah bira aya khi-ruikur.