JOSHUA 23 - KHYINGEI PU'TLOU Bible (BSI)

Joshuane Karkhainei Tlou Yunkhou

¹ Asinungri kum kounak tlani yenrallura, heirou Umpune Israel rapya, yaya karhilni klei yeekna thimi rapbei bom'rouwei klah mathrilyerwurla; kheen heirouri Joshua'ri kum chungurbi beimakni yentarwura.

² Heirouri Joshua'ne summon malhetbini Israel namyerwaya-yaiyei yama upa rapya, ruipipu rapya, pichar pu rapya heirou lhou'urpu laa'urpu rapyakhi ungkartilbini, heitoubi yaya atoubi shunkhou: “Asinungri keiri kum chungurnei ngamrou beimakni yentarwura.

³ Heirou naiyei Dunpu, Umpune naiyei ngamrou Limrap heinungei toupikur heiwari nani muwurla, kouweiyo toulanungri, nanung'tlim raal kardourilpikur heiwari naiyei Dunpu, Umpu Ahoume.

⁴ Thilak, keine naiyei maleithungkur cheemkhur rapni yul dananungei ram khoini, hallei waiyoubi louklei Limrap nammaya keine raal maniwurbini, Jordan kungrouweini kulrel lhangra Samadrutang waphani meirui khingbini khaipiwurla,

⁵ Heitoubi naiyei Dunpu, Umpune yayari nai maibongrei ilthutdurbini, heitoubi naiyei mit'thrilna maibongrei yaya hulthutdurou. Heisitoubi naiyei Dunpu, Umpune nanungei kantompikur hilthungni, nani ram heiwaya kalbini yuldaheirou.

⁶ Heirouri nani ukningra krakni toubine, Moses'yei chaylam Lailikrei mayelhakkur tloulamrap nammaya baimaknanungei mukheine lhou toulak, heiyanungri nani heirouwei thya lhangra, nimanung thyoi lhangra kallekthutdur'makrou.

⁷ Heitoubi naihangrei maleithung lim rapbei hilla nani chanthungur'makrou da; heirou yaiyei thrailha rapbei min ramphaya nani mintlangnungei yamakrou, heirou yaiminra thimi hukhatnikhi tlou kantomnungei yamakrou; heirou yai thrailha rapya watlhou tounungeikhi yamakrou, heitoubi yai maibongra sikhuplhakbi khrumnungeikhi yamakrou.

⁸ Heiya nani angtu rampha klei heinakrimni, naiyei Dunpu, Umpura chetni marapbini leirou da.

⁹ Namgri, Umpune tang heirou mantrangkur lim rapya nai maibongrouwei hulthutloukur; heirou nanungeiri angtu rampharou thimi huchakhatnikhi nai maibongra mayungbi louleichangmakhui.

¹⁰ Naiyei thimi napung khatnikhi yeekna thimi lishing khatya hulloukur manilei; kouweiyo toulanungri, Ane nanungei kantompikur heinakrimni, naiyei Dunpu, Umpune nanung'tlim raal kardourilpilei.

¹¹ Heineri, naiyei Dunpu, Umpuya malungshini leinanungei nani mukheini toulaklo.

¹² Heisi nimakni, kounakpi nani hil kallengurbi, naihangra maleithung lim rapkou nani maraplanungri, heirou yale nulou-chalounara machokrilbini, heirou nale yale paal'manokrillanungri;

¹³ neiyei Dunpu, Umpune heinaksi lim rapyari naihangrouwei hulthutmakroume touri nani kanre-kandangni mulaka; heiya yarap heiri naiyei Dunpu, Umpune nanungei piwurkhou lhangaiyei ram heirouwei naya mangyerchi'bongyen naiyei thikmathuina chaang, heirou naiyei namkalla podtatkna thru heirou mitlungei mithrum khoini leirouwa.”

¹⁴ “Heiya thilak, angturi keiri tlaipangpallei chaanlam namma cha'tlungkhoubi lamtla yenluilhakrou waiyouwura. Naiyei Dunpu, Umpune nanungei kantompikur lhangaiyei tlourap heiri khatchatomkhi karlhikmakni tlungyerlame touri nai'ukning heirou nailhawai namma kyaoni muphawurla. Kantomkur tloulhangrap namyerwa heiri khatchatomkhi shuiyermakni hungtlung'yerwurla.

¹⁵ Ngam heineri asitoubi hungthukheirou, touri naiyei Dunpu, Umpune Aiyei kantomkur lhangaiyei lhourap namma hungtlungkyer heinakrimni, naiyei Dunpu, Umpune nanungei piwurkhou lhangaiyei ram arouwei naya tumni mangyerchi'bongyen, Umpune naidoura klah-mrimni lhangaimak namma yenpiheirouhui.

¹⁶ Heirou naiyei Dunpu, Umpune nanungei chay pibini mardingpikur tloulam rapya nani toubaiwurbi, heirou thrailha deideiya watlhou toubine khrumlanungri, Umpune nayari meithukni malungkharou, heitoubi Ane nanungei piwurkhou lhangaiyei ram arouwei khrangni maangyerheirou.”