JOSHUA 22 - KHYINGEI PU'TLOU Bible (BSI)

Cheemkhur Khyumtamni Yairamra Kallengkur

¹ Heirouri Joshua'ne Reuben cheemkhurrei thimi raple, Gad cheemkhurrei thimi rapkhi heirou Manasseh'yei cheemkhur lhang'khatdei thimi rapyakhi unglhakbini;

² heitoubi yanung shun: “Umpuei shikrui Moses'ne nanungei shunpikur chaytlourap nammaya hilthungni nani lhou touwurla; heirou keinekhi nanungei chay pikur hilthungni keitlouya nani chanthungurla.

³ Nane angtu rampha, tlaini anak tlani naiyei teinao rapya khingurkhou toukhi maklei, heiya naiyei Dunpu, Umpuei chaylamrap hilthungni nani baimakni ngaakbi chawurkhoula.

⁴ Heineri asinungri naiyei Dunpu, Umpune, Ane yanungei kantompikur hilthungni, naiyei teinao rapya mathrilyerwurla; ngam heineri asinungri nari kallenglaka, heitoubi Umpuei shikrui Moses'ne nanungei piwurkhou nairam, Jordan ralbi klei naicheemra shallaka.

⁵ Heiya Umpuei chaylam rapya, heirou Umpuei shikrui Moses'ne nanungei shunpikur chaylam rapya mukheinitom ninglhakbi, naiyei Dunpu, Umpuya malungshilak; heirou Aiyei lhoulam nammaya baimakni chalak, heirou Aiyei chaylam rapya baimakni ngakbi, heitoubi Aya krakni maraplak, heitoubi naiyei ukning-lhawai kyaoni Aya watlhou toulak.”

⁶ Heisitoubi Joshuane yaya phor shamthungbini hilkur, heitoubi yani yaiyei khuiluphiyei cheemra shaalkur.

⁷ Asinungri Moses'ne kulkung lhangei cheemkhur lhang'khatdei thimi rapnungeiri Bashan ramya yai yul dananungei yerkhaipikur; heiya cheemkhur lhangkhat'nungeiri Joshua'ne yai teinao rapbei hangra yul dananungei Jordan kungei kulrel lhangra ram khaipikur. Heisitoubi Joshua'ne yaya yaicheemra hilmallengnung, ani yaya phor shampithungkur.

⁸ Heirou ani yanungei shun: “Nane lalthumkhi heirou uiwaa rapkhi marthumni marpeilhakbi, heirou sinakhi, lapakhi, kulshankhi, thirkhi, heirou phirul-phishambkhi bilthimni mallongloubi naicheemra shallaka, heitoubi naiyei yeekna thimi rapbei raalla lukloukur putchei rapkhi naiyei teinao raple yerkhairillaka.”

⁹ Heisitoubi Reuben cheemkhurrei thimirap, Gad cheemkhurrei thimirap, heirou Manasseh cheemkhur lhang'khatdei thimi rapni Caanan'yei Shilohra Israellei chanao dei rapya lakurkhoubi, heitoubi Umpuei chay hilthungni Moses'ne yanungei yul dananungei piwurkhou ram Gilead'ranungei shalkur.

Karha’kna Khrahpal Sabangkur

¹⁰ Heitoubi yani Caanan ramrei Jordan kungpong, Gelilothra hungdayeinung, Reuben cheemkhurrei thimi rapni, heirou Gad cheemkhurrei thimi rapni, heirou Manassehyei cheemkhur lhang'khatdei thimi rapni bi heirou khrahpal tangkhat lhangaini sabaangkur.

¹¹ Heirou Israellei chanao rapni, “Thilak, Reuben'yei chanao raple, Gadyei chanao rapni heirou Manasseh'yei cheemkhur lhang'khatdei thimi rapni Israel rapbei ram, Jordan kungruira klei Caanan rammei maishuk lhangra touri Geliloth'ra khrahpal khat sabangurlame,” toubi yunkrilya mayeklhakurla.

¹² Heisitoubi Israellei chanao rapni heiwaya mayeknarouri, kulyomyei thimirap nammani Shilohra kartilbini, yaidoura raal dananungei wairangkur.

¹³ Heirouri Israel rapbei chanao rapni Gilead ramra, Reubenyei chanao raple, Gad'yei chanaorap heirou Manasseh'yei cheemkhur lhang'khatdei thimi rapnung Suipipu Eleazar'yei chanapawa Phinehas'ya,

¹⁴ heirou akou kalhonni cheemkhur uparap napung chiple toubine, Israellei phunghlam kantangei cheemkhur bommai uparap napung khatsol khalthutbini pao heimalhetkur; ya napung kantang heiri Israellei thimi lishing-lishingei ruipipu upathil.

¹⁵ Heitoubi yani Gilead ramra, Reuben'yei chanao raple, Gad'yei chanaorap heirou Manasseh'yei cheemkhur lhang'khatdei thimi rapnungei wabini, yani atoubi washunkur:

¹⁶ “Umpuei kulyom nammani atoubi yunrillura: ‘Angtu nani Umpuya manthamakni, naitamni khrahpal khat sabaangbini, Aiyei hil chanthungnarei mai khreithutdurbi, angtu nani Israellei Dunpuya karhani malungamkna yaomakni lhou toukurya koutouneiyo?

¹⁷ Kanungeiri Peorra borh lhou touwurkhou heiwani romakkhuime touneiko? Borh heiyei ngamni Umpuei kulyom nammaei doura pharknani chansher dawurbikhi, borh heirouwei kani angtu rampha marthingchimakhui.

¹⁸ Heineri angtu nani Umpuei hil chanthungnarei mai khreithutrouwako? Heirou angtu nani Airouwei mai khreithutdurbi, Umpuya karhani lhou tourou dawanungri, ninga hillei hungrou kyou Israellei kulyom rapbei chaanserrou Ane meithukni malungkharou.

¹⁹ Heitoubi kounakpi naiyei yuldana ram heiwani borhrou dawanungri, heirou Umpuei Pucheem sabaangbi leinabi, Umpuei ramra nani heirallhaklak, heitoubi kaihangra yuldabini leilaka. Heitoubi nani kaiyei Dunpu, Umpuei Pucheem sabaangkhouna pongra khrahpal sabaangbini Umpuyakhi heirou kaidourakhi karhani lhou toumakrou da.

²⁰ Zerahyei chanapawa Achan'ne malungamkna makni touheimak lhouya touwurnarou, Israel rapbei kulyomrap namyerrei doura Umpuei malungkha yongdakur nimaka? Heirou thimi heini aitamei mralni aitamthil himangkur nimakni thimi deikhi kyaoni himaangkur.’ ”

²¹ Heirouri Reuben'yei chanao raple, Gad'yei chanaorap heirou Manasseh'yei cheemkhur lhang'khatdei thimi rapni loumallangbi, heitoubi Israellei cheemkhur yama upa rapnung kyun:

²² “Mane-Mantrang Dunpu, Umpune; Mane-Mantrang Dunpu, Umpu! Aitamtomni kmu, heirou Israel rapnikhi mulaksu. Kounakpi kaiyei toukur lhou heini Umpuya karha'kna, nimanung malungamnamak lhou hoiyanungri, angturi kaya kalpimakniyasu!

²³ Kounakpi kani Umpuei hilla chanthungnarei mai khreithutnanungei kaitamni khrahpal sabaangkur hoiyanungri, nimanung malanput meira hongbini makatnungei, nimanung trunwaiyei lung makatnanungei, nimanung malung damyerna malanputya makatnanungei sabaangkurya hoiyanungri, Umpu Ai'mshani heinung'tlim tanti pilaksu.

²⁴ Tanghakni heihakpari nimakme! Heiya kani ningchiwurbi heiwaya sabaangkur touri hillei hungthukrou kyou naiyei chanao rapni kaiyei chanao rapnung: ‘Nane Israel rapbei Dunpu, Umpuya kou tourouwo?

²⁵ Ngamri Umpune Jordan kung heiwaya kale na Reubenyei chanao raple Gad'yei chanao rapbei tlakra ram rikarchunna bi hoiyerwurla, heineri Umpuei bomra naiyei sirukri koukhatkhi yaomak,’ toubine yunkurkhi kya. Heiyanungri naiyei chanao rapni kaiyei chanao rapya Umpuya chi-rikrainarei toudongkurkhi kya.”

²⁶ Heingammei kani kyun: “Kane khrahpal khat sabangase, heiwari malanput hongnanungei nimakrou, nimanung malanput makatnanungeikhi hoiyermakrou.

²⁷ Heiya heinung'tlimri, heiwani nale kai tlakra heirou kai hillei hungrou kyou yu-cha rapbei tlakrakhi tlou mayungna hutlha touri shakhi khoini leibi, kani Umpuei bomra kaiyei khrumnaput meira pumni hongbini, heirou kaiyei trunwaiyei lung makatput rapkhi heirou malung damyernei malanput rapkhi makatbini Aya watlhou toukhoume toubi mubini, naiyei chanao rapni kaicha rapya, ‘Nari Umpuei bomra kousiruk khatkhi yaomakme’ toubine yunpimakrou.”

²⁸ Heitounei ngamrou kani atoubi yunkhou: “Kounakpi yani kanungei nimanung kaiyei chanao rapnungei hillou heinaksi yunthulanungri, kani loumallangrou: ‘Kaiyei patar rapni sabangkhou khrahpalyei hutlhaya thilak; heiwari khrumnaput hongbini makatnakhi nimak, heirou malanput rapya makatnanungeikhi nimak, heiya heiwari kale naiyei tlakra tlou mayungna hutlha khoini louklei.’

²⁹ Kaiyei Dunpu, Umpuei Pucheem maibongra Umpuei khrahpal khat mayungbi klei heiwaya duini, malanput hongnanungei heirou trunwaiyei lung makatnanungei heirou malanputya makatnanungei khrahpal khat sabangbini Umpuya karhani, Airouwei mai khreithutnei lhouri angtu tlainirou kanungei tlatkur hoiniyasu!”

³⁰ Heisitoubi Suipipu Phinehas'ne akou kalhonbi klei thimirap touri Israellei cheemkhur yama upa rapni Reuben'yei chanao raple Gad'yei chanaorap heirou Manasseh'yei cheemkhur lhang'khatdei chanao rapbei loukyun tloulhang rapya mayeknarouri, yanungei malungkhrahkur.

³¹ Heitounei Eleazar'yei chanapawa, Suipipu Phinehasni Reubenyei chanao raple, Gad'yei chanaorap heirou Manasseh'yei cheemkhur lhang'khatdei chanao rapnung shun: “Angturi kani muwurla touri Umpuri kaihangra leileime, ngamri nani Umpuya karhani malungamnamak lhouri toukhoumaklei; asinungri nani Israellei chanao rapya Umpuei hutrei kalthutpiwurla.”

³² Heirouri Eleazar'yei chanapawa Phinehas'ne cheemkhur yama upa raple Reuben'yei chanao raple Gad'yei chanao rapbei birouwei, Caanan ramra yenkallengbi, Israellei chanao rapnungei pao yenmallengpikur.

³³ Heirou pao heiwani Israellei chanao rapya malungkhrahyerkur, heitoubi Israellei chanao rapni Umpuya mathangbi phor pikur; heirouri yani Reubenyei chanao raple heirou Gad'yei chanao rapni paalna ramra kabini raal dabi toumangnanungei tlouri koukhatkhi yunrilmakura.

³⁴ Heirouri Reuben'yei chanao raple Gad'yei chanao rapni khrahpal heiwaya “Tlou'mayungna hutlha” toubine min thulkur, Ngamri yani kyun: “Awari kaitlakra ‘Umpuri Dunpu’ tounei tlou mayung khoini klei.”