JOSHUA 21 - KHYINGEI PU'TLOU Bible (BSI)

Levia Rapnungei Khukarthil Somlile Chot Khaipikur

¹ Heirouri Levia rapbei cheemkhur upa rapni Suipipu Eleazar'le, Nun'yei chanapawa Joshua heirou Israellei cheemkhur nammaei upa rapbei maibongra wachangkur.

² Heitoubi yani Caanan ramrei Shiloh'ra yanungei shunchabini kyun: “Moses'nung chay piwurkhou hilthungni, nangni kai paalnanungei khukarthil raple kai thimi rapbei uiwaa dunyeinung hal silnanungei ramhangkhi khaipilaklo.”

³ Heisitoubi Israellei chanao rapni Umpuei chay hilthungni, yaiyei yuldana ramya Levia rapbei paalnanungei, heirou yaiyei uiwaa dunnanungei ramhang khoini khaipikur.

⁴ Heirouri meirui heiwari Kohathia rapbei cheemkhur bommai chanao rapnungei hungdawura. Heisitoubine Suipipu Aaronyei chanao, Levia rapni meirui thinarou, Judah'yei cheemkhur'rouwei heirou Benjamin cheemkhur'rouwei khukarthil chiple khyum phakur.

⁵ Heitoubi Kohath'yei chanaorap deideinungei meirui hungdawurbi, Ephraim cheemkhur bommairei, heirou Dan cheemkhur-bommairei, heirou Manasseh'yei cheemkhur lhang'khatrei khukarthil chiptam phakur.

⁶ Heitoubi Gershonyei chanao rapnung meirui hungdawurbi, Issachar cheemkhur bommairei, heirou Asher cheemkhur bommairei, heirou Naphtali'yei cheemkhurrei, heirou Bashan'ra klei Manasseh'yei cheemkhur lhang'khatrei khukarthil chiple khyum phakur.

⁷ Heitoubi Meraria'yei chanao rapni yaiyei bommai mshing hilthungni Reuben cheemkhurrei, heirou Gad cheemkhurrei, heirou Zebulun cheemkhurrei khukarthil chiple khni phakur.

⁸ Heisitoubi Israellei chanao rapni, Umpune Moses'nung chay piwurkhou hilthungni, meirui khingbini Levia rapnungei khukarthil raple heirou uiwaa dunnanungei halsilna ram khaipikur.

⁹ Judah'le Simeon cheemkhur chanao rapbei ramrei khaithutpikur khukarthil rapbei min rapri arapriya.

¹⁰ Yarap heiri Levia cheemkhurrei, Aaronyei chanao raprei Kohathia bommai rapnungei lamkriyei meirui thinara likarsui hungdakur khukarthilrap.

¹¹ Heisitoubi yani yanungei Judah'yei Lhungdou ramrei Kiriath-Arba heiyei karhilni klei halsilna ramhang kyaoni khaipikur. (Arba'ri Anak'yei pa).

¹² Heiya khukarthil heiyei phailou raple, heiyei karhillei klei yultlairap heiri Jephunnehyei chanapawa Caleb'nungei aiyei yuldana ram khoini yani piwurkhou.

¹³ Heisitoubi yani Hebron'ya heiyei halsilna ramhang kyaoni Suipipu Aaron'yei chanao rapnungei, thimihat thimiyei trukyulna khukarthil khoini khaithutpikur. Heitoubi yani Libnah'khi, heiyei halsilna ramhangkhi kyaoni,

¹⁴ heirou Jattir'le heiyei halsilna ramhang kyaoni heirou Eshtemoa'le heiyei ramhangkhi kyaoni;

¹⁵ heirou Holon'khi heiyei halsilna ramhang kyaoni, Debir'le heiyei halsilna ramhang kyaoni;

¹⁶ heirou Ain'le heiyei halsilna ramhangkhi kyaoni, heirou Juttah'le heiyei halsilna ramhangkhi kyaoni, heirou Beth-shemesh'le heiyei halsilna ramhangkhi kyaoni; cheemkhur khintamrei khukarthil takotam khaithutpikur.

¹⁷ Heitoubi Benjamin cheemkhurrei khukarthil Gibeon'le heiyei halsilna ramhangkhi kyaoni, heirou Geba'le heiyei halsilna ramhangkhi kyaoni;

¹⁸ heirou Anathoth'le heiyei halsilna ramhangkhi kyaoni, heirou Almon'le heiyei halsilna ramhangkhi kyaoni khukarthil phalitam khaipikur.

¹⁹ Aaron'yei chanao, Suipipu rapbei halsilna ramhangrap kyaoni khukarthil chiple khyumbil tlung.

²⁰ Heitoubi Levia Kohathia cheemkhurrei chanaorap deidei'nungeikhi Ephraim cheemkhurrei khukarthilrap khaipikur.

²¹ Heirou yani yanungei Shechem'ya thimihat thimini trukyulna khukarthil khoini heiyei halsilna ramhangkhi kyaoni Ephraim Lhungdou ramrei khaipikur, heitoubi Gezer'khi heiyei halsilna ramhang kyaoni khaipikur.

²² Heirou Kibza-im'le heiyei halsilna ramhangkhi kyaoni, heirou Beth-Horon'le heiyei halsilna ramhangkhi kyaoni, khukarthil phalitam khaipikur.

²³ Heitoubi Dan cheemkhurrei, Eltekeh'le heiyei halsilna ramhangkhi kyaoni, heirou Gibbethon'le heiyei halsilna ramhangkhi kyaoni,

²⁴ heirou Aijalon'le heiyei halsilna ramhangkhi kyaoni, Gath-Rimmon'le heiyei halsilna ramhangkhi kyaoni, khukarthil phalitam khaipikur.

²⁵ Heitoubi Manasseh'yei cheemkhur lhang'khatrei Taanach'le heiyei halsilna ramhangkhi kyaoni, heirou Gath-Rimmon'le heiyei halsilna ramhangkhi kyaoni, khukarthil khintam yani khaipikur.

²⁶ Kohath'yei chanao rapbei bommai rapnungei khaithutpikur khukarthil raple heiyei halsilna ramhangrap kyaoni, nammari chiptam klei.

²⁷ Heitoubi Levia'yei bommai raprei Gershon'yei chanao rapnungei, Manasseh'yei cheemkhur lhang'khatdei ram Bashan'rei Golan'ya, yaiyei thimihat thimiyei trukyulna khukarthil khoini, heiyei halsilna ramhangkhi kyaoni, heirou Be-eshterah'khi, heiyei halsilna ramhangkhi kyaoni khukarthil khintam khaipikur.

²⁸ Heitoubi Issachar cheemkhurrei, yani Kishion'le heiyei halsilna ramhangkhi, heirou Daberath'le heiyei halsilna ramhangkhi kyaoni khaipikur.

²⁹ Jarmuthle heiyei halsilna ramhangkhi kyaoni, heirou En-Gannim'le heiyei halsilna ramhangkhi kyaoni, yani khukarthil phalitam khaipikur.

³⁰ Heitoubi Asher cheemkhurrei, yani Mishal'le heiyei halsilna ramhangkhi, heirou Abdon'le heiyei halsilna ramhangkhi kyaoni khaipikur.

³¹ Helkathle heiyei halsilna ramhangkhi kyaoni, heirou Rehob'le heiyei halsilna ramhangkhi kyaoni, khukarthil phalitam khaipikur.

³² Heitoubi yani Naphtali'yei cheemkhurrei Galilee'yei Kedeshya, thimihat thimini trukyulna khukarthil khoini, heiyei halsilna ramhangkhi kyaoni khaipikur; heitoubi Hammoth-Dor'le heiyei halsilna ramhangkhi kyaoni, heirou Kartan'le heiyei halsilna ramhangkhi kyaoni; khukarthil khyumtam khaipikur.

³³ Heirou Gershon cheemkhur bommai rapbei khukarthil rapri yaiyei halsilna ramhangrap kyaoni, khukarthil chiple khyumbil klei.

³⁴ Heitoubi Levia'yei cheemkhurdei, Merari'yei bommai rapnungeikhi, Zebulun cheemkhurrei Jokne-am khukarthille heiyei halsilna ramhangkhi kyaoni, heirou Kartah'le heiyei halsilna ramhangkhi kyaoni yani khaipikur.

³⁵ Dimnah'le heiyei halsilna ramhangle, Nahalal'le heiyei halsilna ramhangkhi kyaoni, khukarthil phalitam khaipikur.

³⁶ Heitoubi yani Reuben cheemkhurrei Bezer'le heiyei halsilna ramhangkhi, heirou Jahaz'le heiyei halsilna ramhangkhi kyaoni khaipikur.

³⁷ Heirou Kedemoth'le heiyei halsilna ramhangkhi, heirou Mephaath'khi heiyei halsilna ramhangkhi kyaoni, khukarthil phalitam khaipikur.

³⁸ Heitoubi yani Gad cheemkhurrei Gilead'rei Ramoth'le heiyei halsilna ramhangkhi kyaoni, yaiyei thimihat thimine trukyulna khukarthil khoini khaipikur; heitoubi Mahanaimkhi heiyei halsilna ramhangkhi kyaoni khaipikur.

³⁹ Heirou Heshbon'khi heiyei halsilna ramhangle kalhonni, Jazer'khi, heiyei halsilna ramhangkhi kyaoni: nammani khukarthil phalitambil yanungei khaipikur.

⁴⁰ Khukarthil'rap namyerwa heiri Levia'yei cheemkhurrei maleithung Merari'yei bommairap hilthungni khaipikur; heirou yaiyei meiruira likarsui khulthangkur khukarthilrap heiri chiple khni.

⁴¹ Israel chanao rapbei yuldana hangra Levia rapbeikhi nammani yaiyei halsilna ramhangrap kyaoni khukarthil somlile chotbil klei.

⁴² Khukarthilrap heiri nammani halsilna ramhang rapni kuikarhilbi klei.

⁴³ Heisitoubi Umpune Israel rapbei patar rapnungei piroume toubi kantompikur ram rapya yanungei piwurbi, heitoubi yani heiyei rilla ram kalbini yuldabi paalkur.

⁴⁴ Heisitoubi Umpune yaiyei patar rapnungei kantompikur hilthungni yaiyei paalna rambi kantangrou kouraal khatkhi leiyermakni kyingni mathrilyerkur; heitoubi yaiyei yeekna hu lim khatnikhi yai maibongra karhani mayungchangmakur, ngamri Umpune yaiyei yeekna thimirap nammaya yaihutra dayerkur.

⁴⁵ Umpuei kantompikur lhangaiyei tloubomrap namma heiri toukartlikkur hungtlungmakkuri khatchatomkhi yaomaklei; namyerwa tlungyerkur.