JOSHUA 20 - KHYINGEI PU'TLOU Bible (BSI)

Thimihat Thimine Trukyulna Khukarthil Thruktam

¹ Heirouri Umpune Joshua'nung shunbi atoubi kyun:

² “Israellei chanao rapnung atoubi shunpilak, touri Keine Moses'nung chay pibini neinungei shunpikur heinakrimni, ‘thimihat thimi rapni trukyulnanungei khukarthil khalthutyerlak;

³ touri, thimi hukounak khatni toushuiwurbi, nimanung khalkhoumakni thimi khatya hatkur thukkanungri, bi heiyei rilla truklhakbi yulkur yarou; heisitoubi birap heiwari nani thimi hatnei hee-khlanglhak thimirei trukyulna bi hoirou da.

⁴ Heitoubi ani khukarthilrap heiyei khatra truklhakeinung, ani khukarthil heiyei palshung shumtrumra wamayungbi heitoubi khukarthil heiyei lhou'ur upa rapbei maibongra aiyei lhouthuk heiwaya shunthutrou da; heiroubi yani aya khukarthil rilla ruilhakbini, yaihangra anungei bi khat marshikpibi leiyerrou da.

⁵ Heirou kounakpi hee-khlang lhakrou thimini aya heichanthunganungri, yaneri thimihat thimi heiwaya aihutra loupithutmakrou da; ngamri ani aiyei cheemlhun heiwaya toushuiwurbi hatkur, heiya aya machinnei rangbini hatkurri nimak.

⁶ Heitoubi ani kulyomyei maibongra pichar toubongyen, heirou heichaan heiyei Suipipu upa khoi thimine hibongyen khukarthil heirou wathukmakni leirirou da. Heirouri thimihat thimi heine aiyei trukkurna khukarthilla hanui yenkallengbi, heitoubi aiyei cheemra kallenglhakbi hungklei yarou.’ ”

⁷ Heisitoubi yani Naphtali'yei Lhungdou ramrei Galilee rilla Kadesh, heirou Ephraim Lhungdoura Shechem, heirou Judahyei Lhungdou ramra Kiriath-Arba touri Hebron khukarthil rapya khalthutbini khoukur.

⁸ Heitoubi Jerichoei pongra klei Jordan kungei kulkung lhangrani Reubenyei ram Ramthingei phaikara klei Bezer, heirou Gad cheemkhuryei ramra Ramoth-gilead, heirou Manassehyei ram Bashan'rei Golan khukarthil rapya yani khalthutbini khoukur.

⁹ Khukarthilrap heiri Israellei chanaorap nammanungei, heirou yaihangra ramtangbi klei miram-mithrillei thimi rapnungeikhi khalthutbini khouwurla, touri thimi huhuni suiwurbi hukounak thimi khatya hatkur thukkanungri, bi heiyei rilla trukyulkur yarou; heiyanungri ani kulyomyei pichar maibongra mayungbongnungri hee-khlanglhak thimiyei hutra hiwurmakrou.