JOSHUA 2 - KHYINGEI PU'TLOU Bible (BSI)

Rahab'ne Raal'mucha Thimi Rapya Yulkhoupi

¹ Heirouri Nun'yei chanapawa Joshua'ne Shittim touri Acacia heengyao hangrouwei napawa napung'khniya raal'mucha khoini: “Nakhuntari chalaka, heitoubi lungkhoini Jericho'yei ramya muni wabi thikullaka,” toubi shunmatubini malhetkur. Heisitoubi yakhuntani wathukkurbi, heitoubi min Rahab toubi ung, chorit naimakpi napuiya khatpiyei cheemra wachangkur, heitoubi bi heitamrou chakkurkhou.

² Heirouri Jerichoei Krungnung asitoubine pao shunpikur; “Thilak, kaiyei ram awaya muni thikulnanungei toubi angtu msa Israellei thimi tha bi arouwei wachangura.”

³ Heitounarouri Jerichoei Krungni pao heimalhetbini Rahab'nung atoubi washunkur: “Neicheemra wachangkur napawa rapya heiurthutlak; kouweiyo toulanungri, yani kairam awaya namma muni thikulnanungei wachangkura.”

⁴ Heiya napuiya heiwini napawa napung'khniya muni martleiwurbi yulkhoukur, heitoubi ani loushun: “Moi, chimme, thimi napung'khni heiri keinungei wachangkhou, heiya yarap heiri kourei thimiyo touri keiri shak mumak.

⁵ Heiya rawai yenmehwairouri, Palshung thungrou waiyouweinung, yakhuntari shalthutdura; heiya thimirap heiri koulhangra shalkurro touri keikhi muthungmakura. Nane khrangni heichanthungalo, chanphaheirou.”

⁶ Heiya aneri yakhuntaya cheem bungkhum doura katruibangurbi, heitoubi ani yasiya sapuldang marpeikhouna hangra lhangaidui seokhalbini yulkhoukur.

⁷ Heisitoubi thimi rapni raal'mucha rapya hulthungbi Jordan lhangrei lamtangra chanthungkur, heitoubi kungpal wadakur; heirou yaya hil chanthungkur thimi rapni wathukkurle tallengni, yani palshung heithungthungkur.

⁸ Heirouri yasini msa ipbongnung, Rahab'ne cheem bungkhum doura kakabi;

⁹ heitoubi yasiya kashun: “Ram awari Umpune nanungei piwurlame touri keine muwurla; heitoubi naiyei ngamrou chirilkur heiwari kaidoura dawura, heineri ram arou paalbi klei thimirap nammari nai maibongra chitekkurbi kanchunwurchiya.

¹⁰ Ngamri nani Egyptrei heishalthutyei kheenrou koutoubi Umpune nai maibongra Mrao Samadruya yui heepyerkurro toukhi kani mayekkurla; heirou Jordan kung heiralbi klei Amoria'yei Krung napung'khni, Sihon'le, Og yarukhniyakhi koutoubi nani hatdurbi toumangkurro tounei paokhi kani mayekkurla.

¹¹ Heirouri kani heiyei paoya mayeknarouri, kaiyei solung rapri chitekkurbi yuinakni yasundakur, heirou naingamrou pao mayeknarou kaihangra thimi hukhatkhi lhawai yaomakurchiya; kouweiyo toulanungri, naiyei Dunpu, Umpu heiri Thangwan-Shimlei khintamrekei Dunpu.

¹² Ngam heineri asinung, kringpibi nakhuntani Umpuei minra keinungei kantomkhoulak, touri keine nasinungei lhangaini toupikur heinaksini, kaipawaei cheemmai-bommai rapyakhi lhangaini toupiroume toubine malungamna kya hutlha khat keinungei chimni shunpikhoulak.

¹³ Heitoubi kaiyei pawale, kai nuwi, heirou keitrah raple, keiyei teinao rapyakhi, heirou yaiyeime touwei'mkheikhi hatkarkul'khoubini, kayari hinarouwei kalpilaklo.”

¹⁴ Heirouri napawa rapni loumallangbi anung loukyun: “Kakhuntayei rongchan awakhi nanungei, kounakpi karukhnine lhou toukur awaya nangni yunthutpi'manungri, heirou Umpune ram awaya kaihutra pilhakei kheenrouri, kanikhi nayari lhangaini heirou malungamknani lhou toupirou.”

Rahab'ne Raalmucha Rapya Martleithutkur

¹⁵ Heirouri Rahab'ne yaya khamputra ruifret mankhaisundabi kanchumsun'dayerkur; ngamri aiyei cheem heiwari khukarthillei raalpal doura maraprilni sabangbi klei.

¹⁶ Heirou ani yanungei shunthungkur: “Nane lhungdou lhangra shallaka, heiyanungri naya hulbi chanthung thimi rapni nakhuntaya karthangmakrou; heitoubi yani kallengbongyen, nani bi heirou tlaini khyumni leikhoulaka. Heihillou nani nailamra kallenglaka.”

¹⁷ Heirouri napawa rapni anungei shunkhou: “Nangni kakhuya neinungei kantomyerkur tloubom heiwari kani malummakrou.

¹⁸ Kouweiyo toulanungri, kani ram awaei rilla wachangei kheenrouri, nangni kaya kanthui'sunda'yerna ruifret mrao heiri khamputra msuibini mankhaisundabi loukhoulak; heitoubi nani cheemwaira, neipale, neipuile, neiyei trahpa raple teinao rapyale heirou neipaei cheemmai-bommai'yei thimirap nammakhi ungmartilbini louleiyerlak.

¹⁹ Hei'nimanungri, kounakpi thimi hukounak khatni naiyei cheemwai'rouwei pothutbini, khullamra ranchabi louleiyeinung, khi-kna thukanungri, aitamei mral hoicharou, kaiyei mral hoimakrou; heiya thimi hukounak khatni cheemwaira louleibi, aya hatkur thukanungri, heiyei mralri kaidoura darou.

²⁰ Heiya kounakpi nangni kaiyei toukur lhou awaya shunthutdurla'nungri, nangni kasiya kantomyerkur tlou heiwari baiyanungkhi kaiyei mral hoimakrou.”

²¹ Heirouri Rahab'ne loumallangbi kyun: “Nai kyun heiwani heisi hoilakasu.” Heirouri ani yaya malhetthutdurbi, heitoubi yasini shaalkur; heisitoubi ani khamputra ruifret mrao khat msuibini mankhaisundabi khoukur.

²² Heirouri yakhuntani shaallurbi, lhungdoura chakur, heitoubi yaya hil-chanthungkur thimi rapni kallengbongyen, yani bi'heirou tlaini khyumnibil leiwurkhou. Yaya hil-chanthungkur thimi rapni yakhuntayari lamtlunthung karyouni raphakhou, heiya yakhuntaya rapha'mukhoumakni kallengkur.

²³ Heirouri napawa napung'khni heini lhungdou ram'rouwei yenkallengbi, heirou kung yenralbini, Nun'yei chanapawa Joshua'yei leinara hungtlungkur; heitoubi yanungei thukkur lhouthukrap nammaya yani anungei hungshunthutpikur.

²⁴ Heirou yakhuntani Joshua'nung yunpikur: “Tanghakpani ram heiwaya Umpune kaihutra piklhakurla; kouweiyo toulanungri, ram heirou klei thimirap nammari kaingamrou pao mayeknarouri chitekbini solungkhi yuinaksini yawurchiya.”