JOSHUA 18 - KHYINGEI PU'TLOU Bible (BSI)

Maleithung Ram Nammaya Yerkhaikur

¹ Heirouri Israellei chanaorap nammani Shiloh'ra Khulbung kartilkur, heitoubi bi heirou Khulbung kartilna khuiluphi cheem khat sabaangkur. Heitoubi Khokul ram heiwari yaidaakra kulchalphopkur.

² Heiya Israel cheemkhur rapbei hangra paalna ram siruk phamak cheemkhur enitam maleithungleihui.

³ Heitounei Joshuane Israel chanao rapya shun: “Nai patar rapbei Dunpu, Umpune nanungei piwurkhou ram heiwaya nani ram kalnanungei wachangmakni kounak tlani leiheirouwo?

⁴ Heineri nani cheemkhur kantangrei thimi napawa napung-khatsol khalthutlaka, heitoubi keine yaya malhetrou, heirouri yani ram heiwaya karyouni karwaichabini, yaiyaiyei cheemkhur rapni yul dananungei bi rapya thilhakbini, heitoubi yani keileinara hanui yenkallengthurou da.

⁵ Heitoubi yani ram heiwaya siruk eni thukni yerkhairillou. Judahni khate lhangra rikarchunbi leirou da; heitoubi Joseph'ne khalu lhangra rikarchunbini leirou da.

⁶ Heitoubi nani thilhakbi raphathutkur ram heiwaya siruk'eni thukni yerkhaibini mayethutlak, heitoubi naiyei mayethutkur heiwari keinungei heilhaklak, heitoubi heirapya keine kaiyei Dunpu, Umpuei maibongra meirui khingthirou.

⁷ Heiya Levia rapbeiri ram siruk yaomakrou; kouweiyo toulanungri, Umpuei Puwatlhoura Suipipu khoini klei heiwani yaiyei siruk hoirou da. Gad'le Reuben heirou Manasseh'yei cheemkhur lhang'khatdei sirukkhi Umpuei shikrui Mosesne yanungei khaipiwurbi, Jordanyei kulkung lhangra yaiyei yul dana ram phawurchila.”

⁸ Heisi tounarouri thimi rapni kanthoubi ram thikulnanungei chayoukur; heirou Joshua'ne ram thikullou charoukyou thimi rapya chay pibini shunmtukur: “Nane chawalo, heitoubi ram karyouni karwaichabi thikullak, heitoubi keinungei hanui yenkallengthulak, heiyanungri keine nanungei Shiloh'ra Umpuei maibongra meirui khingbini ram yerkhaipirou.”

⁹ Heisitoubine thimi rapni chawurbi ram karyouni karwaichabini thikulkur, heitoubi ram heiyei khukarthil rapya siruk'eni thukni yerkhairilbini lailik khatra mayelhakur, heitoubi yani Shilohra Joshua'nungei yenkallengthu.

¹⁰ Heirouri Joshua'ne Shiloh'ra Umpuei maibongra yanungei meirui khingthibini, heitoubi Israel chanao rapnungei yai cheemkhur-bommai hilthungni ram heiwaya yerkhaipikur.

Benjamin Cheemkhurrei Ram Rikarchunna

¹¹ Asinungri ram yerkhainei meirui khingbi thinarouri Benjamin'yei chanao rapnungeiri, yaiyei cheemkhur-bommai hilthungni hungdawura; heitoubi yaiyei ram rikarchunna heiwari Judahyei chanao raple Josephbei chanao rapbei tlakra hungdawura.

¹² Heitoubi yaiyei ram khalu lhangei ri heiwari Jordan'rei waiyoubini, heitoubi thaklhangra Jericho'bil ka'tlunglei, heitoubi kulrel lhangrani lhungdou ramthungni katringurbi, heirou Beth-Aven ramthingbil kadonglei.

¹³ Heitoubi bi heirouweini yaiyei ri heiwari Luzbil touri Bethel yudabi, heitoubi khate lhangra yukringsundabi, heirou Beth-Horon lhungdouwei mayu lhangra klei Ataroth-Addar lhungdoubil yudalei.

¹⁴ Heitoubi ri heiwari Beth-Horon'yei khate lhangei lhungdoura khreilhakurbi, lhungdou heiyei kulrel lhangrouweini khate lhangra yenringsundakur; heitoubi Kiriath-Baal'bil(Kiriath-Jearim toubikhi ung) yudakur; bi heiwari Judah'yei thimi rapbei paalna khukarthil khat. Kulrel lhangei rikarchunnari awariya.

¹⁵ Heitoubi khate lhangrei rikarchunna heiwari Kiriath-Jearim wadongna heirouwei waiyoubini, kulrel lhangra Ephron heikhinghoiwurbi, Nephtoah'yei yuileina'bil wadalei.

¹⁶ Heitoubi ri heiwari Rephaim phaikarei khalu lhangra klei Ben-Hinnom'le mai kallukrilbi klei lhungsobil yenringsundabi, heitoubi Hinnom phaitlai yenkhingralbini, khate lhangrani Jebusia khukarthillei lhung-woira yenringsundabi, heirou En-rogel'bil yongdani rikarchunrilkur.

¹⁷ Heitoubi ri heiwari khalu lhangra katringurbi, heirou En-Shemesh'ra kawurbi heitoubi Adummim kana maibong lhangra mai kallukrilbi klei Gililoth'ra katkhinghoikur, heitoubi Reuben'yei chanapawa Bohan'yei thil'thlung bunkhounabil yongdakur.

¹⁸ Heitoubi ri heiwari khalu lhangra Beth-Arabahyei lhunglimthung yenringsundabi, heitoubi Arabah'bil yongdani ri karchunrilkur.

¹⁹ Heitoubi heiyei ri heiwari Beth-Hogla'yei khalu lhangra katkhingrallurbi, heirou Mitti Samadruei khalu lhangrei ruithung, Jordanyei khate yongdongnabil kadongkur. Khate lhangei ri karchunnari awariya.

²⁰ Heiyakhi duinara Jordan kungni kulkung lhangrei ri karchunna hoikna. Awane Benjamin cheemkhurrei bommai mshing hilthungni yerkhaiwurbi ri karhilni kuikoolkur.

²¹ Benjamin'yei cheemkhur bommaiyei mshing hilthungni yerkhainarei phakur khukarthil rapri: Jericho, Beth-Hogla, heirou Emek-Keziz;

²² heirou Beth-Arabah, Zemaraim heirou Bethel;

²³ heirou Avvim, Parah heirou Ophrah;

²⁴ heirou Chephar-Ammoni, Ophni heirou Geba; yarap heiri yaiyei yultlai rapkhi kyaoni khukarthil chiple khni tlung.

²⁵ Gibeon, Ramah heirou Be-eroth;

²⁶ heirou Mizpeh, Chephirah heirou Mozah;

²⁷ heirou Rekem, Irpeel heirou Taralah;

²⁸ heirou Zela, Ha-eleph, heirou Jebus touri Jebusia (heiri, Jerusalem'ya kyun), Gibe-ah touri Gibeath heirou Kiriath-Jearim; yarap heiri yaiyei yultlai rapkhi kyaoni khukarthil chiple phalibil tlung. Awari Benjaminyei cheemkhur-bommai hilthungni yerkhaipikur yuldana ramthil.