JOSHUA 16 - KHYINGEI PU'TLOU Bible (BSI)

Ephraimnung Khaithutpikur Ram Rikarchunna

¹ Heitoubi Josephbei chanao rapni meirui khulthangkur ram heiwari, Jericho pongrei Jordan kungrei waiyoubini, Jericho'yei kulkung lhangrei yui leinathung katringurbi, lhungdou ramra Bethelbil kadalei.

² Heitoubi Bethel'rouweini Luz'bil katringurbi Arkia touri Archia rapbei ram Ataroth'ra rikarchunlei.

³ Heitoubi bi heirouweini kulrel lhangra rikarchunna yenringsundawurbi, Japhletiayei ramle ri karchunrilbi, heirou Phaitlai ramra klei Beth-Horonra ri karchunrilbini heitoubi Gezer'bil yudabini Samadrubil yudonglei.

⁴ Heisitoubi Josephbei chanaorap, Manasseh'le Ephraim'ne yaiyei yul dana ram siruk rapya phaloukur.

⁵ Heitoubi Ephraim'yei chanao rapnungei yaiyei cheemkhur bommairap hilthungni yerkhaipikur ram rikarchunnari: Yaiyei yul dana ramri kulkung lhangrani Ataroth-Addar rouweini Beth-Horon'yei khalu lhangra wa'tlunglei.

⁶ Heitoubi Mich-methath'yei thak lhangrani Samadru'bil wadalei, heirou ri heiwari kulkung lhangra khreilhakurbi Taanath-Siloh'bil wa'tlunglei, heitoubi Jan-oahyei kulkung lhangra heikhingralkur.

⁷ Heitoubi Jan-oah'rouweini Ataroth'ra heiringurbi heirou Naarah'bil yongtlungkur, heitoubi Jericho'ra yenringsundabi Jordan kungbil yongkarchunlei.

⁸ Heitoubi Tappuah rouweini ri heiwari kulrel lhangrani Kanahyei yui leinabira yenkhingralbi, heirou Samadrubil wadalei. Ephraim cheemkhurrei chanao rapni yaiyei cheemmai-bommai hilthungni yerkhairilkur yul dana ramri awariya.

⁹ Manasseh cheemkhurrei chanao rapni yul dana yultlai raple khukarthil rapbei hangra Ephraim cheemkhurrei chanao rapbeikhi yultlaile khukarthil rapkhi laini yaolei.

¹⁰ Heiyanungkhi Gezer'ra yuldabi louklei Caanania rapyari yani hulthutkhoumak; heitounei ngamrou Caanania rapni Ephraim rapbei hangra angtu ramphani paalthungbi leileihui, heiya yarap heiri Ephraim rapbei shok hoibini lhoupang thimirap khoini leikhou.