JOSHUA 14 - KHYINGEI PU'TLOU Bible (BSI)

Cheemkhur Takotamle Lhangkhatni Ram Yerkhaikril

¹ Suipipu Eleazar'le, Nun'yei chanapawa Joshua'ne heirou Israellei cheemkhur yama upa rapni Caanan'yei ramya ai'aiyei cheemkhur-bommai mshing hilthungni yerkhaiwurbi yuldakur.

² Umpune Moses'nungei chay piwurkhou hilthungni, cheemkhur takotamle cheemkhur lhang'khatni meirui khulyerbi likarsui thibini ai'aiyei yulbom khalthutbi yerkhairilkur.

³ Kouweiyo toulanungri, Moses'ne cheemkhur khintamle lhang'khatnungeiri lamkrine Jordanyei kulkung lhangra yul dananungei ram yerkhaipiwurla, heiya Levia rapnungeiri yaihangra yul dananungei ram siruk lailong khoini ani khaikhoupimak.

⁴ Kouweiyo toulanungri, Josephbei chanao rapri cheemkhur khintam thukni: Manasseh heirou Ephraim toubine khaithutkur. Heineri Levia rapnungeiri ram siruk khaipimak, heiya yai leinanungei khukarthil raple halrul-yaorul rapya silnanungei ramle, yai ringnanungei putchei rapyatom khaipikur.

⁵ Heisitoubi Israellei chanao rapni, Umpune Moses'nung chay pibini shunmtupikur hilthungni, yai paalnanungei ram rapya yerkhaipikur.

Hebron Ramya Caleb'nungei Khaipikur

⁶ Heirouri Judahyei chanapawa rapni Gilgal'ra Joshua'yei pongra wakartilkur, heitoubi Kenizzia cheemkhurrei Jephunnehyei chanapawa Caleb'ne anungei asitoubi kyun: “Umpune, Dunpuei thimi Moses'nung Kadesh-Barnea'ra karukhniyei ngamrou yunkhou tloulhang heiwari nangni kmu.

⁷ Umpuei shikrui Mosesne Kadesh-Barnea'rouweini ram heiwaya muni thikulnanungei raal'mucha khoini malhetdeinungri keiri kum somli tlungura; heirouri keine anungei keiyei mulhakkur rapya chimni pao hungtamkur.

⁸ Heiya keikou kalhonni ram thikulkur kaiyei teinao rapneri thimi rapya yunchiwurbi yaiyei solungrap yaasundayerkur; heiya keiri keiyei Dunpu Umpuya keiukningra lhukni uklumbi chanthungkhou.

⁹ Heisi tounarouri Moses'ne kantombini heininung asitoubi kyun: ‘Tanghakpani neihoni trumkhou ram heiwari neiyei paalna'nungei, heirou neiyei yu-cha rapbei yul dananungei klui naimakni hoiyerrouwa; ngamri nangni keiyei Dunpu, Umpuya lhukni uklumbi hil chanthungkhou.’

¹⁰ Heiya asinungri thilak, Umpuei shunpikhou heinakrimni keiya Ane angtu ramphani ringyerleihui; Israel rapni ramthingra raanchayeinung Umpune Moses'nung tlou awaya shunpikur kum heirouwei kum somlile phangabil hungtlungura; heiya thilak, angturi keiri kum somshrile phangabil ka'tlungura.

¹¹ Heiya Moses'ne keiya raal'mucha khoini watyilyei kheenrou mantrang'naksini keiri angtu ramphani mantrangleihui; kheen heiyei raal chanei mantrang klei'naksini, asinungkhi heisibil wathuk-hungchangri manileihui.

¹² Heineri asinungri, Umpune heiniyei yunpikhou heinakrimni, keinungei lhungdou ram heiwaya khaipilaka; kouweiyo toulanungri, heiniyei kyunri nangnikhi mayekthungkur touri bi heirou koutoubi Anakimra yaiyei khukarthil rapya raalpal lhangaini kuiphopbi louklei, kounakpi Umpune keiya kalhonpilanungri, Umpune shunpikhou heinaksini keine yaya hulthutkur manirou.”

¹³ Heirouri Joshua'ne aya phor piwurbi, heirou Hebron ramya Jephunneh'yei chanapawa Caleb'nungei yul dananungei ram khoini khaipikur.

¹⁴ Heingammei angtu ramphani Hebron heiwari Kenizzia cheemkhurrei Jephunneh'yei chanapawa Caleb'yei yul dana ram khoini leileihui; ngamri ani Israellei Dunpu, Umpuei hilla lhukni uklumbi chanthungkhou.

¹⁵ Heirou Hebron'yei rammin heiwari bongnungri ‘Kiriath-Arba’ toubine ungkhou, ngamri Arba toubi ung heiwari Anakim Lim rapbei hangra yerrouwei tangdui thimi lhouwa khat hoikhou. Heiyei hillouri ram heiwari raal tourilnarouwei mathrilbi kyingni paalkur.