JOSHUA 13 - KHYINGEI PU'TLOU Bible (BSI)

Caanan Ramya Israel Cheemkhur Rapnungei Yerkhaipikur

¹ Asinungri Joshua'ne yentarkur kheenrouri, Umpune Joshua'nung atoubi shun: “Nangri beimakni tarwura, heiya luknungeiri ramri tangni leileihui.

² Maleibi klei ramri: ‘Philistia rapbei ram nammale, Geshuria rapbei ram nammakhi;

³ (Egyptbei kulkung lhangrei ram Shihor rouweini khalu lhangra Ekron'yei rikarchunna kaphani, Philistia rapbei ram touri, Caanania rapbei Krung napung phangayei ram rapri - Gaza, Ashdod, Ashkelon, Gath, Ekron) heirou Avvia rapbei ramkhi;

⁴ heirou khate lhangrani Caanania rapbei ram namma, heirou Sidonia rapbei ram Mearah touri Arah'rouweini Amoria'yei ram ri karchunnara Aphek yudani;

⁵ heirou Gibalia rapbei ramle, heirou kulkung lhangrani Lebanon'yei ram nammakhi, heirou Hermon Lhungdou daakrei klei Baal-gad rouweini Lebo-Hamath yudaphani maleibi leileihui.

⁶ Lhungdou ramrei klei Lebanon rouweini Misrephoth-Maim waphani paalbi klei Sidonia'rap nammaya Keine Israel rapbei maibongrouwei hulthutlouchirou; heitoubi Keine neinungei chay piwurkhou hilthungni yanungei paalnaram khoini pirouwa.

⁷ Ngam heineri, asinungri heiyei ram heirapri Israel cheemkhur takotamle Manassehyei cheemkhur lhang'khatdei yul dananungei yerkhaipilak.”

⁸ Heitoubi yaiyei cheemkhur lhang'khatle, Reuben'yei cheemkhurle, heirou Gedyei cheemkhurnungri, Umpuei shikrui Moses'ne yanungei khaipiwurkhou hilthungni, Jordan'yei kulkung lhangei ramya yul dananungei siruk khoini yani phaloukur.

⁹ Arnon kungruira klei Aroer'rouweini, phaikar heiyei tlailamra klei khukarthilkhi kyaoni, heirou Medeba'yei phaikar nammakhi, Dibon waphani;

¹⁰ heirou Amoria'yei Krung Sihonyei khukarthilrap nammakhi, Heshbon kyaoni Ammon'yei ram rikarchunna wadani;

¹¹ heirou Gilead'le, Geshuriale, Ma-acathia'yei ram rikarchunna waphani, heirou Hermon Lhungdou ram nammakhi, heirou Bashanyei ram nammakhi Salecah waphani;

¹² heirou Ashtaroth'le Edrei'ra krungkul sheembini paalkhou Og krungei krungram Bashan nammakhi loulhakkur. (Og'ri Rephaim manulim hangrouwei aitamtomcha himaleithung); kouweiyo toulanungri, Moses'ne ya namyerwa hattumwurbi kulchalkur.

¹³ Heisiya hoiyanungkhi, Israel rapniri Geshuria raple Ma-acathia rapyari hatkhi hatpimak, heitoubi hulkhi hulthutpimakni horkhoupikur; heisitounei ngamrou Geshuria raple Ma-acathia rapri angtu'rampha Israel rapbei hangra paalbini leileihui.

¹⁴ Heiya aniri Leviayei cheemkhur heinungtomri yaiyei yul dananungei ram sirukri khaipikhoumak; ngamri Umpune yanungei shunpikhou hilthungni, Israellei Dunpu, Umpunungei meira hongbi makat putcheirap namyerwa heiri yai phabomthuk cheem-keiyei siruk hoirou.

Reuben Cheemkhurni Yul dananungei Khaipikur Ram

¹⁵ Heitoubi Moses'ne Reuben'yei chanao rapnungei yai bommai-shullam hilthungni yul dananungei ram siruk yerkhaipikur.

¹⁶ Heitoubi yaiyei ram rikarchunna heiwari Arnon kungruira klei Aroer rouweini, phaikar tlailamrei klei khukarthil namma kyaoni, heirou phaikar nammakhi Medeba waphani koolphoplei.

¹⁷ Heshbon'khi heirou phaikar rilla klei khukarthil nammakhi: Dibon, heirou Bomoth-Baal, heirou Beth-Baal-Meon'khi;

¹⁸ heirou Jahaz, heirou Kedemoth, heirou Mepha-ath;

¹⁹ heirou Kiriathaim, heirou Sibmah, heirou phaikar rilla klei lhungdourei Zereth-shahar;

²⁰ heirou Beth-Peor, heirou Pisgahyei Lhungdou nimna ram, heirou Beth-jeshimoth;

²¹ heirou ram heiwari nimna phaikar ramra klei khukarthil nammakhi kyaoni, heirou Heshbon'ra leibi krung khoini paalkhou Amoria'yei krung Sihon'yei krungram nammakhi lukloukur. Heirou Sihon'ya raal pangbini, aiyei ramra palbi klei Midian'yei chanaorap: Evi, Rekem, Zur, Hur, heirou Reba'yakhi Moses'ne raal maniwurbi lukloukur.

²² Heirou Israel rapni thimirap chungwani hatdurna hangra Beor'yei chanapawa, hillei hungthuknungei tlouya shunthutpi mani thimkhui Balaam'khi hatchokkur.

²³ Heitoubi Reuben'yei chanao rapbei ram rikarchunnari Jordan kungbil ka'tlunglei. Heisitoubi yultlairap heirou khukarthilrap heiwaya Reuben'yei chanao rapnungei yai cheemkhur hilthungni yerkhaipiwurbi yuldayerkur.

²⁴ Heirou Moses'ne Gad'yei chanao rapnungei yaiyei cheemkhur bommai hilthungni yul dananungei ram yerkhaipikur.

²⁵ Heirou yanungei khaipikur ram heiwari Jazer'yei ram, heirou Gilead'yei khukarthil nammale, heirou Ammoria rapbei ram lhang'khatkhi, Rabbah pongra klei Aroer'bil rikarchunkril;

²⁶ heirou Heshbon rouweini Ramath-Mizpah wa'tlungni, heirou Mahanaim'rouweini Debir wa'tlungni rikarchunkril;

²⁷ heitoubi phaikarrani Beth-Horam, Beth-Nimrah, Succoth heirou Zaphon, Heshbonyei krung Sihonyei krungram nammakhi, heirou kulkung lhangrani Jordan kungra ri karchunyerbi, Chinnereth Samadru yongdongna myu kaphani rikarchunkyer.

²⁸ Ram heiwari Gadyei cheemkhur bommai mshing hilthungni yerkhaipikur khukarthilrap heirou yulthung rapri arapriya.

²⁹ Moses'ne kulkung lhangrei klei Manasseh'yei cheemkhur lhang'khatnungeikhi yul dananungei ram siruk khaipikur. Awari Manassehyei cheemkhur lhang'khatdei cheemmai mshing hilthungni yerkhaipikur.

³⁰ Heitoubi yaiyei ramkhaina ri heiwari Mahanaim rouweini Bashan ram namma, heirou Bashan'yei krung Og'yei krungram nammakhi, heirou Bashan rillei klei Jair rapbei khukarthil somrukkhi kyao;

³¹ heirou Gilead ram lhang'khatkhi, heirou Bashan'yei krung Og'ne paalkhouna khukarthilrap Ashtaroth'le Edrei'khi kyaoni koolphopkur. Ram namma heiwari Manasseh'yei chanapawa Makir'nungei aiyei cheemkhur bommai mshing hilthungni yerkhaipikur.

³² Jerichoei kulkung lhangra Jordan kung ralbi klei Moab'yei phaikara leiyeikalnung Moses'ne yul dananungei yerkhaipikur ram rapri ariya.

³³ Heiya Moses'ne Levia rapnungeiri yaiyei yul dananungei khoini ram siruk koukhatkhi khaikhoupimak; ngamri Aiyei kantompikur hilthungni, Israel rapbei Dunpu, Umpuri yaiyei siruk hoirou da.