JOSHUA 11 - KHYINGEI PU'TLOU Bible (BSI)

Khalu Lhangei Palestine'khi Raal Manebi Lukloukur

¹ Heirouri asitoubine hungthukkura, touri Hazor'yei Krung Jabinne pao heiwaya mayekkurla, heisi tounarouri ani thimi malhetbini Madon'yei Krung Jobab'nungle, Shimron'yei Krung, heirou Achshaphbei Krung'nungkhi;

² heirou khalu lhangrei klei lhungdou rammei Arabah rilla klei Krung rapnung- Chinneroth'rei khate lhangrei heirou Samadru'rui phaikar ramrei heirou khate lhangrei Dor lhungdou chouna ramrei klei Krung rapnungkhi-

³ heirou kulkung lhangei heirou kulrel lhangrei Caanania rapnungkhi, heirou lhungdou ramra paalbi klei Amoria rapnung, Hittia rapnung, Perizzia rapnung, heirou Jebusia rapnungkhi, heirou Hermon lhungsoyei Mizpeh ramra klei Hivia rapnungkhi raalpao chilkur.

⁴ Heirouri yani wathukbi, heirou yale kalhonni raalluirap nammakhi, Samadru ruirei shitnruinak chungwani, sapuk raple, sapuk kaari rapkhi chungwani wakartilkur.

⁵ Heisitoubi Krungrap nammani murilbini yarilkur, heitoubi raalluirap nammani kartilbini Merom kungruira Israel rapya raal kardourilnanungei rungbom sheemkur.

⁶ Heirouri Umpune Joshua'nung shun: “Yayari chimaklo, kouweiyo toulanungri, ningatou tlainirou kheen ahakrou Keine yayari Israel rapbei hutra namma pilhakbini hiyerrouwa; heirouri nani yaiyei sapuk rapya khnaring rui shaat'tatlaka, heitoubi yaiyei sapuk kaari rapya mei shulhakbi honglaka.”

⁷ Heisitoubi Joshua'ne aiyei raalluirap nammale kalhonni Merom'yei kungruira kabi tallengni yaidoura raal dakur.

⁸ Heirouri Umpune yayari Israel rapbei hutra pilhakurbi, Israel rapni yaya raal manikur. Heisitoubi yaya Sidon lhangrei samadru waphani, heirou Misrephoth-Maim waphani hulloukur; heitoubi kulkung lhangrani Mizpeh phaikar wa'tlungni hulloubi, yaya thimi hukhatchakhi maleithungyermakni hatkur.

⁹ Heisi toubine Joshua'ne, Umpune anungei shunpikur heinakrimni yaya hatkur; heitoubi ani yaiyei sapuk rapyakhi naring rui shat-tatdurbi, heitoubi yaiyei sapuk kaari rapkhi meini hongkaangkur.

¹⁰ Heitoubi kheen heihakrou Joshua'ne Hazor'ra heikallengbini heiwayakhi kulchalbi lukloukur, heitoubi heiyei Krungyakhi raalshon'ne shaat'hatkur; ngamri, heiyei kheen heirouri Hazor'ne Krungram namyerwayei doura yerrouwei lu khoini leikhou.

¹¹ Heisitoubi yani heiyei rilla louklei thimirap nammaya raalshon'ne shaat'hatkur, heitoubi thimi huchakhatkhi kartleiyermakni hatdurbi maangyerkur; heitoubi ani Hazor khukarthilya meini shutaakkur.

¹² Heitoubi Joshuane heinaksi Krungkulrap nammaya lukloubi, heitoubi heiyei Krung rapyakhi namma manlouheibi raalshon'ne shaat'hatkur, heisitoubi Umpuei shikrui Mosesne chay piwurkhou hilthungni ani yaya hattumwurbi maangyerkur.

¹³ Heisiya hoiyanungkhi, Israel rapneri yaiyei kulyenchalheikur khukarthilrap deiri khathakhi meini shulhakhoumak, heiya Hazor'yatom Joshua'ne mei shulhakkur.

¹⁴ Heirouri Israel rapni Krungkulrap nammaya heiyei putchei raple, halrul rapya yaiyei raalmanput khoini markumloukur, heiya thimi rapyari hukhatchakhi karkulyermakni nammaya raalshon'ne shat'hatbi mangyerkur.

¹⁵ Umpune Aiyei shikrui Moses'ya chay piwurkhou heinakrimni, Moses'nekhi Joshuaya chay piwurkhou; heisitoubi Joshua'nekhi heiyei hilthungni lhou toukur; heisitoubi Joshua'ne, Umpune Moses'nung chay piwurkhou lhourap namyerwaya hathakhi lhou khoini touthutmakni horkhoumak.

¹⁶ Heisitoubi Joshuane ram heiwaya namma- lhungdou ramkhi, Negeb touri khate lhangrei ramkhi, Goshenyei ram nammakhi, kulrel lhangrei lhungso ramkhi, Arabah'khi heirou Israellei lhungdou ramle, lhungso ramkhi;

¹⁷ heirou Halak'rouweini Seir wadani klei lhungshaangkhi, heirou Hermon Lhungsoyei Lebanon phaikarei klei Baal-gad waphani raal maniwurbi lukloukur. Heitoubi ani heirapbei Krungrap nammakhi manbini, yarapya yertlengwa hatkur.

¹⁸ Heisitoubi Joshuane kheen tlani Krungrap nammale raal kadourilkur.

¹⁹ Gibeon'ra klei Hivia'rap nimakni dei khukarthil rapri khatchatomkhi Israel raple yarilbi kyingni leimalnakhou touri yaomaklei; ya dei rapyari raal dabini lukloukur.

²⁰ Kouweiyo toulanungri, awari Umpune yaiyei sholung rapya kalyerwurbi, Israel raple raal kardourilyerbi, heitoubi Ane yaidoura koukhatkhi kringpikhei yaomakni tumni maangyernanungei toubine, Umpune Moses'nung chay piwurkhou hilthungni touwurkhou.

²¹ Heitoubi kheen heirouri Joshua'ne kathukbini Anakim rapya hatdurbi, heitoubi lhungdou ram nam'rouwei- Hebron'rei, Debir'rei, Anab'rei, heirou Judahyei lhungdou ram namreikhi toumangkur; heirou Joshuane yayale yaiyei krungkulrap nammakhi tumni toumangkur.

²² Heisitoubi Israel rapbei ram rillari Anakim rapya thimi hukhatchakhi leithungyermakni hatkur, heiya Gaza'rale, Gath'ra, heirou Ashdod'ratom thimi thacha maleithungkur.

²³ Heisitoubine Joshua'ne, Umpune Moses'nungei shunpiwurkhou hilthungni ram nammaya lukloukur; heitoubi Joshuane ram heiwaya Israel rapbei yul dananungei yaiyai cheemkhur shullam hilthungni yerkhaipikur. Heisitoubi ram heiri raal kardourilnarouwei mathrilkur.