JOSHUA 10 - KHYINGEI PU'TLOU Bible (BSI)

Krung Napung-phangane Gibeon'ya Raal Dakur

¹ Asinungri asitoubi hungthukura, touri Joshua'ne Jericho'ya lukloubi, heiyei Krungya manbini thuithini mareknabi maangyerkur heinaksini Ai'yakhi lukloubini, heiyei Krungyakhi manbi thuithini hatdurnei paole, heirou Gibeonia rapkhi Israel raple yakantlangrilbi yaihangra yakou paalmalnawurame tounei pao heiri Jerusalem'yei Krung Adoni-Zedek'ne mayekurla.

² Heingamei yari kalthi chirilkur, ngamri Gibeon khukarthil heiwari beimakni tang khukarthil khat, heirou Krungkulrap deinaksi tang, heirou Ai'yakhi duini tang khukarthil khat, heitoubi heiyei raallui rapkhi krak mantrangthil.

³ Heitounei ngamrou, Jerusalem'yei Krung Adoni-Zedek'ne thimi malhetbini Hebron'yei Krung Hoham'le, Jarmuth'yei Krung Piram, Lachish'yei Krung Japhia, Eglon'yei Krung Debir'nungei pao washunpikur:

⁴ “Keileinara kawalo, heitoubi keiya raal bei paangpilaklo, Gibeon rapbei doura raal dawase; kouweiyo toulanungri, yani Joshua'le Israel rapkou yakantlangrilbi leiyurame.”

⁵ Heisitoubi Amoria rapbei Krung napung'phanga, touri Jerusalem'yei Krung, Hebron'yei Krung, Jarmuth'yei Krung, Lachish'yei Krung, heirou Eglon'yei Krung ya nammani pulbini, yaiyaiyei raallui rapya urbini raal dananungei toubi kakur, heitoubi Gibeon'yei pongra kabi rungbom sakur, heitoubi yaidoura raal dakur.

⁶ Heirouri Gibeonia rapni thimi malhetbini Gilgal'ra rungbom sheembini klei Joshua'nung paotambini shun: “Neiyei shokrap kaya horkhoupimaklo, kaileinara khrangni kabi kaya kalpilaklo, heitoubi bei trungpilaklo. Kouweiyo toulanungri, lhungdou ramra paalbi klei Amoria rapbei Krungrap nammani kaya raal dananungei kartilbi leiyurame.”

⁷ Heisi tounarouri Joshua'ne Gilgal'rouwei aiyei thimirap nammale, sireikhei raalluirap nammakhi ale kalhonni kakur.

⁸ Heirouri Umpune Joshua'nung shun: “Yayari chimak, kouweiyo toulanungri, yayari Keine neihutra pilhakurla; yari hukhatkhi nai maibongra loumayungchangmakrou.”

⁹ Heisitoubi Joshua'ne karyimkhaimakni Gilgal'rouwei msantan kabini heitoubi tallengni yaidoura raal kadakur.

¹⁰ Heirouri Umpune Amoria rapya Israel rapbei maibongra tamungyerkur, heitoubi Gibeon'ra yaya namyerwa hatkur. Heitoubi yaya Beth-Horon wana lamtangra hullouheibi, Azekah'le Makkedah waphani chanthungbi yaya hatkur.

¹¹ Heirouri asitoubi thukkura touri, yani Israel rapbei maibongra loutrukyei kheenrouri, Beth-Horon'rouweini Azekah'ra yuna lamra Umpune yaidoura nungthourei nunghei manrolni rosundayerbi nanghatkur; heisitoubi yaihangra Israel rapbei raalshonra hikuryari nungheini nanghatkurni duini chung.

¹² Heirouri Umpune Amoria rapya Israel rapbei hutra pilhakkur tlainirou, Joshuane Israel rapbei maibongra Umpunung atoubi kyun: “O Kinni, nangri Gibeonyei doura yongchipmakni yuk'alrilaklo! Heirou O Tangla, nangkhi Aijalon phaikara chutmakni yukleiriyalo!”

¹³ Heisi toubine Israellei Limni yeekna rapya raal manibongyen Kinnine yongchipmakni mayungkur; heitoubi tanglakhi kathukmakni leikur. Awari Jasharyei Lailikra atoubine: “Kinnine nungthoura nungkhatnuirek yongchipmakni mayungbi leikur” toubine mayelhakhou nimako?

¹⁴ Heirouri thimi napung'khatni Umpunung shunchanarou ninglhakpibi heinaksi shangkur tlainiri bongnungkhi, heirou hilloukhi tekchakhi thukkhoumakhui; kouweiyo toulanungri, Umpune Israel'nungtlim raal kardourilkur.

¹⁵ Heirouri Joshua'ne Israelrap nammale kalhonni Gilgal'yei rungbomra yenkallengkur.

Makkedah'ra Amoria'yei Krung Napung-phangaya Hatkur

¹⁶ Heiya heiyei kheenrouri Amoria'yei Krungrap napung-phanga heiri trukkurbini heirou yaitam Makkedah'ra thlungkhanpur rilla yulbini leikur.

¹⁷ Heirou pao heiwari Joshua'nungei: “Krung napung-phanga heiri Makkedahyei thlungkhanpur rilla yulbi klei mulhakurla,” toubine shunpikur.

¹⁸ Heitounarouri Joshua'ne loushun: “Thlungpur heiwari thlungmtum tang khatni malletpingbi khoulaka, heitoubi bi heirou thimitha mayungaakyerlaka.

¹⁹ Heiya na nammani bi heirou mayungbi leiwurmak, naiyei yeekna thimi rapya hulthungbini, yaya hil'lhangra chanthungbi hatlaka, heitoubi yayari yaiyei khukarthil rilla hungchangyermakrou da; kouweiyo toulanungri naiyei Dunpu, Umpune yayari naihutra pilhakurla.”

²⁰ Heisitoubi Joshua'le Israellei thimi rapni Amoria rapya chungwani hatdurbi raal luilhakkur, heirou yaihangrei yulthungbini himaleithungkur thimirap thachani raalpal kuikoolna khukarthil rapbei rilla yenkallengkur.

²¹ Heisitoubi thimirap nammani Makkedah'yei rungbomra Joshua'yei leinara koukhatkhi shuikngam yaomakni yenkallengkur. Heirouri thimi hukhatnikhi Israel rapbei doura yanimaknei tlouri koukhatkhi yunchangmakur.

²² Heirouri Joshuane shun: “Thlungpur heiwaya latbini heitoubi Krungrap napung-phangaya urthutbini keinungei yenlhaklak.”

²³ Heisitoubi yani Krung napung-phangaya touri, Jerusalem'yei Krung, Hebron'yei Krung, Jarmuth'yei Krung, Lachish'yei Krung, heirou Eglon'yei Krungya thlungpur heirouwei urthutbini anungei yenruilhakur.

²⁴ Heirouri asitoubine thukkura, touri yani Krung rapya urthutbini Joshua'nung yenruilhakei kheenrou, Joshuane Israellei thimirap nammaya ungthutbini, heitoubi akou kalhonni raalchakhou raallui rapbei raalluipu upa rapya shun: “Pongra wachanga, heitoubi naiyei hopaakni Krung rapya ngakhungra tatkhrakurlak.” Heisitoubi yani wachangbi yaya ngakhungra hopaakni tatkhrakkur.

²⁵ Heirouri Joshua'ne yanung shun: “Nari chimak, heirou nai lhawaikhi lahwurmak! Nai ukning krakni mantrangalo; kouweiyo toulanungri, nai kardourillou kyou yeekna thimirap nammanungei Umpune heinakbilni lhou toupirou.”

²⁶ Heisi toubine hillouri Joshua'ne Krung rapya umhatkur, heitoubi ani yaya heengtrung phangatamra khatsol manyarkur. Heisitoubi yani khilhung rapya rawai'phani heengra manyarbi khoukur.

²⁷ Heiya rawai Kinni yenchipbei kheenrouri Joshuane chay piwurbi, khilhung rapya yani heengtrungrei lousundawurbi, heitoubi khilhungrap heiwaya yaitamni yulbi louleina thlungpurra khinglhakur, heitoubi thlungmtum tang khatni thlungpur heiwaya malletpingbi khoukur heiwari angtu ramphani leileihui.

²⁸ Tlaini heihakrou Joshua'ne Makkedah'ya raal maniwurbi lukloukur, heitoubi heiyei thimi rapyakhi heirou heiyei Krungyakhi raalshon'ne hattumkur; heisitoubi ani hattumwurbi thimi huchakhatkhi himaleiyermakni maangyerkur. Heisitoubi ani Jericho'ya thuithini toupiwurkhou heinakrimni, Makkedah'yakhi ani thuithini toupikur.

Joshua'ne Khate Lhangei Palestine Ramya Raaldabi Lukloukur

²⁹ Heirouri Joshua'ne Israelrap nammale kalhonni chabini Makkedah'rouweini Libna'ra heiralbini, heitoubi yaidoura raal dabini kardourilkur.

³⁰ Heirou Umpune ram heiwakhi, heiyei Krungle kalhonni Israel rapbei hutra pilhakkur; heirouri ani ram heiwakhi heirou heiyei rilla louklei thimirap nammakhi raalshon'ne shaat'hatkur. Heisitoubi ani thimi hukhatchakhi lakkhoumakni Jericho'yei Krungnungei touwurkhou heinaksini toupibi hattumkur.

³¹ Heitoubi Joshua'ne Israelrap nammale kalhonni Libna'rouweini Lachish'ra heirallhakurbi, heitoubi yai pongra rungbom sheembini leikur, heitoubi heiyei doura raal dakur.

³² Heirouri Umpune Lachishkhi Israel rapbei hutra pilhakur; heirou khnini tlung tlainirou ani heiwaya raal maniwurbi lukloukur; heitoubi ram heiwale heiyei rilla louklei thimirap nammakhi raalshon'ne Libna'ra shaat'hatkur heinaksini tumni shaat'hatkur.

³³ Heirouri Gezer'yei Krung Horam'ne Lachish'ya raal paangnungei kathukkur, heiya Joshua'ne ayale aiyei raalluirap nammaya raal loumaniwurbi, thimi hukhatchakhi lakkhoumakni hatdurpi.

³⁴ Heirouri Israellei thimirap nammale kalhonni Lachish'rouweini Eglon'ra heiralkur; heitoubi yani heiyei pongra rungbom sheembini, heitoubi heiyei doura raal dakur.

³⁵ Heitoubi yani tlaini heihakrou Eglon'ya raal maniwurbi, ram heiyei rilla louklei thimirap nammaya raalshon'ne shat'hatdurbi, heirou ani Lachishya touwurkhou heinakrimni tumni mangyerkur.

³⁶ Heirouri Joshua'ne Israelrap nammale kalhonni Eglon'rouweini Hebronra kakur, heitoubi yaidoura raal kadakur.

³⁷ Heitoubi yani heiwaya raal maniwurbi lukloukur, heitoubi heiyei Krungle khukarthil dei nammakhi, heirou heirapbei rilla louklei thimirap nammakhi raalshon'ne hattumkur; heisitoubi Eglonra touwurkhou heinaksini ani thimi hukhatchakhi maleithungyermakni hatkur.

³⁸ Heirouri Joshuane Israel'rap nammale kalhonni Debir'ra yenkallengbi, heitoubi yani heiyei doura hanui raal dakur.

³⁹ Heitoubi yani heiwaya raal maniwurbi, heiyei Krungle khukarthil deirapkhi kulchalkur, heitoubi yani heiyei rillei louklei thimirap nammaya raalshon'ne shaat'hatdurbi tumni maangyerkur. Heisitoubi yani thimi rapya hukhatchakhi lakkhoumakni, Hebron'le Libna'ya, yaiyei Krung rapya toupiwurkhou heinakrimni Debir'yale, heiyei Krungyakhi thuithini toupikur.

⁴⁰ Heisitoubi Joshua'ne ram nammaya, lhungdou ramkhi, Negeb touri khate lhangei ramkhi, nimna phaikarei ramkhi heirou lhungdou ram rapkhi, heirou heirapbei Krung rapyakhi raal maniwurbi thuithini toupikur. Heirou ani thimi hukhatkhi himaleiyer'makni, Israel rapbei Dunpu, Umpuei chay piwurkhou hilthungni lhawaipal chiwirap nammayakhi tumni hatdurbini mangyerkur.

⁴¹ Heisitoubi Joshua'ne Kadesh-Barnea'rouweini Gaza wa'tlungni klei thimirap nammaya, heirou Goshen ram'rouweini Gibeon wa'tlungphani klei thimirap nammayakhi tumni hatlummurbi maangyerkur.

⁴² Heirouri Joshua'ne ram heiyei Krungrap nammaya raal maniwurbini hanuitomrou kulchalkur, ngamri Israel rapbei Dunpu, Umpune Israel rapnung'tlim raal kardourilkur.

⁴³ Heisitoubi Joshua'ne Israellei thimirap nammale kalhonni Gilgal'yei rungbomra yenkallengkur.